उदयपुरः उदयपुरको बेलका नगरपालिका– १ आम्बासीमा रहेको बेलका मेडिलक पोलिक्लिनिक प्रा.लि. का सञ्चालक लागूऔषध र नियन्त्रित औषधीसहित पक्राउ परेका छन् ।

विशेष सूचनाको आधारमा प्रहरीले शुक्रबार राती ११ बजे सो क्लिनिकमा खानतलासी गर्ने क्रममा सप्तरीको तिरहुत गाउँपालिका २ मैनाकडेरी का २६ वर्षीय सुबोध यादवलाई पक्राउ गरेको हो ।

उनको साथबाट टर्माडोल हाइड्रोक्लोराइड १ सय ९८ ट्याब्लेट, डाइकोमाइन हाइड्रोक्लोराइड ५ सय १५ ट्याब्लेट, कोफट्याब डी ३ सय ५ ट्याब्लेट, टर्माडोल हाइड्रोक्लोराइड ओपिडोल १ हजार ५ सय २ ट्याब्लेट, प्रिगोट किट १० ट्याब्लेट, सिल्डेनाफिल ४ ट्याब्लेट, जन्ग्रा रेड १२ ट्याब्लेट प्रहरीले बरामद गरेको थियो ।

त्यस्तै, नगद १ लाख १७ हजार र मोबाइल १ थान बरामद गरिएको प्रहरीले जनाएको छ । बरामद गरिएको सामानसहित सो क्लिनिकका सञ्चालक यादवलाई पक्राउ गरिएको इलाका प्रहरी कार्यालय रामपुर ठोक्सिलाले जनाएको छ । उनीमाथि थप अनुसन्धान भइरहेको सो कार्यालयले जनाएको छ ।

उदयपुरः उदयपुरको त्रियुगा नगरपालिका १ जोगीदहकी ४५ वर्षीया शारदा चौधरीको ट्याक्टरको ट्रलीबाट लडेर मृत्यु भएको छ ।

शुक्रबार बिहान साढे १० बजे जंगलबाट घाँस काटी आउँदै गर्दा प्रदेश २–०१–००१ त ००८१ नम्बरको ट्याक्टरमा घाँस लोड गरी पछाडी ट्रलीमा बसेकी थिइन् ।

सोही क्रममा ट्याक्टरको ट्रलीबाट लडी गम्भीर घाइते भएकी उनको उपचारको लागि विराटनगरतर्फ लैजाँदै गर्दा बाटैमा मृत्यु भएको जिल्ला प्रहरी कार्यालय उदयपुरले जनाएको छ ।

धरानः सुर्खेतबाट धरान आउँदै गरेको मे १ ख ३३४७ नम्बरको यात्रुबाहक बस र विपरीत दिशाबाट गइरहेको टिफर बाँकेको कोहलपुर– १३ रोहिणी खोलामा दुर्घटना हुँदा ५ जनाको मृत्यु भएको छ । हिजो साँझ भएको सो दुर्घटनामा बसमा सवार ३७ यात्रु घाइते भएका छन् ।

मृत्यु हुनेमा कोहलपुर नगरपालिका–१२ का  उदय बाठा र वडा नम्बर १३ का खगेन्द्र सुनार रहेका छन् । उनीहरु दुवै जना टिफरमा सवार थिए । उनीहरुमध्ये १ जना टिफर चालक हुन् ।

त्यस्तै, बसमा सवार सुर्खेतको साटाखानीका ४० वर्षीय जीवन बिक र झापाको मेचीनगर नगरपालिका–१० का बसधनी ४५ वर्षीय छत्र कटुवालको मृत्यु भएको छ । इलाका प्रहरी कार्यालय कोहलपुरका अनुसार अन्दाजी ३५ वर्षीय भारतीय महिलाको सनाखत हुन सकेको छैन ।

दुर्घटनामा १ जनाको घटनास्थलमै र अन्य ४ जनाको उपचारका क्रममा नेपालगञ्ज मेडिकल कलेज शिक्षण अस्पताल कोहलपुरमा मृत्यु भएको हो ।

प्रहरीका अनुसार घाइतेमध्ये ७ जनाको अवस्था गम्भीर छ । सबै घाइतेहरुको कोहलपुर मेडिकल कलेजमा उपचार भइरहेको प्रहरीले जनाएको छ ।