विराटनगरः कार्यभार सम्हालेको ६ दिनपछि प्रदेश १ की सामाजिक विकास मन्त्री उषाकला राईले मन्त्रालयका आगामी प्राथमिकता र कार्यक्रम सार्वजनिक गरेकी छिन् ।
बुधबार पत्रकार सम्मेलन गरी मन्त्रालयका सबै कार्यक्षेत्रलाई समेटेर आगामी प्राथमिकता र कार्यक्रम सार्वजनिक गर्दै उनले दोस्रो चरणको कोरोना सङ्क्रमण बढ्ने सम्भावनालाई ध्यानमा राखी कोशी अस्पताल कोभिड १९ उपचार केन्द्र पुनः सञ्चालनको तयारी गरिएको बताइन् । यसका लागि अस्पतालको निरीक्षण गरी आवश्यक निर्देशन पनि दिइएको र यसअघि कोरोना उपचारमा संलग्न अस्पताललाई तयारी अवस्थामा रहन आग्रह समेत गरिएको बताइन् ।
उनका अनुसार सबै जिल्ला अस्पतालहरूलाई कम्तीमा १० बेड सम्म कोभिड आइसोलेसन वार्ड तयार गरी उपचारको व्यवस्थापनका लागि निर्देशन दिइने भएको छ ।
आगामी कार्य योजना सार्वजनिक गर्दै उनले स्वास्थ्य बीमा कार्यक्रमले नसमेटेका र आर्थिक अभावमा उपचार गर्न नसक्ने जनताका लागि आवश्यक कार्यविधि र मापदण्ड बनाएर लागू गरिने बताइन् ।
शिक्षाको गुणस्तरमा सुधार गर्न भौतिक पूर्वाधार निर्माण तथा जनशक्तिको क्षमता विकासका कार्यक्रम सञ्चालन गरिने पनि उनले बताइन् ।
प्रदेश स्तरमा सञ्चालित ज्येष्ठ नागरिक लक्षित दन्त उपहार तथा आँखा उपचार कार्यक्रम सञ्चालनका लागि योजना बनाएर लागू गरिने भएको छ । स्थानीय तह, प्रदेश सरकार र सामाजिक विकास संस्थासँगको सहकार्यमा सडक आश्रित, सहयोगापेक्षी मानवमुक्त प्रदेश निर्माण कार्यलाई निरन्तरता दिइने तथा प्रदेश खेलकुद बोर्ड र जिल्ला खेलकुद विकास समितिहरू चाँडै गठन गरिने कार्ययोजना रहेको उनले सुनाइन् ।
मन्त्रालयबाट सम्पादन गर्नुपर्ने कार्यहरूलाई आवश्यक पर्ने ऐन, नियमावली, कार्यविधि आदिको तर्जुमा गर्ने र विद्यमान कानुनहरूको समयानुकूल संशोधन गरिँदै लगिने उनले बताइन् ।
कोदोको रक्सी ब्रान्डिङ गरिने
कोदोको रक्सीलाई ब्रान्डिङ गरी आयआर्जनको माध्यम बनाउने उनले सुनाइन् । कोदोको रक्सीलाई ब्राण्डिङ गर्ने कार्यको बारेमा कानुनी र व्यवहारिक पक्षको अध्ययन गरी लागू गरिने उनले बताइन् ।
You must be logged in to post a comment Login