विराटचोकः कृषि विकास बैंकले संस्थागत सामाजिक उत्तरदायित्व अन्तर्गत सुन्दरहरैंचाको एक सामुदायिक विद्यालय र एक साझेदारी वन व्यवस्थापन समूहलाई सूचना प्रविधिमा आधारित सामग्री प्रदान गरेको छ ।

बैंकले सुन्दरहरैंचा – ८ मा रहेको शिक्षा निकेतन माध्यमिक विद्यालयलाई ३ वटा डेस्कटप कम्प्युटर, एउटा प्रिन्टर र एउटा स्क्यानर प्रदान गरेको छ । २ लाख रुपैयाँ बराबरको सामग्री प्रदान गरिएको बैंकले जनाएको छ ।

सामग्री वितरण समारोहलाई सम्बोधन गर्दै कार्यक्रमका प्रमुख अतिथि सांसद लोकप्रसाद संग्रौलाले मोरङमा शिक्षा निकेतनको फरक पहिचान रहेको बताए । ‘आर्थिक रुपमा सम्पन्न विद्यालय मोरङमा अरु होलान्,’ संग्रौलाले भने, ‘तर शैक्षिक गतिविधिका कीर्तिमानी राख्नमा यो स्कुल अगाडि छ ।’

कृषि विकास बैंकको प्रदेश नम्बर १ का निर्देशक वासु अधिकारीले सूचना बिनाको प्रविधि र प्रविधिबिनाको सूचनाको औचित्य नहुने बताए । सूचना प्रविधिसँग साक्षात्कार गरी त्यसमा रुचि राख्ने र त्यसको गहिराइमा पुग्ने गरेमा विद्यार्थीले सूचना र प्रविधिको महत्व बुझ्ने उनको भनाइ थियो ।

वडा नम्बर ८ का अध्यक्ष खेमप्रसाद न्यौपानेले नगर र वडाले शिक्षा क्षेत्रलाई ध्यान दिएर बजेट विनियोजन गरिरहेको बताए । जनप्रतिनिधि र विद्यालय व्यवस्थापन समिति तथा शिक्षकहरुको उद्देश्य पूरा गराउने क्रममा बैंकले गरेको सहयोगले ठूलो महत्व राख्ने बताए ।

विद्यालय व्यवस्थापन समितिका अध्यक्ष कृष्णप्रसाद रिजालले विद्यालयको शैक्षिक स्तरोन्नतिका लागि भौतिक र प्राविधिक सहयोग जुटाउन आफू लागिपर्ने बताए ।

कार्यक्रममा स्वागत मन्तव्य राख्दै विद्यालयका प्रधानाध्यापक ठाकुरप्रसाद सुवेदीले वित्तीय संस्थाको सहयोग विद्यालयलाई पहिलो पटक प्राप्त भएको बताए । पढ्नमा जागरुक र सिकाउन उत्प्रेरित रहेका शिक्षकलाई यो सहयोगले थप सहज हुने उनको भनाइ थियो ।

कार्यक्रमको सञ्चालन विद्यालयका सहायक प्रधानाध्यापक घनश्याम रिमालले गरेका थिए ।

कार्यक्रममा नगरपालिकाको शिक्षा शाखाकी अधिकृत लीला ओझा, विद्यालय व्यवस्थापन समितिका पूर्व अध्यक्षहरु श्यामकुमार आचार्य, गोविन्दबहादुर बस्नेत, माधव अधिकारी, संस्थापक अध्यक्ष कृष्णप्रसाद प्रसाईं, बैंकको विराटनगर शाखाका प्रमुख तिलक प्रधान, विराटचोक शाखाका प्रमुख विष्णु पाल बोहोरा, तथा मावि तहका विद्यार्थीको उपस्थिति थियो ।

साझेदारी वन व्यवस्थापन समूहलाई पनि सूचना प्रविधि सामग्री प्रदान

सो बैंकले लाटीझोडा साझेदारी सामुदायिक वन व्यवस्थापन समिति सुन्दरहरैंचालाई पनि २ लाख ५० हजार रुपैयाँबराबरको सूचना प्रविधिको सामग्री हस्तान्तरण गरेको छ । एउटा डेस्कटप, एउटा प्रिन्टर, एउटा पीटीजेड डोम क्यामरा र एउटा एसएलआर क्यामरा प्रदान गरिएको बैंकले जनाएको छ ।

१५ हजार उपभोक्ता रहेको वनको कार्यालय व्यवस्थित बनाउन सहयोग पुगोस् भनेर सूचना सामग्री प्रदान गरिएको बैंकको विराटचोक शाखाका प्रमुख बोहोराले बताए ।

बैंकको प्रदेश नम्बर १ का निर्देशक वासु अधिकारीले वनजंगल मानिसको लागि मात्रै नभएर पृथ्वीका सबै जीवजन्तुको लागि आवश्यक पर्ने भएकाले वनको कार्यालय व्यवस्थापनमा सहज होस् भनेर सहयोग गरिएको बताए ।

कार्यक्रममा सभापतिको आसनबाट बोल्दै सो वन व्यवस्थापन समितिका संयोजक रुद्रप्रसाद पोखरेलले संस्थालाई प्राप्त सामग्रीको उचित प्रयोग गरी कार्यालयको प्रशासनिक व्यवस्थापनलाई थप व्यवस्थित बनाइने बताए ।