विराटचोकः मोरङको सुन्दरहरैचा नगरपालिकामा लोक सेवा तयारी कक्षा सम्पन्न भएको छ । इष्ट नेपाल टेक्निकल कलेजको आयोजना तथा सुन्दरहरैचा नगरपालिकाको आर्थिक सहयोगमा १ महिनासम्म चलेको लोक सेवा तयारी कक्षा शनिबार सम्पन्न भएको हो ।

महिलाहरूका लागि लक्षित सो तयारी कक्षामा नगरका ३५ जना प्रशिक्षार्थी सहभागी रहेका थिए ।

उनीहरूलाई लोकसेवाको पहिलो पत्रको तयारीको बारेमा ज्ञान प्रदान गरिएको आयोजक संस्थाका अध्यक्ष सुजन पोख्रेलले बताए ।

समापन कार्यक्रममा प्रमुख अतिथि रहेका नगरप्रमुख शिवप्रसाद ढकालले सहभागीलाई आफ्ना अनुभव प्रदान गर्दै युवा अवस्थाको समयलाई सही ढङ्गले उपयोग गर्नुपर्ने बताए । सहभागीलाई थप तालीम दिनुपर्ने भए त्यसको लागि बजेट विनियोजन गर्न आफू तयार रहेको पनि उनले बताए ।

अहिलेका युवा पुस्ता सामाजिक सञ्जालमा धेरै अभ्यस्त हुँदा राम्रा गन्तव्य मर्दै जाने भएकाले समयमै भविष्य निर्धारणका लागि लाग्न उनले अनुरोध गरेका थिए । अहिलेका युवा पुस्तको धेरै सुनौलो मौका गुम्दै जाने उनको तर्क थियो । नकारात्मक सोचलाई सधैंका लाई बन्द गर्न पनि उनले सुझाव दिए । राज्यले कानुनी रूपमा महिलाका लागि आरक्षणको व्यवस्था गरे पनि त्यो अझै चित्तबुझ्दो नभएको उनको भनाइ थियो ।

कार्यक्रममा उपप्रमुख धनमाया तामाङले तयारी कक्षामा सिकेको सिपको उपयोग गर्दै सिकाइलाई निरन्तरता दिन जोड दिइन् । जीवनमा समस्या धेरै भए पनि यसबाट भाग्नुभन्दा अगाडि बढेर जान उनले आग्रह गरिन् । सरकारी जागिरे जीवन यापनमा महिलालाई यो कार्यक्रम कोसेढुङ्गा साबित हुने उनको भनाइ थियो ।

सहभागी प्रशिक्षार्थी मनिता खवासले २ वर्ष अगाडि कलेज पढ्दै गर्दा खरिदारको परीक्षा दिए पनि नाम निकाल्न नसकेकोमा अब आफूमा आँट आएको बताइन् । प्रश्न पढ्न नै धेरै समय लाग्ने गरेको तथा किताब पढ्नका लागि मात्र पढ्ने गरे पनि तयारी कक्षामा बसेपछि सटिक र सूत्रबद्ध तरिकाले पढ्दा बुझिँदो रहेछ भन्ने आफूले बुझेको उनले बताइन् ।

सहभागी ज्ञानु घिमिरेले धेरै समय कक्षा लिन नसके पनि पढ्ने तरिका र परीक्षा दिँदा र परीक्षाको तयारी गर्दा ध्यानदिनुपर्ने कुराका बारेमा जानकारी भएको बताइन् । आफूले पढ्दा भन्दा अरुले पढेको सुनेरै ज्ञान हासिल गर्न सकिने उनको भनाइ थियो ।

प्रशिक्षार्थी पूजा खवासले किताबी ज्ञानभन्दा तयारी कक्षामा सिकेको ज्ञानको उपयोग गर्न सके लोक सेवा पास गर्न सकिने बताइन् । तयारी कक्षाले आफूमा ऊर्जा भरिएकाले सफलता लिएरै छाड्ने लक्ष्य रहेको उनले सुनाइन् ।

एक महिने तयारी कक्षामा सामान्य ज्ञान, बौद्धिक प्रश्न र संविधानका बारेमा जानकारी गराइएको आयोजकले जनाएको छ ।