विराटचोकः सुन्दरहरैंचा नगरपालिका वडा नम्बर ७ को सार्वजनिक सुनुवाइ बुधबार सम्पन्न भएको छ । सार्वजनिक सुनुवाइमा वडावासीले उठाएका जिज्ञासाको वडाका जनप्रतिनिधि तथा वडा सचिवले समाधान गरेका थिए ।

वडावासीको जिज्ञासाको समाधान गर्दै वडाध्यक्ष चैतन्यप्रसाद सिटौलाले गोठगाउँमा जग्गाको व्यवस्थापन हुन नसक्दा सार्वजनिक शौचालय नबनेको बताए । वडावासीले कम चासो दिएका कारण पनि शौचालय बन्न नसकेको उनको भनाइ थियो ।

गछियामा पनि साजीलाल माविको जग्गाको पूर्वतर्फ शौचालय बनाउने प्रयास भइरहेको उनले बताए । सुन्दरदुलारी उद्योग वाणिज्य संघको पहलमा गोठगाउँदेखि बलियासम्मका स्थानमा सार्वजनिक शौचालय बन्ने क्रममा रहेको उनको भनाइ थियो ।

गोठगाउँ चोकमा भएको सार्वजनिक जग्गा कम भएकाले वडा कार्यालय भवन बनाउन नसकिने बताउँदै उनले बारबिघेमा जग्गा प्राप्तिको काम भइरहेको हुनाले सोही स्थानमा वडा कार्यालयको भवन बनाउने गरी काम अघि बढिरहेको बताए । त्यस्तै पञ्चायत माविको उत्तरतर्फको खाल्डो पुरेर व्यवस्थित हटिया बनाउने तयारी भइरहेको पनि उनको भनाइ थियो ।

‘नगरप्रमुख उज्यालो’ कार्यक्रममार्फत् नगरभरीका मुख्य चोकमा सडक बत्ती जडान गर्ने काम यसैवर्षदेखि हुने भएकाले वडा नम्बर ७ का मुख्य चोकमा पनि सडक बत्ती जडान हुने उनले जानकारी दिए ।

ट्राफिक प्रहरी पोष्ट गोठगाउँमा ल्याउने, सिटी सफारीको भाडादरमा एकरुपता ल्याउने, पूर्वाञ्चल विश्वविद्यालयमा बिरामीले भोग्नुपरेका समस्याका समाधान गर्ने उनले बताए । पूर्वाञ्चल विश्वविद्यालयमा देखिएका समस्या समाधानमा सांसद, जनप्रतिनिधि तथा अन्य सरोकारवालाको संयुक्त डेलिगेसन गएर उपकुलपतिसमक्ष सेवाग्राहीका माग र समस्या अवगत गराइएको सो अवसरमा उनले बताए ।

बेलगाछी, गणेशपुरदेखि पश्चिमतर्फ डुबानको समस्या देखिनुमा त्यहाँ रहेका मोरङी, लोचनीलगायतका पैनी पुरिनु नै मुख्य कारण रहेको उनले बताए । हाल गछिया बजारको उत्तरतर्फ निकासको व्यवस्था गरेकाले डुबानको समस्या धेरै हल हुने उनले जानकारी दिए ।

महिला सदस्य सुमित्रा बिकले महिलाहरु जागरुक नहुँदा महिलालक्षित कार्यक्रम प्रभावकारी नभएको बताइन् । महिलालक्षित र दलितलक्षित कार्यक्रमको माग वडावासीबाट नभएको हुँदा बजेट विनियोजनमा प्राथमिकता नपरेको उनले बताइन् ।

वडा सचिव लीला रिमालले वडामा चालु आर्थिक वर्षमा १६ वटा योजना सम्झौता भइसकेका र तीमध्ये ८ वटा योजना सम्पन्न भएर फरफारक भइसकेको जानकारी दिए । पशुपालक किसानका लागि तालीम सम्पन्न भइसकेको, ड्राइभिङ तालीमलगायतका अन्यक केही कार्यक्रम सञ्चालनको तयारीमा रहेका उनले जानकारी दिए । बहुवर्षे घाँसको बीउ वितरण, उन्नत जातका बाख्राका पाठापाठी वितरण तथा फलफूलका बिरुवा वितरणको कार्यक्रम पनि अन्तिम चरणमा रहेको उनको भनाइ थियो ।

कार्यक्रममा सहभागी डीपी कट्टेलले पहाडका कुनाकुनामा बिजुली पुगिसक्दा पनि वडा नम्बर ७ का केही टोलमा बिजुलीको पोल र तार भए पनि लाइन नछोडिएको, टोल विकास संस्था गठनमा वडा पछि परेको लगायतका समस्या उठाएका थिए ।

गोकुल न्यौपानेले बाटो निर्माणका क्रममा प्राविधिकले लागत इस्टिमेट गरेको आधारमा पैसा उठाउँदा बाटो निर्माणमा रकम नपुग्ने र साझेदारीमा भनिएभन्दा बढी रकम उठाउन वडावासी तयार नहुने हुनाले साझेदारीमा ग्राभेल, एजिङ र कालोपत्रे गर्दा उपभोक्ता समितिलाई रकम जुटाउन समस्या हुने गरेको उल्लेख गरे ।

लीलाप्रसाद पोखरेलले बिजुलीमा भोल्टेजको समस्या रहेको हुनाले ४ फेजको तार बिस्तारका लागि सम्बन्धित निकायमा पहल गर्नुपर्ने बताए ।

मिलन लुइँटेलले ठडियामा बनेको स्वास्थ्य चौकीले कहिलेदेखि सेवा दिन्छ भनी प्रश्न गरेका थिए । युवाहरुलाई उद्यमी बनाउने विषयमा वडाले के गरिरहेको छ भनी प्रश्न गर्दै बाटो निर्माणका साथै युवा सशक्तिकरणमा पनि वडाले पर्याप्त बजेट विनियोजन गर्नुपर्ने उनले माग राखे ।