विराटचोकः कोरोना सङ्क्रमित भएका हरेक घरमा पुग्ने गरी सुन्दरहरैंचाको वडा नम्बर १२ ले ‘कोभिड रेस्पोन्स’ टिम गठन गरेको छ । स्थानीय युवा निरज ढकालको संयोजकत्वमा गठित टिमले सङ्क्रमितको घरघरमा पुगेर सेनिटाइज गर्ने बताइएको छ ।

बिहीबार नगरप्रमुख शिवप्रसाद ढकाल, उपप्रमुख धनमाया तामाङ, वडा नम्बर १२ का अध्यक्ष रोशनप्रसाद ढकाल पनि कोरोना सङ्क्रमितका घरमा पुगेका थिए ।

जनप्रतिनिधिसँगको सहकार्यमा स्थानीय युवाले सङ्क्रमितको मनोबल उच्च बनाउन यो अभियान चलाएको संयोजक ढकालले बताए । महामारी नियन्त्रण गर्न केही युवाले स्वतस्फूर्त रुपमा यो टिमलाई सहयोग गरेको समेत ढकालको भनाइ छ । सहयोगबाट प्राप्त रकमले कोरोनाका बिरामीलाई पोसिलो खानेकुरासहित स्वास्थ्य सामग्री प्रदान गरिने भएको छ ।

संक्रमितको घरमा सेनिटाइज गर्ने कार्यक्रममा बोल्दै वडाध्यक्ष ढकालले आफ्नो वडामा एक सयको हाराहारीमा सङ्क्रमित भएको र उनीहरुको मनोबल उच्च बनाउन स्वास्थ्यकर्मी सहित घरघरमा सेवा पुर्याइएको बताए । यस्तै अति विपन्न परिवारलाई राहत समेत उपलब्ध गराइने उनले जानकारी दिए ।

यस्तै, उपप्रमुख धनमाया तामाङले महामारी नियन्त्रणमा विभिन्न क्षेत्रबाट सहयोग भइरहेको र नगरपालिकाको टिम अहोरात्र महामारी नियन्त्रणमा लागेको बताइन् ।

नगरपालिकाले गठन गरेको स्वास्थ्यकर्मी सम्मिलित र्यापिड रेस्पोन्स टिमले पनि नगरभरका संक्रमितको घरघरमा गएर औषधि उपचार गर्दै आइरहेको छ ।

सुन्दरहरैंचामा र्यापिड रेस्पोन्स टिम परिचालन