विराटचोकः मंगलबार फेरि शेयर बजारले नयाँ कीर्तिमान कायम गरेको छ । नेप्से परिसूचक ५३.४४ अंकले बढेर २९६०.१४ को अंकमा अडिएर आइतबार बनाएको अल टाइम हाइको रेकर्ड तोडिएको हो । सेन्सेटिभ इन्डेक्स पनि ७.४७ अंकले बढेर ५२८.११ को बिन्दुमा अडिएको छ ।

नेप्से उपसमूहमा रहेका १३ वटा समूहमध्ये १० वटामा हरियाली छाएको छ भने ३ वटामा रातो पोतिएको छ । यो दिन विकास बैंक समूह सर्वाधिक ९.०४ प्रतिशतले उकालो लागेको छ । वित्त समूह ८.७१ प्रतिशत, बैंकिङ समूह तथा निर्जीवन बीमा समूहमा ३.७८ प्रतिशतको वृद्धि भएको छ ।

लगानी समूह सर्वाधिक ०.८८ प्रतिशतले घट्दा होटल तथा पर्यटन समूह ०.४६ प्रतिशत तथा लघुवित्त समूहमा ०.४५ प्रतिशतको गिरावट आएको छ ।

नेप्सेमा सूचीकृतमध्ये २ सय १८ कम्पनीका ३ करोड ५७ लाख ३ सय ७४ कित्ता शेयर १६ अर्ब ९५ करोड १२ लाख ९९ हजार ४० रुपैयाँमा किनबेच भएको छ । मंगलबार पनि नेपाल पुनर्बीमा कम्पनीको सर्वाधिक १ अर्ब ६ करोड ६४ लाख रुपैयाँको शेयर किनबेच भएको छ । रसुवागढी हाइड्रोपावर, युनाइटेड मोदी हाइड्रोपावर, लुम्बिनी विकास बैंकलगायत उच्च कारोबार गर्ने कम्पनीमा परेका छन् ।

हिमालयन जनरल इन्स्योरेन्स, गोर्खाज फाइनान्स, श्री इन्भेस्टमेन्ट फाइनान्स, जानकी फाइनान्स, सांग्रिला डेभलपमेन्ट बैंक, मुक्तिनाथ विकास बैंक, ग्रीन डेभलपमेन्ट बैंकलगायतका ३४ कम्पनीको शेयरमूल्य १० प्रतिशतले बढेको छ ।

मेरो माइक्रोफाइनान्स, हिमाल दोलखा हाइड्रोपावर, सामुदायिक लघुवित्त, कालिका लघुवित्तलगायतका कम्पनी उच्च मूल्य घट्ने कम्पनीमा परेका छन् ।

बजार बढेसँगै समग्र बजार पूँजीकरण ४१ खर्ब ९ अर्ब ५७ करोड २५ लाख ८८ हजार ८ सय ५८ रुपैयाँ पुगेको छ ।