विराटनगरः गत जेठ २९ गते राति भएको ३ ट्रक स्याउ तस्करीमा तत्कालीन डिआईजी ईश्वरबाबु कार्कीको संलग्नताको आशंका प्रहरीले गरेको छ । प्रहरीको मिलेमतोमा सनुसरीको लाही नाकाबाट भारततिर स्याउ तस्करी हुँदै गर्दा भारतीय प्रहरीले नियन्त्रणमा लिएको थियो ।

सो प्रकरणमा १ नम्बर प्रदेश प्रहरी कार्यालय विराटनगर रानीका सइसहित चार जना प्रहरी कारवाहीमा परेपछि उच्च ओहदामा रहेका प्रहरी अधिकारीमाथि पनि प्रहरी प्रधान कार्यालयले छानबिन गर्ने भएको हो ।

ती स्याउ जेठ ३० गते विहान भारतको बिहार, सुपौल जिल्लास्थित वीरपुर–भीमनगर सडक खण्डमा भारतीय प्रहरीले नियन्त्रणमा लिइएको थियो । विराटनगर, धनुषा र सप्तरीबाट १ हजार ३ सय ५० कार्टुन स्याउ बोकेर त्यहाँ पुगेका तीनवटा ट्रक भारतमा पल्टी गर्ने क्रममा पक्राउ परेका थिए ।

सो प्रकरणमा संलग्न तल्लो दर्जाका प्रहरीहरुमाथि अनुसन्धानका लागि प्रदेश प्रहरी कार्यालयले छानविन समिति बनाएको थियो । तत्कालीन डिआईजी ईश्वरबाबु कार्कीले छानबिन समिति गठन गरेका थिए । उता, संघीय प्रहरी इकाई कार्यालयका एसएसपी राजेन्द्र चौधरीको संयोजकत्वमा बनेको टोलीले दुई साता लगाएर सईसहित चारजना प्रहरीको संलग्नता देखिएको भन्दै प्रतिवेदन बुझाईसकेको छ ।

एसएसपी चौधरीको संयोजत्कवमा गठन भएको छानविन टोलीले बुझाएको प्रतिवेदनको आधारमा प्रदेश प्रहरी कार्यालय रिटका सइ घुमुका प्रहरी किरण मोक्तान, श्रीपुर प्रहरी चौकीका सई टेकबहादुर कार्की, सोही चौकीका प्रहरी हवल्दार वीरेन्द्रकुमार यादव, अस्थायी प्रहरी चौकी हरिपुरका असइ भुवराज पोखरेललाई प्रहरी नियमावली अनुसार विभागीय कारवाही गरिएको थियो ।

अनुसन्धान टोलीले ट्रकका चालक, कारोबार गर्ने कारोबारी, स्याउ तस्करी हुँदा देख्ने प्रत्यक्षदर्शीसँग बयानका आधारमा र कारोबारी र प्रहरीबीच भएको टेलिफोन सम्पर्कका आधारमा दोषी ठहर गर्दै प्रतिवेदन बुझाएको हो ।

प्रतिवेदनका आधारमा प्रदेश प्रहरी कार्यालयले कारवाही गर्ने क्षेत्राधिकार भएका प्रहरीलाई कारवाही र प्रधान कार्यालयबाट कारवाही हुनुपर्ने प्रहरीका हकमा सिफारिस गरिसकेको डिआईजी अरुणकुमार बिसीले जानकारी दिए ।

प्रदेश १ का तत्कालीन डिआइजी कार्की र सुनसरीका तत्कालीन एसपी कमल थापा सरुवा हुने बेलामा स्याउ तस्करीमा उनीहरूको नाम मुछिएको थियो । डिआइजी बिसीले यस घटनामा प्रहरी प्रधान कार्यालयले मुख्य चासोको रूपमा हेरेको सोमबार विराटनगरमा आयोजित पत्रकार सम्मेलनमा जानकारी दिए ।