विराटचोकः गत आर्थिक वर्षमा १८ कम्पनीले १४ अर्ब ३४ करोड २३ लाख २५ हजार १ सय रुपैयाँको प्राथमिक शेयर (आईपीओ) सर्वसाधारणमा जारी गरेका छन् । नेपाल धितोपत्र बोर्डको विवरणअनुसार चालु आर्थिक वर्षको अन्तिम आईपीओ युनियन लाइफ इन्स्योरेन्स कम्पनीले निकालेको छ । सो कम्पनीले रु ६४ करोड ५० लाखबराबरको ६४ लाख ५० हजार कित्ता साधारण शेयर खुलाएको हो । सो शेयर असार ३१ गते बाँडफाँड भइसकेको छ ।

बोर्डका अनुसार २०७७ असारमा १७ लाखको हाराहारीमा रहेको हितग्राही खाता (डिम्याट) को संख्या शतप्रतिशतले वृद्धि भई ३५ लाख नाघेको छ । ७ लाखको हाराहारीमा रहेको मेरो शेयरको खाताको संख्या पनि १ वर्षको अवधिमा साढे तीन गुणाले बढेर २६ लाख पुगेको छ । १ वर्षअघि ५ लाख जनाले आईपीओ भर्ने गरेकोमा हाल २१ लाखले भर्ने गरेका छन् ।

पछिल्लो रेकर्डअनुसार गत आर्थिक वर्षमा सबभन्दा पछि असार २४ गतेदेखि आईपीओ निकालेको युनियन लाइफ इन्स्योरेन्सको आईपीओमा सबैभन्दा धेरै आवेदकले आवेदन दिएका थिए । बिक्री प्रबन्धक प्रभु क्यापिटलका अनुसार २१ लाख ५० हजार ४ सय ७८ जना आवेदकबाट ३ करोड ४० लाख १० हजार ८ सय ९० कित्ता शेयर खरिदको लागि आवेदन परेको थियो ।

त्यसअघि जीवन विकास लघुवित्तको साधारण सेयरमा २० लाख ८४ हजार ७ सय ६२ जनाले आवेदन दिएका छन् । त्यसअघि ज्योति लाइफ इन्स्योरेन्स कम्पनीको साधारण सेयरमा १८ लाख ४२ हजार ४ सय ८० ले आवेदन दिएको रेकर्ड थियो । ज्योति लाइफको रेकर्ड जीवन विकास लघुवित्तले तोडेको थियो ।

उता, धितोपत्र बजारमा अनलाइन कारोबारका लागि २०७७ असारमा मात्रै ३५ हजारले युजर आइडी लिएपछि ६ लाख ६० हजारको संख्यामा अनलाइनमार्फत् शेयर किनबेच गर्नेको संख्या पुगेको छ । दैनिक ६ लाख बढीले कारोबार गर्ने गरेका छन् ।

चालु आर्थिक वर्षमा रिलायन्स लाइफ इन्स्योरेन्स कम्पनीले रु ६३ करोड बराबरको ६३ लाख कित्ता साधारण शेयर बिक्री गरेको थियो । समाज लघुवित्तले रु ८६ लाख बराबरको ८ लाख ६० हजार कित्ता आईपीओ बेचेको थियो । सिङ्गटी हाइड्रोपावरले रु ४३ करोड ५० लाख बराबरको ४३ लाख ५० हजार कित्ता आईपीओ बेचेको थियो ।

त्यस्तै, ग्रीन लाइफ हाइड्रोपावरले रु ३४ करोड ९६ लाख ४० हजार रुपैयाँको ३४ लाख ९६ हजार ४ सय कित्ता शेयरको लागि आईपीओ जारी गरेको थियो । रुरु जलविद्युत परियोजनाले २० रुपैयाँ प्रिमियम जोडेर १ सय २० रुपैयाँ प्रति कित्ताका दरले ८ करोड १५ लाख ४१ हजार १ सय रुपैयाँ बराबरको आठ लाख १५ हजार ४ सय ११ कित्ता शेयरका लागि आईपीओ जारी गरेको थियो ।

सिईडीबी हाइड्रोपावर कम्पनीले पनि बैशाख महिनामा साधारण शेयर बिक्री गरेको थियो ।

एनआरएनए इन्फ्रास्ट्रक्चर बैंक, लिबर्टी इनर्जी, जनरल इन्स्योरेन्स, सानिमा जनरल इन्स्योरेन्स, माउण्टेन इनर्जी, युनाइटेड इदीमार्दी हाइड्रो, प्रभु लाइफ इन्स्योरेन्स, चन्द्रागिरि हिल्स, महिला लघुवित्त, जीवन विकास लघुवित्त, स्मार्ट लघुवित्त र युनियन लाइफ इन्स्योरेन्सले चालु आर्थिक वर्षमा प्राथमिक शेयर निस्कासन गरेका थिए ।

चालु आर्थिक वर्षमा आईपीओ बिक्री गरेका कम्पनीमध्ये नेपाल इन्फ्रास्ट्रक्चर बैंकले सबैभन्दा धेरै ८ अर्ब बराबरको साधारण शेयर बिक्री गरेको थियो । सो कम्पनीको आईपीओ ५० कित्तासम्म माग गर्ने जति सबैलाई मागबराबरकै आईपीओ परेको थियो । ६० कित्ताभन्दा बढी माग गर्नेमध्ये केहीलाई ६० कित्ताका दरले शेयर परेको थियो ।