विराटचोकः हरैंचा कोभिड अस्पतालका लागि स्वास्थ्य सामग्री प्रदान गरिएको छ । नगरपालिकाले प्राथमिक स्वास्थ्य केन्द्र हरैंचालाई कोभिड अस्पताल बनाउने निर्णय गरेसँगै ३ जना मेडिकल अफिसर, १ जना रेडियोलोजिष्ट र १ जना स्टाफ नर्स नियुक्त गरिसकेको छ ।
विश्व स्वास्थ्य संगठनको मोडलमा सञ्चालन गर्नका लागि नगरपलिकाले डा. सूर्यप्रसाद पराजुलीलाई विज्ञको रुपमा राखेर कोभिड अस्पताल सञ्चालनको अन्तिम तयारीमा पुगेको नगरपालिकाका प्रमुख प्रशासकीय अधिकृत डा. कृष्णबहादुर घिमिरेले बताए ।
अस्पताललाई द्रुुत गतिमा चाँडै सञ्चालन गर्न नगरपालिकाले स्वास्थ्य सामग्री खरीद प्रक्रिया अघि बढाएको र संरचना बनाउने काम भइरहेको डा. घिमिरेले बताए । अस्पताल सञ्चालन गर्न आवश्यक पर्ने यन्त्र र औजार आइतबार ग्रहण गरेको हो । नगरले आगामी साउन १ गतेबाट अस्पताल सञ्चालनमा ल्याउने गरी तयारी भइरहेको बताइएको छ । अस्पताल सञ्चालनमा सहयोग पुगोस् भनेर नागरिक स्वाबलम्बन विकास नेपालले नगरपालिकालाई करीब ९ लाख ५२ हजार रुपैयाँबराबरको स्वास्थ्य सामग्री हस्तान्तरण गरेको हो ।
संस्थाले हाइफो क्यानुला, टियुफिइ बोर्ड, वामा बेड, फोटो थेरापी मेसिन, अक्सिजन हुक, सिरिन्ज पम्फ मोनिटर, इन्फियुजन मोबिलेटर १ सेट लगायतका सामग्री प्रदान गरेको संस्थाकी अध्यक्ष डा. बिनिता पौडेलले बताइन् । पौडेल पूर्वाञ्चल विश्वविद्यालयको जनस्वास्थ्य विभागकी सहप्राध्यापक हुन् । नगरपालिकाको सभाहलमा आयोजित सामग्री हस्तान्तरण कार्यक्रममा प्रमुख प्रशासकीय अधिकृत डा. घिमिरे, वडा नम्बर १२ का अध्यक्ष रोशनप्रसाद ढकाल, स्वास्थ्य शाखा प्रमुख मचिन्द्र बस्नेत लगायतको उपस्थिति रहेको थियो ।
बच्चाको लाइभ सेभिङ मेसिनले बच्चाको लागि आईसीयुसरहको उपचार गर्न मिल्ने भएकाले अन्य समयमा समेत यो सामग्रीको प्रयोग गर्न सकिने डा. पौडेलले बताइन् ।
You must be logged in to post a comment Login