इटहरीः इटहरी उपमहानगरपालिकाको पहिलो वडा कार्यालय भवन निर्माणअन्तर्गत वडा नम्बर २ को कार्यालय भवन उद्घाटन गरिएको छ । उद्घाटन कार्यक्रममा बोल्दै कार्यक्रमका प्रमुख अतिथि इटहरी उपमहानगरपालिकाका प्रमुख द्धारिकलाल चौधरीले आफ्नो कार्यकालमा इटहरीका सबै मूलबाटा कालोपत्रे गर्न नसके राजनीतिबाटै सन्यास लिने बताएका छन् ।
प्रमुख चौधरीले वहुवर्षे योजनाअन्तर्गत धेरै योजना सञ्चालनमा रहेको बताए । केही योजना निर्माण भइसकेका र चालु आर्थिक वर्षमा ६० वटा योजनाको टेण्डर भइसकेको पनि उनले बताए । प्रमुख चौधरीले इटहरी उपमहानगरपालिकाले पूर्वाधार निर्माणमा फड्को मारेको पनि बताए ।
उद्घाटन कार्यक्रममा बोल्दै इटहरी उपमहानगरकी उपमेयर लक्ष्मी गौतमले यो कार्यकाल पूर्वाधार निर्माणमा कोशेढुङ्गा साबित हुने बताए । उपमहानगरपालिकाले पूर्वाधार निर्माणलाई प्राथमिकता दिएको उनको भनाइ थियो । उपमेयर गौतमले वडा कार्यालय भवनहरुको निर्माण, प्रत्येक वडामा आधारभूत स्वास्थ्य इकाई भवन निर्माण, वहुबर्षे योजनाअन्तर्गत गाउँगाउँका मूलबाटोहरु कालोपत्रे भएको उनको भनाइ थियो ।
सब इन्जिनियर खेमकुमार श्रेष्ठका अनुसार दुई तले वडा कार्यालय भवन १ करोड १७ लाख ६० हजार रुपैयाँको लागतमा बनेको हो । मंगलबार नै उद्घाटन गरिएको आधारभूत स्वास्थ्य इकाई भवन ४९ लाख ९७ हजारमा निर्माण भएको बताइएको छ ।
वडा नम्वर २ का अध्यक्ष हर्क मगरले वडा नम्बर २ पारदर्शिताका सम्बन्धमा ऐनाबराबर रहेको बताए । कार्यक्रममा कार्यपालिका सदस्य गंगा गुरुड, स्थानीय फूलराज सुवेदी, जग्गादाता सुन्दरदेवी मन्दिर काव्यवाटिकाकी अध्यक्ष पुण्यप्रभा गुरागाईँ र जसपा वडा नम्बर २ अध्यक्ष दुर्गा गुरुडले आफ्नै कार्यालय भवन भएपछि जनतालाई वडाबाट सेवा लिन सहज भएको बताए ।
You must be logged in to post a comment Login