विराटनगरः १ नम्बर प्रदेश प्रहरी कार्यालयले गत आर्थिक वर्षमा ७ हजार ३ सय ८४ मुद्दा दर्ता गर्नुका साथै ४० करोड रुपैयाँभन्दा बढी राजस्व संकलन भएको जनाएको छ । संगठन प्रमुखको निर्देशनलाई पालना गर्ने र गराउने तर्फ विशेष ध्यान दिइएकाले सो सफलता हासिल भएको कार्यालयले जनाएको छ ।
विभिन्न अपराधमा सजाय तथा जरिवाना तोकिएपछि फरार रहदै आएका ७ सय ४३ जना फरार प्रतिवादी गत आर्थिक वर्षमा पक्राउ गरी ७ सय ३५ वर्ष कैद भुक्तान भई ४ करोड ४३ लाख ५८ हजार ९ सय २७ रुपैयाँ राजस्व संकलन भएको कार्यालयले जनाएको छ ।
लागूऔषध नियन्त्रणतर्फ विशेष ध्यान दिई व्यापक रुपमा प्रहरी परिचालन गर्दा ३ हजार ५ सय १६ ग्राम ब्राउन सुगर र १ हजार ७ सय ८९ दशमलव १११ केजी गाँजा बरामद भएको जनाइएको छ ।
कार्यालयका अनुसार विभिन्न मनोद्दीपक क्याप्सुल ५० हजार २ सय ५५ ट्याब्लेट बरामद हुनुका सार्थ मनोद्दीपक सुई १० हजार ३ सय ५८ एम्पुल बरामद भएको बताइएको छ । अन्य बिभिन्न किसिमका मनोद्दीपक औषधीहरु २ हजार ४ सय ८३ ट्याब्लेट बरामद भएको कार्यालयले जनाएको छ ।
यसैगरी, २ हजार ४ सय २३ रोपनीमा लगाएको गाँजा खेती फँडानी गरी ८ लाख ७६ हजार ८ सय ६३ वटा गाँजाका बोट नष्ट गरिएको छ । अवैध रुपमा सामान चोरी निकासी गर्ने १ सय ९० जना मानिस पक्राउ गर्नुका साथै १९ करोड १ लाख ५८ हजार २ सय १२ रुपैयाँ राजस्व संकलन भएको बताइएको छ ।
यस्तै, नदीजन्य पदार्थको अबैध रुपमा दोहन गर्ने १ सय ७० जना मानिस र ७ सय ८५ वटा सवारी साधनलाई नियन्त्रणमा लिनुका साथै ६५ लाख ७५ हजार ३ सय रुपैयाँ राजस्व संकलन भएको छ । यसैगरी, अवैध काठ चोरी निकासी गर्ने ७० जना मानिस पक्राउ गर्नुका साथै ३ हजार २ सय ६१ क्युफिट. काठ बरामद गरी ७० लाख ३८ हजार ७ सय ८७ रुपैयाँ राजस्व संकलन भएको छ ।
यसैगरी, ट्राफिक व्यवस्थापनतर्फ ट्राफिक नियम उल्लङ्घन गर्ने २ लाख ५४ हजार ३ सय ९४ वटा सवारी साधनलाई कारवाही गर्दा १५ करोड ९७ लाख ११ हजार राजस्व संकलन भएको छ । गत आर्थिक वर्षमा ७ हजार ३ सय ८४ मुद्दा दर्ता भई ४० करोड ७८ लाख ४२ हजार ३ सय १७ रुपैयाँ राजस्व संकलन भएको कार्यालयले जनाएको छ ।
You must be logged in to post a comment Login