विराटचोकः सरकारले चालु आर्थिक वर्षको बजेट भाषणमार्फत् अल्पकालीन र दीर्घकालीन लगानीकर्तालाई फरक–फरक दरमा पूँजीगत लाभकर लिने व्यवस्था गरेको छ । नयाँ व्यवस्था अनुसार १ वर्षभन्दा कम अवधिको लगानीलाई ७.५०% र १ वर्ष भन्दा बढी अवधिको लगानीलाई ५% लाभकर लाग्ने छ ।

धितोपत्रको लागतको भारित औसतका साथै आफ्नो हितग्राही खातामा रहेको शेयरको समयावधि गणना गर्न मेरो शेयरमा ‘माइ होल्डिङ्स’ नामक नयाँ सेवा थपिएको छ ।

निम्न प्रक्रिया पूरा गरी आफ्नो शेयर अल्पकालीन हो या दीर्घकालीन हो भनेर छुट्याउन सकिन्छ । शेयर बेचेपछि इडीआईएस गर्दा मात्रै सो सेवा प्रयोग गर्न मिल्ने बनाइएको छ । जसका लागि निम्न प्रक्रिया पूरा गर्नुपर्छ ।

१) आफ्नो स्वामित्वमा रहेको धितोपत्रको स्वामित्व अवधि गणना गर्नका लागि ‘माइ पर्चेज सोर्स’ अप्सनमा क्लिक गर्नुहोस् र त्यसभित्र रहेको ‘माइ होल्डिङ्स’ मा क्लिक गर्नुुहोस् ।

२) ‘माइ होल्डिङ्स’ मा आफूले बिक्री गरेको प्रत्येक शेयर छनोट गरी ‘सर्च’ बटन थिच्नुहोस् ।

३) सर्च गरिसकेपछि आफ्नो स्वामित्वमा रहेको शेयर संख्या बराबरको कारोबार विवरण देखिन्छ । त्यसमा सिस्टमले ३६५ दिनभन्दा पुरानो शेयरलाई दीर्घकालीन (लङ टर्म) मानेर ‘एलटी’ र ३६५ दिनभन्दा कम अवधिको शेयरलाई अल्पकालीन (सर्ट टर्म) मानेर ‘एसटी’ संकेत देखाउँछ । यस सिस्टममा रहेको सबै शेयरलाई सेलेक्ट गरी ‘प्रोसिड’ बटन क्लिक गर्नुपर्दछ ।

४) सिस्टमले दिएको विवरण अनुसारको होल्डिङ अवधिमा असहमति भएमा ‘युजर डिफाइन्ड होल्डिङ डेज’ अप्सन मार्फत् आफैं विवरण पेश गर्न सकिनेछ । तर, ‘रिमार्कस्’ मा आफूले होल्ड गरेको वास्तविक समयावधिको प्रमाण पेश गर्नुपर्दछ । त्यसपछि ‘प्रोसिड’ बटन थिच्नुपर्दछ ।

५) यदि आफ्नो स्वामित्वमा रहेको शेयर मर्जर एक्विजिसनमा गएको कारण कर छुट हुने समयावधिमा छ भने ‘युजर डिफाइन्ड मर्जर फ्लाग’ सेलेक्ट गरी ‘रिमाकर््स्’ मा खुलाउनुपर्दछ । त्यसपछि ‘प्रोसिड’ बटन थिच्नुपर्छ ।

६) त्यसपछि चेकबक्समा सेलेक्ट गरी अपडेट बटनमा क्लिक गरेपछि आफ्नो शेयर अल्पकालीन या दीर्घकालीन के हो भन्ने छुट्टिन्छ ।
७) आफ्नो स्वामित्वमा रहेको शेयरको समयावधि विभाजन गरिसकेपछि पुनः ‘माइ इडीआइएस’ मा क्लिक गरी ‘ट्रान्सफर शेयर’ मा क्लिक गर्नुपर्छ ।

८) त्यसपछि, सेटलमेन्ट आइडीसँगै रहेको भ्यु डिटेल्समा क्लिक गरी बिक्री कारोबारलाई सेलेक्ट गरी प्रोसिड गरेपछि यो प्रक्रिया पूरा हुन्छ । त्यसपछि इडीआइएसका लागि निश्चित गरेपछि आफ्नो खातामा रहेको शेयर ब्रोकरको खातामा जान्छ ।