विराटचोकः नेपाली कांग्रेसका सांसद रमेशजंग रायमाझीले एमाले अध्यक्ष केपी ओलीलाई ‘भ्रष्टाचारको राजनेता’को संज्ञा दिएका छन् । राष्ट्रिय सभाको बैठकमा बोल्दै उनले यस्तो बताएका हुन् ।
‘संसद विघटन गरेर संसद समाप्त गर्ने महानायक, भ्रष्टाचारका महानायकले त्यो कदम चालेपछि सांसदहरु बाध्य हुनुभयो नयाँ सरकार बनाउन । यो अवस्था कसले ल्यायो ? हामीले ल्याएको हो ?’ उनले भने, ‘अर्बौं रुपैयाँको भ्रष्टाचारमा संलग्न सरकारका प्रधानमन्त्री, अनि राजनेता र भ्रष्टाचारी राजनेता भन्नुस् स्वीकार्न तयार छु । भ्रष्टाचारको नाइके भन्नुस्, स्वीकार्न तयार हुन्छु । भ्रष्टाचारीलाई राजनेता भन्ने ?’
उनले सामन्त गोयललाई रातारात बालुवाटार छिराउने ओली राष्ट्रवादी हुन नसक्ने बताए । कांग्रेस ‘कुहिराको काग’ भएको भन्दै माओवादीको वैशाखी खोजिरहेको भनी टिप्पणी गर्ने नेकपा एमालेका सांसद खिमलाल देवकोटाको भनाइप्रति टिप्पणी गर्दै उनले कांग्रेसको चिन्ता अरु दलले नलिन अनुरोध गरे ।
‘नेपाली कांग्रेसको चिन्ता अन्य पार्टीले गर्दै गरेको देख्दा नेपाली कांग्रेसमा प्रवेश गर्ने जमर्को गर्दै हुनुहन्छ कि जस्तो लागिरहेको छ,’ सदनमा आफ्नो भनाइ राख्ने क्रमको शुरुमै उनले भने, ‘होइन भने हाम्रो पार्टी, हाम्रो नेताको चिन्ता हामी गर्छौं । तपाईंहरु आफ्नै पार्टीको चिन्ता गर्नुस् ।’ उनले भने ।
रातारात माओवादीसँग एकता गरेर एमाले सरकारमा पुगेको र कुनै नेतालाई थाहै नदिई केपी ओलीले प्रचण्डलाई बोलाएर एकता गरेको उनको भनाइ थियो । त्यो एकतालाई कायम राख्न नसक्नेले अहिले आएर कांग्रेसलाई उपदेश दिन नसुहाउने उनले जनाए ।
कम्युनिस्टहरुलाई एक बनाउनसमेत कांग्रेसले भूमिका खेलेको उनको भनाइ थियो । ओली नेतृत्वको सरकारले कोरोना महामारीका बेला स्वास्थ्य सामग्रीमा पनि भ्रष्टाचार गरेको भन्दै सो सामग्री खरीदको छानबिन गर्नुपर्ने रायमाझीले माग गरे ।
You must be logged in to post a comment Login