इटहरीः इटहरीको इतिहास समेटेर लेखिएको तथा सम्पादन गरेको पुस्तक ‘इतिहासमा इटहरी’ आज विमोचन गरिएको छ । नेप्ली मिडिया प्रालिले प्रकाशन गरेको सो पुस्तक इटहरीमा एक कार्यक्रमकाबीच विमोचन गरिएको हो ।

इटहरीका पहिलो मन्त्री रामकुमार सुब्बा, पहिलो मेयर तथा वर्तमान प्रदेश सांसद सर्वध्वज साँवा, वर्तमान मेयर द्वारिकालाल चौधरी, इटहरीका पहिलो फिल्म निर्माता तथा जग्गादाता हेमनारायण चौधरी र इटहरीका पहिलो स्कुल सञ्चालक डेबिट सुब्बाले संयुक्त रुपमा सो पुस्तक विमोचन गरेका हुन् ।

सो पुस्तकमा इटहरीको कला, संगीत, साहित्य, व्यापार, शिक्षा, स्वास्थ्य, खेलकुदलगायत विभिन्न विषयको इतिहासका साथै वर्तमान अवस्था र भावी सम्भावनासमेत समेटिएको पुस्तकका सङ्कलक, सम्पादक हिमाल दाहालले बताए । कार्यक्रममा लामो समयदेखि इटहरीको इतिहासलाई उजागर गर्ने, अभिलेखन गर्ने र विभिन्न समयमा प्रकाशन गर्ने कार्यमा सक्रिय रहेको भन्दै इटहरीका अग्रज पत्रकार कृष्णविनोद लम्साल, पत्रकार तथा राजनीतिज्ञ रमेश विष्ट र संगीतकर्मी तथा सामाजिक अभियानकर्मी राजु केसीलाई सम्मान गरिएको थियो ।

कार्यक्रममा बोल्दै पूर्वमन्त्री सुब्बाले सो पुस्तक इटहरीको लागि अमूल्य सम्पदा भएको बताए ।

इटहरीका पूर्वमेयर साँवाले इटहरीको लागि महत्वपूर्ण पुस्तक प्रकाशन भएको र यसले धेरै विषय समेटेको बताए ।

इटहरीका मेयर द्वारिकलाल चौधरीले इटहरीको निर्माणमा सबैको योगदान रहेको बताउँदै इटहरीका विभिन्न स्थानहरुको नामंकरणबारे चर्चा गरे । चौधरीले ‘इटहरीले ठूलो बौद्धिक सम्पत्ति’ प्राप्त गरेको प्रतिक्रिया दिए ।

पुस्तकका सङ्कलक तथा सम्पादक दाहालले पाँच वर्षको तयारीमा पुस्तक प्रकाशन भएको जानकारी दिए । पुस्तकमा भएका कमीकमजोरीलाई सच्याएर अर्को संस्करण प्रकाशन गर्ने उनले जानकारी दिए ।

सो पुस्तकमा १ सय २५ जनाभन्दा बढी अग्रज इटहरीवासीको अनुभव, ४ सय २५ वटा भन्दा बढी तस्बीर, नक्सा, स्केच तथा दस्तावेजहरु र दुई सयभन्दा बढी व्यक्ति तथा संस्थाहरुको सहयोग रहेको नेप्ली मिडियाका सञ्चालक दाहालले बताए ।