विराटचोकः नेपाली कांग्रेसको आसन्न महाधिवेशनमा उम्मेदवार हुन चाहनेहरुले न्यूनतम एक सय रुपैयाँदेखि अधिकतम ३० हजार रुपैयाँसम्म उम्मेदवारी शुल्क तिरेर उम्मेद्वार हुन पाउने भएका छन् ।

कांग्रेसको निर्वाचन निर्देशिकामा उल्लेख भए अनुसार केन्द्रीय सभापतिका उम्मेदवारले ३० हजार रुपैयाँ उम्मेदवारी शुल्क तिर्नुपर्ने छ । केन्द्रीय उपसभापति र महामन्त्रीको उम्मेदवार बन्नका लागि २५ हजार र सहमहामन्त्रीका लागि २० हजार रुपैयाँ शुल्क तिर्नु पर्नेछ । केन्द्रीय सदस्य पदको निर्वाचनमा भाग लिन १० हजार रुपैयाँ शुल्क तोकिएको छ ।

यस्तै प्रदेश महाधिवेशन प्रतिनिधिका लागि ३ हजार, केन्द्रीय महाधिवेशन प्रतिनिधिका लागि ५ हजार र केन्द्रीय महासमिति सदस्य पदको निर्वाचनका लागि ७ हजार रुपैयाँ शुल्क लाग्ने निर्वाचन निर्देशिकामा उल्लेख छ ।

प्रदेश सभापति पदका लागि १५ हजार, उपसभापति, महामन्त्री र सहमहामन्त्री उम्मेदवारले ११ हजार र सदस्यका लागि पाँच हजार शुल्क तोकिएको छ । जिल्ला कार्यसमितिको सभापतिको उम्मेदवार बन्न १० हजार, उपसभापति र सचिवका लागि ७ हजार, सहसचिवका लागि ६ हजार र सदस्यका लागि ३ हजार शुल्क तोकिएको छ ।

वडा सभापति पदका लागि ५ सय, उपसभापति, सचिव र सहसचिवका लागि ३ सय, प्रदेश सभा क्षेत्रीय प्रतिनिधिका लागि ५ सय र सदस्य पदको लागि १ सय रुपैयाँ शुल्क तोकिएको छ ।

गाउँपालिकाको सभापतिको उम्मेद्वार हुने २ हजार, उपसभापति, सचिव र सहसचिवका लागि १ हजार र सदस्यको निर्वाचनका लागि ५ सय शुल्क लाग्नेछ ।

नगरपालिकाको सभापतिको उम्मेदवार हुन ४ हजार, उपसभापति र सचिवका लागि ३ हजार, सहसचिवका लागि २ हजार र सदस्यका लागि १ हजार शुल्क तोकिएको छ । यस्तै महानगरपालिका र उपमहानगरपालिकाको सभापति पदको निर्वाचनका लागि ५ हजार, उपसभापति र सचिवलाई ३ हजार, सहसचिव र सदस्यलाई २ हजार शुल्क तोकिएको छ ।

प्रदेश सभाको क्षेत्रीय सभापतिले ५ हजार, उपसभापति र सचिवले ३ हजार, सहसचिवले २ हजार ५ सय र सदस्यले २ हजार शुल्क तिर्नुपर्ने बताइएको छ ।