पथरीः मोरङको पथरीशनिश्चरेमा रहेको पथरी उद्योग वाणिज्य संघमा धनकुमार तामाङको नेतृत्वमा नयाँ कार्यसमिति निर्वाचित भएको छ । सोमबार भएको निर्वाचनमा जम्मा खसेको मत १ हजार ४ सय ५८ मध्ये तामाङले ७ सय ८ मत पाए । उनका प्रतिष्पर्धी दीपक बस्नेतले ६ सय ६८ मत पाए । तामाङ संयुक्त गठबन्धनका तर्फबाट साझा प्यानलका उम्मेद्वार थिए भने बस्नेत नेकपा एमालेको तर्फबाट उम्मेद्वार बनेका थिए ।

त्यस्तै, वरिष्ठ उपाध्यक्षमा यादव दुलालले ७ सय ६१ मत ल्याएर गठबन्धनतर्फका उम्मेद्वार ओमप्रसाद लिम्बूलाई पराजित गरे । लिम्बूले ५ सय ६४ मत पाए ।

उपाध्यक्षमा आशा राईले ७ सय ५५ मत ल्याउँदा प्रतिष्पर्धी रविन राईले ५ सय ९४ मत प्राप्त गरे । विजयी राईलाई एमालेको समर्थन रहेको थियो ।

महासचिवमा संयुक्त गठबन्धनका तर्फबाट उम्मेद्वार बनेका राजेन्द्र बस्नेतले ७ सय ६० मत ल्याएर विजयी भए । प्रतिद्वन्द्वी अशोक साम्पाङले ५ सय ८७ मत ल्याए ।
वाणिज्य सचिवमा एमालेका तर्फबाट उम्मेद्वार बनेका ईश्वरी सापकोटा ५ सय ५७ मत ल्याएर विजयी भए । उनका प्रतिष्पर्धीहरु खेमनाथ ढुङ्गेलले ४ सय ५३ र टुङकुमार श्रेष्ठले २ सय ७१ मत ल्याए । श्रेष्ठ स्वतन्त्र उम्मेद्वार थिए भने ढुङ्गेल गठबन्धनबाट उम्मेद्वार बनेका थिए ।

उद्योग सचिव पदमा प्रेम प्रसाद सुवेदीले ६ सय ७० र मानबहादुर श्रेष्ठले ६ सय ४५ मत ल्याए । विजयी सुवेदी गठबन्धन प्यानलबाट उम्मेद्वार बनेका थिए ।

कोषाध्यक्ष पदमा विजयजंग बस्नेतले ७ सय ६२ र उद्दवराज बस्नेतले ५ सय ४० मत ल्याए । निर्वाचनमा सर्वाधिक २ सय २२ मतले पराजित गरेका बस्नेत गठबन्धन प्यानलबाट उम्मेद्वार रहेका थिए ।

४ जना विजयी हुने खुला सदस्यहरुमा गठबन्धन तर्फबाट उम्मेद्वार रहेका तुलसी लुनिया ६ सय ११ तथा इन्द्रबहादुर राई ६ सय ५६ मतका साथ विजयी भए । एमालेका तर्फबाट उम्मेद्वार बनेका नीलम बस्नेत ७ सय २१ मत र हरिराज प्याकुरेल ६ सय ३ मत ल्याए विजयी भए । लुनिया पथरी उद्योग वाणिज्य संघका सबैभन्दा कान्छा उम्मेद्वार हुन् ।

अन्य सदस्यहरु खेमराज निरौलाले ५ सय ६८, दुर्गाराज खत्रीले ४ सय ३१, पृथ्वी आलेमगरले ५ सय १२ र बलिदान चेम्जोङले ५ सय ७१ मत प्राप्त गरे । मगर र चेम्जोङ गठबन्धन समूहका उम्मेद्वार थिए भने निरौला र खत्री एमाले समर्थित उम्मेद्वार थिए ।

२ जना निर्वाचित हुने महिला सदस्यहरुमा एमाले पक्षबाट ८ सय ६१ मतसहित देवी राई र संयुक्त प्यानलबाट ६ सय ७७ मतसहित जुनी थपलिया विजयी भए । मीता राईले ५ सय २५ र साझा प्यानलबाट मुना पाण्डेले ४ सय १३ मत ल्याए ।

उता, लेखा संयोजकमा ७ सय २५ मत ल्याएर कृष्णप्रसाद भट्टराई निर्वाचित भए । उनका प्रतिष्पर्धी गठबन्धन प्यानलका चन्द्रप्रसाद सापकोटाले ५ सय ११ मत ल्याए । लेखा सदस्यहरुमा गठबन्धन प्यानलका प्रदीप पराजुलीले ६ सय ८७ र संस्थापन पक्षका एल्सन बास्तोलले ६ सय ४० मत ल्याएर विजयी भए । गठबन्धन प्यानलका सन्तवीर विश्वकर्मा र एमालेका कृष्णबहादुर श्रेष्ठले समान ५ सय ७१ मत ल्याए ।

अध्यक्ष, महासचिव, कोषाध्यक्ष, उद्योग सचिव जस्ता मुख्य पद सहित ८ पदमा गठबन्धन प्यानलबाट निर्वाचित भएका छन् । वरिष्ठ उपाध्यक्ष, उपाध्यक्ष, वाणिज्य सचिव, लेखा संयोजक सहित ८ पदमा भने गठबन्धन प्यानलका उम्मेद्वार पराजित भएका छन् ।