विराटचोकः सुन्दरहरैंचा नगरपालिकाले आफूहरुलाई उपेक्षा गरेको आरोप सुन्दरहरैंचाका बालबालिकाले लगाएका छन् । राष्ट्रिय बाल दिवसको अवसरमा आज आयोजित कार्यक्रममा आफ्नो धारणा राख्ने बालबालिकाहरुले यस्तो आरोप लगाएका हुन् ।
अरु बेला नगरपालिकाले उपेक्षा गरे पनि बाल दिवसको अवसरमा आयोजित कार्यक्रममा उपेक्षा हुँदैन भन्ने अनुमान गरे पनि मेयर, उपमेयर तथा अधिकांश वडाध्यक्षहरु कार्यक्रममा उपस्थित नभएर आफूहरुलाई खिसी गरेजस्तो लागेको उनीहरुले बताए ।
‘जनप्रतिनिधि र बालबालिकाबीच अन्तरक्रिया तथा सवालजवाफ’ शीर्षकमा भएको कार्यक्रममा जनप्रतिनिधि नै उपस्थित नभएपछि बालबालिकाले गुनासो गरेका हुन् । कार्यक्रममा सुन्दरहरैंचा नगरपालिकाको वडा नम्बर ४ का अध्यक्ष शैलेन्द्र श्रेष्ठ र वडा नम्बर ७ का अध्यक्ष चैतन्यप्रसाद सिटौला सहभागी थिए । त्यस्तै, वडा नम्बर २ का सदस्य झरिलाल चौधरी, वडा नम्बर ४ की सदस्य दुर्गा चौधरी र वडा नम्बर ५ की सदस्य संगीता सापकोटा पनि उपस्थित थिए । अन्य जनप्रतिनिधि भने उपस्थित थिएनन् ।
नगर बाल सञ्जाल सुन्दरहरैंचाका अध्यक्ष मदन भण्डारीका अनुसार मेयर, उपमेयर तथा सबै वडाध्यक्षलाई कार्यक्रममा सहभागी भएर बालबालिकाले राखेका जिज्ञासा सुन्न र सल्लाह सुझाव दिन निमन्त्रणा गरिएको थियो । वडाध्यक्ष आउन नभ्याउँदा वडा सदस्यलाई प्रतिनिधिको रुपमा पठाउन अनुरोध गरिएको थियो ।
वडा नम्बर ४ का जनप्रतिनिधि केही समय कार्यक्रममा बसेर हिँडेका थिए भने केही ढिलो कार्यक्रममा पुगेका वडा नम्बर ७ का अध्यक्ष कार्यक्रमको अन्तिम समयसम्म बसेर बालबालिकाले राखेका प्रश्नको नगरपालिकाको तर्फबाट जवाफ दिएका थिए । वडा नम्बर २ र वडा नम्बर ५ का वडा सदस्य पनि कार्यक्रम अवधिभर बसेर बालबालिकाको जिज्ञासाका जवाफ दिएका थिए ।
कार्यक्रमका प्रमुख अतिथि सुन्दरहरैंचा नगरपालिकाका प्रमुख शिवप्रसाद ढकाल कार्यक्रममा अनुपस्थित भएपछि विशिष्ट अतिथि प्रमुख प्रशासकीय अधिकृत डा. कृष्णबहादुर घिमिरेले गमलामा पानी हालेर कार्यक्रमको उद्घाटन गरेका थिए ।
डा. घिमिरे पनि कार्यक्रममा लामो समय बसेका थिएनन् । सोमबार र मंगलबार वडाका कर्मचारीलाई तालीम दिइएकाले ती दुई दिन वडाबाट हुने सेवा प्रवाह नभएपछि आज सेवाग्राहीको अधिक चाप भएकाले आफू आउन केही ढिलो भएको बताएका वडा नम्बर ७ का अध्यक्ष सिटौला भने कार्यक्रममा बसेर सहभागीले उठाएका प्रश्नको जवाफ दिएका थिए ।
नगरपालिका र वडासँग सम्बन्धित प्रश्नको जवाफ जनप्रतिनिधिहरु सिटौला, चौधरी र सापकोटाले दिएका थिए । कार्यक्रममा उपस्थित मनोविमर्शकर्ता सुशीला पाठकले मनोविज्ञानसँग सम्बन्धित प्रश्नको जवाफ दिएकी थिइन् । नयाँ वृन्दावन गौशालाका संस्थापक संरक्षक दीनबन्धु शास्त्रीले धर्म र समाजसँग सम्बन्धित प्रश्नको जवाफ दिएका थिए । बालबालिकाले उठाएका स्वास्थ्यसँग सम्बन्धित प्रश्नको जवाफ सुन्दरपुर स्वास्थ्य चौकीका प्रमुख रमेश गौतमले दिएका थिए ।
बालबालिकाहरुले नगरपालिकाले बालबालिकाको क्षेत्रमा कम बजेट विनियोजन गर्नुको कारण सोधेका थिए । त्यस्तै, नगरपालिकामा बालबालिकासँग सम्बन्धित छुट्टै शाखा हुनुपर्ने, भौतिक विकासलाई मात्र नहेरी बालबालिकाको मानसिक विकास गर्ने खालका कार्यक्रममा पनि बजेट छुट्याउनुपर्ने माग गरेका थिए ।
सञ्चारमाध्यमले नकारात्मक समाचारलाई प्राथमिकता दिने गरेको तर बालबालिकाका सकारात्मक समाचारलाई बेवास्ता गर्ने गरेको उनीहरुको भनाइ थियो । बालबालिकाको प्रतिभा प्रस्फुटनको लागि ठाउँ नदिएको र प्रतिभावान बालबालिकाको सफलतको कथालाई सञ्चारमाध्यमले उपेक्षा गर्ने गरेको उनीहरुको गुनासो थियो ।
निजी विद्यालयमा पढ्ने बालबालिकाको लागि मात्रै नगरपालिकाले बजेट छुटयाउने गरेकोमा पनि उनीहरुको गुनासो थियो ।
शिवहाङ राईले सहजीकरण गरेको कार्यक्रम नगर बाल सञ्जाल सुन्दरहरैंचाका अध्यक्ष मदन भण्डारीको अध्यक्षतामा भएको थियो ।
You must be logged in to post a comment Login