विराटचोकः माछापुच्छ्रे बैंक लिमिटेडका कर्मचारीको संस्था माछापुच्छ्रे बैंक कर्मचारी संघले मोरङको सुन्दरहरैंचा–७ मा रहेको पञ्चायत माविलाई १ थान स्मार्ट टिभी प्रदान गरेको छ ।

आज विद्यालयमा आयोजित कार्यक्रममा संघका केन्द्रीय अध्यक्ष विकास श्रेष्ठ, वंशीधर घिमिरे, संघको १ नम्बर प्रदेश प्रमुख दीपेन्द्र वाग्ले, उपप्रमुख मुकेश थापा, बैंकको विराटचोक शाखाका प्रबन्धक रमेश अधिकारीलगायतले स्मार्ट टिभी प्रदान गरेका हुन् ।

कार्यक्रमलाई सम्बोधन गर्दै पूर्व विद्यार्थी मञ्चका सदस्य तथा जनता बहुमुखी क्याम्पस इटहरीका सहायक क्याम्पस प्रमुख युवराज सिटौलाले शैक्षिक उन्नयनका लागि वित्तीय संस्थाले गरेको सहयोग सह्रानीय भएको बताए । वित्तीय गतिविधिका साथै यसरी शैक्षिक उन्नयनमा चासो दिने कार्यले बैंकप्रति सेवाग्राहीको सकारात्मक भाव अझै बढ्ने उनको भनाइ थियो ।

माछापुच्छ्रे बैंकको विराटचोक शाखाका प्रमुख रमेश अधिकारीले बैंकलाई शिक्षक र कर्मचारीले सेवा गर्ने मौका दिइरहनुभएको बताए । आगामी दिनमा पारस्परिक सहयोग थपिँदै जाने अपेक्षा गरिएको उनको भनाइ थियो ।

बैंकको कर्मचारी संघका प्रदेश उपप्रमुख मुकेश थापाले प्रत्येक वर्ष संघको वार्षिक उत्सवमा सामाजिक सेवाअन्तर्गत सहयोग गर्ने गरिएको बताए । सामुदायिक विद्यालयमा, चेपाङ बस्तीमा सहयोग गर्नुको साथै दैवी प्रकोपमा परेका मानिसलाई सहयोग गर्ने गरिएको उनले जानकारी दिए । बैंकले शिक्षकहरुलाई क्रेडिट कार्ड निःशुल्क वितरण गर्ने तयारी गरेको पनि उनले जानकारी दिए ।

संघको प्रदेश नम्बर १ का प्रमुख दीपेन्द्र वाग्लेले डिजिटल शिक्षण सिकाइमा सहज होस् भनेर स्मार्ट टेलिभिजन विद्यालयलाई दिइएको बताए ।

विद्यालयका प्रधानाध्यापक खगेन्द्र रायमाझीले विद्यालयले प्राथमिकता क्रममा राखेको सामग्री नै संघले सहयोग गरेकोमा खुशी लागेको बताए । आगामी दिनमा खानेपानी लगायतका अन्य स्वास्थ्यसँग सम्बन्धित विषयमा संघले सहयोग गर्न अपेक्षा गरिएको उनको भनाइ थियो ।

कार्यक्रमका सभापति तथा संघका केन्द्रीय अध्यक्ष विकास श्रेष्ठले बैंकका कर्मचारीको कोषमा संकलित रकमबाट संघले देशभर सहयोग गर्ने गरेको जानकारी दिए । विद्यालयका साथै अनाथ आश्रम, वृद्धाश्रम, पिछडिएको बस्ती, बाढीपीडित, आगलागीपीडितलगायतलाई प्राथमिकताको क्रममा राखेर सहयोग गर्र्ने गरिएको उनको भनाइ थियो । विद्यालयको शैक्षिक गुणस्तर सुधार्न यस्ता सामग्रीले सहयोग पुग्ने अपेक्षा गरिएको उनले जनाए ।

कार्यक्रममा बैंकका विभिन्न तहका कर्मचारी, विद्यालयका शिक्षक, पूर्व विद्यार्थी मञ्चका सदस्यहरु, पूर्व प्रधानाध्यापक गुरुप्रसाद अधिकारी, विद्यालय व्यवस्थापन समितिका सदस्यहरुलगायतको उपस्थिति थियो ।

कार्यक्रमको सञ्चालन शिक्षक अम्बिकाप्रसाद सापकोटाले गरेका थिए ।

विद्यालयका तर्फबाट सहयोगी संस्थालाई सम्मानपत्र प्रदान गरिएको थियो ।