धरानः एम्स एकेडेमी धरानले कक्षा १२ को परीक्षा दिएका विद्यार्थीहरुको बिदाइ गरेको छ भने स्नातक तहमा अध्ययन गर्न आएका विद्यार्थीहरुलाई स्वागत गरेको छ ।
एकेडेमीले मंगलबार धरान– १९ स्थित ब्रिटिश कम्युनिटी हलमा एक कार्यक्रमको आयोजना गरी विद्यार्थीहरुको बिदाइ तथा स्वागत गरेको हो । एकेडेमीका अनुसार कक्षा १२ को परीक्षा दिएका २ सय भन्दा बढी विद्यार्थीहरुलाई बिदाइ गरिएको छ । यस्तै, बि.एड.आई.टि.पहिलो वर्ष अध्ययनको लागि भर्ना भएका विद्यार्थीहरुलाई स्वागत गरिएको प्राचार्य मित्र तामाङले जानकारी दिए ।
धरान–१२ स्थित एकेडेमीले यसै शैक्षिक सत्रदेखि स्नातक तहमा बि.एड.आइ.टि.शैक्षिक कार्यक्रम पनि शुरु गरेको हो । प्राचार्य तामाङले प्रविधिमैत्री शिक्षा अध्ययन गर्न विद्यार्थीहरुलाई आग्रह गर्दै प्रविधिमैत्री शिक्षा लिएमात्र अबको विश्वमा अस्तित्व रहन सक्ने बताए ।
हाल बिएड आइटि प्रथम वर्षमा अध्ययनरत विद्यार्थी सोनी चेम्जोङले भविष्यमा अवसर पाउने भएकोले आफूले सो विषय रोजेको बताइन् । उनले कलेजको शैक्षिक वातावरण विद्यार्थीमैत्री भएको र गुणस्तरीय भएको पनि धारणा व्यक्त गरिन् ।
बिदाइ भएकी १२ कक्षाकी विद्यार्थी एवं छैटौ मिस फ्रेसर पूर्णिमा दर्नालले शिक्षकहरुले आफ्नो साथीलाई जस्तै विद्यार्थीहरुलाई साथ, सहयोग गर्ने पाएको बताइन् ।
कार्यक्रममा एकेडेमीले विभिन्न संकायका उत्कृष्ट विद्यार्थीहरुलाई सम्मान गरेको थियो । व्यवस्थापनमा सुनिता दर्लामी मगर, सुजा राई, सजना पौडेल र सन्ध्या पौडेल उत्कृष्ट भएका छन् भने विज्ञान संकायमा हेमकुमार श्रेष्ठ र युवराज बस्नेत उत्कृष्ट भएका छन् । मानविकी संकायतर्फ सुजना तुलाधार र रिमा लिम्बू उत्कृष्ट भएका छन् भने शिक्षा संकायतर्फ राधिका अधिकारी र निरुता चर्मकार उत्कृष्ट भएका छन् ।
एकेडेमीले धरानका नृत्य गुरुद्धय मणिकुमार राई र नगेन्द्र राईलाई सम्मान गरेको छ । मणिकुमार राई हालै सम्पन्न भएको नृत्य कला प्रतिष्ठानको साधारणसभाबाट अध्यक्षमा चुनिएका छन् भने नगेन्द्र राई उपाध्यक्षमा चुनिएका छन् ।
You must be logged in to post a comment Login