विराटचोकः नेपाली कांग्रेसको हिजाे भएको नगर अधिवेशनबाट सुन्दरहरैंचा नगरपालिकाको सभापति पदमा भक्तिप्रसाद सिटौला विजयी भएका छन् ।

उनले १ सय ६९ मत ल्याए । उनका प्रतिष्पर्धी महेन्द्र धिमालले ६७ मत ल्याएका छन् ।

२०२८ सालमा साजीलाल माविमा नेपाल विद्यार्थी संघको सभापति भएर राजनीतिमा लागेका सिटौला २०४० सालमा पार्टीको क्रियाशील सदस्य भएका थिए । २०४५ सालमा सुन्दरदुलारीको पार्टी सचिव भएर उनले काम गरेका थिए ।

२०११ साल फागुन ९ मा तेह्रथुममा जन्मिएका उनी पार्टीको१२ औँ महाधिवेशनपछि नेपाली कांग्रेसको महासमिति सदस्य भएका थिए ।

निर्वाचित भएपछि संक्षिप्त प्रतिक्रिया दिँदै गलत काम कारवाहीको सधैँ विरोध गर्ने उनले बताए । पार्टीलाई सुदृढ, अनुशासित र एकताबद्ध बनाई आगामी निर्वाचनमा विजयको माला पहिर्याउने गरी काम गर्ने उनको भनाइ छ । महाधिवेशनमा आन्तरिक प्रतिष्पर्धामा २ समूह भएर महाधिवेशनमा लागे पनि महाधिवेशनपछि पार्टीका सबै समूहलाई एक बनाएर लैजाने उनले बताए ।

उनी खानेपानी, वन तथा विभिन्न सामाजिक संघसंस्थाको प्रमुख पदमा रहेर कार्यरत छन् ।

सिटौला नेपाली कांग्रेसको कोइराला समूहबाट उम्मेद्वार रहेका थिए । सिटौलालाई डा.सुनिल शर्मा, महासमिति सदस्य ललितबहादुर श्रेष्ठ, र देवु तामाङले समर्थन गरेका थिए ।

देउवा पक्षका उम्मेदवार धिमाललाई राष्ट्रिय सभा सदस्य रमेशजङ्ग रायमाझी, कांग्रेस मोरङका सहसचिव तथा सुन्दरहरैंचाका नगरप्रमुख शिवप्रसाद ढकाल, जिल्ला कोषाध्यक्ष गोपालबहादुर थापाले समर्थन गरेका थिए ।

उपसभापतिमा शिवनारायण चौधरी १ सय ५२ र रञ्जित कार्की १ सय ४८ मत ल्याएर विजयी भएका छन् । उनीहरु सिटौला प्यानलबाट उम्मेद्वार रहेका थिए । उपसभापतिमा धिमाल प्यानलका उम्मेद्वार बिन्दा दाहाल थापाले ८९ र अशेश्वर पेश्करले ६५ मत ल्याए ।

सचिव पदमा सिटौलाको प्यानलबाट उम्मेद्वारी दिएका होमनाथ पोख्रेलले १ सय ६८ र दिलीप थापाले १ सय ३३ मत ल्याएर विजयी भएका छन् । सो पदमा धिमाल प्यानलबाट उम्मेद्वारी दिएका सुमन ढकालले ९६ र लक्ष्मी केसी दाहालले ५१ मत ल्याएका छन् ।

सहसचिव पदमा टेकराज तिम्सिना र होमनाथ थापा (मिराज) निर्विरोध निर्वाचित भएका छन् ।

कांग्रेस नगर अधिवेशनः सुन्दरहरैंचामा नगर सहसचिव पदमा निर्विरोध निर्वाचित

मिक्लाजुङमा ६ गुणा बढी मत ल्याएर कांग्रेसको नगर सभापतिमा विजयी, यी हुन् मोरङका ६ पालिकामा विजयी हुनेहरु