विराटचोकः हिजो सुनसरी र संखुवासभामा भएका सवारी दुर्घटनामा २ जनाको मृत्यु भएको छ । दुर्घटनामा १ जना घाइते भएका छन् ।
१ नम्बर प्रदेश प्रहरी कार्यालयका अनुसार सुनसरीको दुहबी –३ पेट्रोल पम्प आगाडि कोशी राजमार्गमा ट्रकको ठक्करबाट मोटरसाइकल चालकको घटनास्थलमा नै मृत्यु भएको छ । मृत्यु हुनेमा मोरङको सुन्दरहरैंचा – ८ का ४५ वर्षीय लक्ष्मीप्रसाद लुइँटेल रहेका छन् ।
हिजो बेलुका ४ बजे विराटनरबाट इटहरीतर्फ आउँदै गरेको ग्यास बोक्ने भारतीय नम्बर प्लेट एनएल ०२ क्यु ०१३४ नम्बरको ट्रकले सोही दिशातर्फ आउँदै गरेको को १० प २६८१ नम्बरको मोटरसाईकललाई ठक्कर दिँदा लुइँटेलको घटनास्थलमा नै मृत्यु भएको थियो ।
ट्रक र ट्रक चालक भारतको बिहार बेबसराई बथौली पञ्चायत ७ का ३५ वर्षीय चन्दनकुमार ताती इलाका प्रहरी कार्यालय दुहबीको नियन्त्रणमा रहेका छन् । घटनाको बारेमा थप अनुसन्धान भइरहेको प्रहरीले जनाएको छ ।
उता, संखुवासभाको खाँदबारी – २ चेवास्कुल छेउ भित्री सडक खण्डमा ट्याक्टर दुर्घटना हुँदा चालकको मृत्यु भएको छ भने सहचालक घाइते भएका छन् । मृत्यु हुनेमा खाँदबारी – ५ लेलुवाका २५ वर्षीय मणि तामाङ रहेका छन् । घाइते भएका सहचालक सोही स्थानका १९ वर्षीय महेन्द्र तामाङको बीपी कोइराला स्वास्थ्य विज्ञान प्रतिष्ठान धरानमा उपचार भइरहेको छ ।
हिजो राती सवा ८ बजे चेवाबाट चारबरतर्फ जाँदै गरेको प्र १ ०२ ००३ त १२२४ नम्बरको खाली ट्याक्टर अनियन्त्रित भई सडकबाट अन्दाजी १५ मिटर तल खसी दुर्घटना भएको थियो । घटनाको जानकारी पाएलगत्तै प्रहरी चौकी मानेभन्ज्याङबाट प्रहरी टोली खटिई गई दुवै जना घाइतेलाई उपचारको लागि जिल्ला अस्पताल खाँदबारीमा पठाइएको थियो । गम्भीर चालकको जिल्ला अस्पताल खाँदबारीमा उपचारको क्रममा राती साढे १० बजे मृत्यु भएको थियो ।
ट्याक्टर घटनास्थलमा नै रहेको हुनाले निकाल्न पहल भइरहेको र घटनाको सम्बन्धमा कानुनी प्रक्रिया तथा अनुसन्धान भइरहेको प्रहरीले जनाएको छ ।
You must be logged in to post a comment Login