विराटचोकः नेपाली कांग्रेसको १४ औँ महाधिवेशनको माहोल तातेको छ । नेता, कार्यकर्ता आफ्नो नेतृत्व छान्न कम्मर कसेर लागि परेका छन् । वडा र गाउँ–नगरको महाधिवेशन सकिएको छ । अहिले क्षेत्र, जिल्ला र संघको नेतृत्व छान्ने तयारी भइरहेको छ ।

मोरङ क्षेत्र नम्बर ३ को सभापतिमा असल राजनीतिक छवि बनाएका युवा नेता राजेन्द्रप्रसाद ढकालले उमेद्वारी घोषणा गरेका छन् । २०५४ सालपछि विद्यार्थी राजनीतिमा आएका ढकाल २०६० सालमा नेविसंघबाट स्ववियुको सदस्य निर्वाचित भएका थिए । युवालाई सधैँ माया र हौसला प्रदान गरेर व्यवसायसँगै राजनीतिमा डोहोर्याउन अग्रसरता देखाउने ढकाल पार्टीको १३ औँ महाधिवेशनमा निर्वाचित जिल्ला सदस्य समेत हुन् ।

कांग्रेससँग इतिहास जोडिएको मोरङ जिल्लाको राजनीतिमा सक्रिय युवाको उमेदवारीले पछिल्लो समय समाजमा देखा परेको राजनीतिक वितृष्णालाई थप झक्झक्याएको अग्रजको बुझाई रहेको छ । महाधिवेशनमा मोरङ क्षेत्र नम्बर ३ बाट सभापतिमा उम्मेद्वारी दिएका ढकालसँग गरिएको कुराकानीको सारांशः

पार्टीमा सिद्धान्त विपरीत केही व्यक्तिवादी प्रवृत्ति देखा परेकाले यसलाई सुधार गरेर पार्टीलाई चलयमान बनाउन लागि परेको छु । नेपाली कांग्रेसजनलाई मात्र नभएर समाज र जनताको पार्टी बनाउने उद्देश्यले म नेतृत्वमा आउन लागेको हुुँ । पार्टीमा बेथिति मौलाउँदै गएकाले पार्टीलाई सही दिशामा ल्याएर चलाउनुपर्छ भनेर म २–३ वर्षदेखि अभियान नै चलाएर लागेको छु । यसमा युवा जमातको ठूूलो साथ र सहयोग रहेको छ ।

नेतृत्वमा नआइकन यी सबै परिवर्तन गर्न नसकिने रहेछ । बाहिर बसेर कति दिन विरोध गर्ने ? त्यही भएर समाज र जनताको हितका लागि पनि मैले सभापतिमा उमेदवारी दिएको छु । यसमा कसैको त्रास, डर र धम्कीबाट पछि हटेर स्वविवेकमा नेतृत्व चुन्ने अवस्थाको सिर्जना गर्नुपर्छ ।

मैले कोभिड १९ को पहिलो र दोस्रो चरणमा  आफ्नो व्यक्तिगत खर्चमा समुदाय स्तरमा जनचेतना जगाउँदै स्वास्थ्य सामग्री, राहत वितरण गरेर समाजमा नमूूना काम गरेको छु । गाउँ, समाजमा हुने हरेक गतिविधिमा सक्रिय युवा पंक्तिमा रहेर काम गर्दै आएको छु । राजनीति गर्नु भनेकै अरुको सेवा गर्नु हो त्यसैले आफ्नो सेवा भन्दा पनि अरुको सेवा गर्नु म महत्वपूर्ण ठान्छु ।

विचारमा मतभेद कतै पनि नेपाली कांग्रेसमा छैन यो सब गाउँसमाजमा जुँगाको लडाइँ मात्र हो । यहाँ कोइराला गुट, देउवा गुट भन्दा पनि नेपाली कांग्रेसको सच्चा कार्यकर्ता भएको हिसाबले अघि बढ्नुपर्छ । यहाँ दुवै समूहमा चाहिने मान्छे पनि छन् र नचाहिने मान्छे पनि छन् यस्तो अवस्थामा प्रतिनिधिहरुलाई स्वविवेक प्रयोग गर्न दिनुपर्यो । अनि मात्रै सबल नेतृत्व आउँछ । यहाँ कसैले दुई दिन उचाल्दैमा नेतृत्व लिन तम्सिने परम्परा छ यसले सिंगो पार्टीलाई सिध्याउन सक्छ र जनमानसमा नैराश्यता ल्याउँछ । त्यसैले पार्टीलाई चलाउन सक्ने सक्षम योग्य नेतृत्व छान्नु पर्छ ।

सभापति हुदाँमात्र समाजसेवामा लाग्ने होइन । अनवरत रुपमा जनताको दुःखमा लाग्ने भएकाले मलाई पद नै ठूूलो कुरा जस्तो लाग्दैन । कांग्रेस र देशको हितको लागि  निरन्तर लाग्छु ।

वडाबाट चुनिएर आएका प्रतिनिधि देउवा र कोइराला भन्ने हुँदैन । उहाँहरु सबै नेपाली कांग्रेसका प्रतिनिधि हो । त्यसैले उहाँहरुले योग्य र चाहिने नेतृत्व छान्न कसैको डर, धम्की, त्रास र प्रलोभनमा पर्नुहुने छैन भन्ने लाग्छ । यति गर्न सके पछि पछुताउनुपर्ने छैन ।

म सभापतिमा विजयी हुँदै गर्दा म मध्यमार्गी हुँ । म कसैको विरोध गरेर नेता हुन्नँ । गलत प्रवृत्तिको विरोध गर्नुपर्छ तर अरुको विरोध गरेर नेता हुने होइन । सबैको आत्मसम्मान हुने खालको काम र व्यवहार गरेर संगठन दरो बनाउनतर्फ मेरो भूमिका रहने छ । कसैले औँला उठाउन नसक्ने गरी पार्टीलाई अगाडि लानेछु । (कृष्णचन्द्र सुवेदीसङ्ग गरिएकाे कुराकानीमा आधारित)