विराटचोकः नेपाली कांग्रेसको १४ औँ महाधिवेशनमा होमिएको छ । निर्वाचन क्षेत्रको अधिवेशन सकिएको छ । केही जिल्लामा जिल्ला अधिवेशन पनि सकिएको छ । मोरङ जिल्लामा भने आज जिल्ला अधिवेशन हुँदैछ ।

मोरङ जिल्ला कांग्रेस नेतृत्वको अग्रणी जिल्ला हो । अहिले यस जिल्लामा पार्टीको नेतृत्व गर्नका लागि धेरै आकांक्षी देखिएका छन् । आकांक्षि धेरै भएकाले सबैलाई मिलाएर लाने अवस्था नभएपछि आज निर्वाचनमार्फत् नेतृत्वको छिनोफानो हुने भएको हो ।

खासगरी देउवा पक्ष र कोइराला पौडेल पक्षबीच कडा प्रतिष्पर्धा हुने देखिन्छ । पार्टीको जिल्ला सभापति पदका लागि लेटाङबाट डिगबहादुर लिम्बू, पथरी शनिश्चरेबाट यदुकुमार विष्ट, बेलबारीबाट दिलिप गच्छदारले उमेदवारी दिएका छन् । एक जना सभापतिका लागि ३ उम्मेदवार प्रतिष्पर्धामा उत्रिएका छन् ।

उपसभापतिमा राजु मास्के, नागेश कोइराला, भक्तिनाथ माझी, सुबोधकुमार सिंह, गोपालबहादुर थापाले उमेद्वारी दिएका छन् । मास्के र कोइराला विराटनगर महानगरपालिकाका हुन् । माझी कटहरी गाउँपालिका, सिंह धनपालथान गाउँपालिका र थापा सुन्दरहरैंचा नगरपालिकाका हुन् ।

यसैगरी, सचिव पदमा रतुवामाईका रबिन राई, विराटनगरका मनोज बस्नेत, लेटाङका ज्ञानेन्द्र ढकाल, रंगेलीका बोधराज घिमिरे तथा सुन्दरहरैंचाका ललितबहादुर श्रेष्ठ र शिवप्रसाद ढकाल तथा विराटनगरका अर्जुन निरौलाले उमेदवारी दिएका छन् । रबिन राई रतुवामाई नगरपालिका र शिवप्रसाद ढकाल सुन्दरहरैचा नगरपालिकाका मेयर हुन् । त्यस्तै, शिवप्रसाद ढकाल र ललितबहादुर श्रेष्ठ दुवै जना सुन्दरहरैंचाको विराटचोकका बासिन्दा हुन् ।

सह सचिव पदमा रतुवामाईका विशालकुमार गौतम, बुढीगंगाका अशोकप्रसाद रिजाल, लेटाङका थिरप्रसाद फुयाल, बुढीगंगाका भुवनेश्वर मण्डल, विराटनगरका सञ्जय मण्डल र उर्लाबारीका सुवास भण्डारीले मनोनयन दर्ता गराएका छन् ।

यसरी हेर्दा कांग्रेस मोरङको नेतृत्व चयनमा कडा प्रतिस्पर्धा हुने भएको छ । अधिकांश युवा उमेदवार हुँदा यहाँको राजनीतिक चहलपहल बढेको छ ।

उता शिवप्रसाद ढकाल र ललित श्रेष्ठ एकै निर्वाचन क्षेत्र मोरङको क्षेत्र नम्बर ३ का कार्यकर्ता हुन् । फरकफरक गुटबाट निर्वाचनमा सहभागी भएका उनीहरुमा ढकाल संस्थापन पक्षका उम्मेद्वार हुन् । संस्थापन इतर पक्ष बलियो देखिएको हुनाले आफूले चुनाव जित्नेमा श्रेष्ठ विश्वस्त छन् । केन्द्रीय महाधिवेशन प्रतिनिधिमा सर्वाधिक मत पाएका श्रेष्ठलाई त्यो मत जोगाउन जिल्लामा जित्नै पर्ने दवाब पनि छ । ढकालले पनि क्षेत्रीय प्रतिनिधि छनोटमा सर्वाधिक मत पाएका थिए । त्यतिमात्रै होइन कम्युनिष्टको गढ मानिएको सुन्दरहरैंचामा गत स्थानीय निर्वाचनमा शानदार मत ल्याएर नगर प्रमुखमा निर्वाचित भएकाले र १ कार्यकाल सहसचिवसहित ३ कार्यकाल जिल्ला कार्यसमितिमा रहेर अनुभव बटुलिसकेका हुनाले उनलाई बलियो उम्मेद्वारको रुपमा लिइएको छ ।

सुन्दरहरैंचाका नगरप्रमुख ढकाल र रतुवामाईका नगरप्रमुख राई दुवै जनालाई चुनाव जित्नैपर्ने दवाब छ । जनताबाट चुनिए पछि पार्टीमा हार व्यहोर्नुपर्ने अवस्था नआओस भनेर अहिले कम्मर कसेर जीत निकाल्न दुवै जना लागि परेका छन् ।