इटहरीः साङ्गीतिक विश्वविद्यालयको तयारीमा रहेको सङ्गीत साधना प्रतिष्ठान नेपालको आयोजनामा इटहरीमा आजदेखि ३ दिने सङ्गीत उत्सवको आयोजना हुने भएको छ । प्रतिष्ठानले सङ्गीत मार्फत इटहरीलाई परिचित गराउन साङ्गीतिक साँझको आयोजना गर्न लागिएको जनाएको छ ।

पत्रकार सम्मेलनमार्फत् प्रतिष्ठानले जनाएअनुसार प्रतिष्ठानको २८ औँ वार्षिक उत्सवको हुने ‘साधना सङ्गीत उत्सव–२०७८’ को पहिलो दिन आज बिहान ११ बजेदेखि विद्यालय तथा उच्चशिक्षा अध्ययन गर्ने विद्यार्थीहरूका सामु अन्नपूर्ण च्याम्बर वाद्यवादन प्रस्तुत गर्ने कार्यक्रम रहेको छ ।

नारायण गोपाल सङ्गीत कोष काठमाडौका ३५ जना वाद्यवादक सङ्गीतकर्मीहरूबाट अर्केस्ट्रा प्रस्तुति गरिने कार्यक्रम तय भएको प्रतिष्ठानका महासचिव राजु केसीले जानकारी दिए । उनका अनुसार प्रदेश १ सामाजिक विकास मन्त्री जयदेव यादवको प्रमुख आतिथ्यतामा कार्यक्रम हुनेछ ।

उत्सवको दोस्रो दिन भोलि बिहान ११ बजे देखि १ बजे सम्म साहित्य उत्सव आयोजना गरिने भएको छ । पूर्वका ख्यातिप्राप्त सर्जकहरूका रचनाहरू प्रस्तुत गर्ने उद्देश्यले कार्यक्रम हुन लागेको आयोजकले जनाएको छ । आर्थिक मामिला तथा योजना मन्त्री इन्द्र आङ्वोको प्रमुख आतिथ्यता साँझ साढे ४ बजेदेखि साढे ७ बजेसम्म सङ्गीतकर्मी, साहित्यकर्मी, विशिष्ट व्यक्तित्वको उपस्थितिमा साङ्गीतिक प्रस्तुतिको आयोजना गरिने भएको छ ।

तेस्रो दिन मङ्सिर २३ गते साँझ साढे ४ बजेदेखि ८ बजेसम्म मुख्य मन्त्री राजेन्द्र राईको प्रमुख आतिथ्यतामा नारायण गोपाल साङ्गीतिक साँझको आयोजना गरिने भएको छ । स्वरसम्राट नारायण गोपालको ३१ औँ पुण्य तिथिको उपलक्ष्यमा साङ्गीतिक साँझ आयोजना गरिने भएको हो ।

सो साँझमा प्रख्यात गायक÷गायिका यम बराल, भीषण मुकारुङ, राजन सागर, जिना रसाइलीले सांगीतिक प्रस्तुति दिने भएका छन् । सङ्गीत साधना प्रतिष्ठानका विद्यार्थीहरूले नारायण गोपालको गीत गाएर लाइभ प्रस्तुति दिने कार्यक्रम पनि रहेको आयोजकले जनाएको छ ।

अन्नपूर्ण च्याम्वर अर्केस्ट्रा एवम् नारायण गोपाल सङ्गीत कोष उपत्यका बाहिर पहिलो पटक कार्यक्रम आयोजना गरिएको आयोजकले जनाएको छ । प्रतिष्ठानको प्राङ्गणमा निःशुल्क सो कार्यक्रम हुने आयोजकले जानकारी दिएको छ ।