विराटचोकः शनिबार सुन्दरहरैंचाको विराटचोकमा हुन लागेको नेपाल कम्युनिष्ट पार्टी (माओवादी केन्द्र) प्रदेश १ को सम्मेलनको तयारी तीव्र पारिएको सो पार्टीले जनाएको छ ।
पार्टीको प्रदेश नम्बर १ का अध्यक्ष सुरेशकुमार राई (हिमाल)का अनुसार सम्मेलनमा १ हजार १ सय ४० जना प्रतिनिधि तथा स्वयंसेवक गरी १ हजार ५ सयको जना सहभागी हुनेछन् । सम्मेलनको लागि प्रदेशका १ सय ३७ स्थानीय तहबाट पार्टी सदस्य संख्याको आधारमा ६ सय प्रतिनिधि चयन भइसकेका छन् ।
माओवादी केन्द्रले सबै स्थानीय तहबाट न्यूनतम् ३ जना पर्नेगरी ५ सय पार्टी सदस्य बराबर १ जना प्रतिनिधि छानेको हो । सम्मेलनमा आयोजक समितिका ९७ जना, ज्येष्ठ कम्युनिष्ट मञ्च प्रदेश १ बाट ८० जना, प्रदेश सल्लाहकारहरु सय जना र विभागबाट ३२ जना सहभागी हुने भएका छन् । प्रदेशका प्रतिनिधिको कुल १० प्रतिशत अर्थात ९१ जनालाई प्रदेश आयोजक समितिले मनोनित गर्ने व्यवस्था विधानमा भएको बताइएको छ ।
सम्मेलनमा केन्द्रीय सदस्यहरु २० जना, केन्द्रीय सल्लाहकारहरु १२ जना, केन्द्रीय विभागका ६८ जना, केन्द्रीय जेष्ठ कम्युनिष्ट मञ्चबाट १२ जना र केन्द्रीय आयोगका ५ जनासमेत प्रतिनिधिको रुपमा सहभागी हुने भएका छन् । केन्द्रीय समितिका सदस्यहरुले प्रदेशको सम्मेलनमा उम्मेदवार भएमा वा मतदान गरेमा राष्ट्रिय सम्मेलनमा मतदान गर्न र उम्मेदवार हुन पाउनेछैनन् । तर, प्रदेश सम्मेलनबाट राष्ट्रिय सम्मेलनको प्रतिनिधि भने उनीहरु चयन हुन सक्नेछन् ।
विराटचोकस्थित जेसीज भवनमा हुने अधिवेशनको उद्घाटन पार्टी अध्यक्ष प्रचण्डले भर्चुअल माध्यमबाट गर्ने आयोजक समितिका सचिव हेमराज भण्डारीले बताए । अधिवेशनको उद्घाटन सत्रपछि सोही दिन बन्द–सत्र शुरु हुनेछ ।राजनीतिक र सांगठनिक प्रतिवेदनबारे भोलिपल्ट बिहानसम्म बहस हुने र प्रतिवेदनहरू पारित हुने बताइएको छ ।
नयाँ नेतृत्व चयनको लागि राजेन्द्र किरातीको संयोजकत्वमा ७ सदस्यीय निर्वाचन समिति गठन गरिएको छ ।
प्रदेश सम्मेलनबाट १ सय ७५ जनाको कार्यसमिति निर्वाचित हुनेछ । समितिमा ३५ प्रतिशत महिला र १५ प्रतिशत दलितको प्रतिनिधि अनिवार्य हुने व्यवस्था गरिएको बताइएको छ । प्रदेशमा अध्यक्ष, एक महिला अनिवार्यसहित ३ उपाध्यक्ष, एक सचिव, एक सहसचिव र एक कोषाध्य र बाँकी सदस्य चयन हुनेछन् । झण्डै १ सय जनाको हाराहारीमा राष्ट्रिय सम्मेलनका लागि प्रतिनिधि चयन पनि सोही अधिवेशनबाट हुने बताइएको छ ।
माओवादीले प्रदेश अधिवेशन मोरङको सुन्दरहरैंचामा गर्ने
You must be logged in to post a comment Login