विराटचोकः व्यवसायको सिलसिलामा जापानमा रहेका छोराको निधन भएपछि उनको सम्झनामा आमाबाबु तथा परिवारका सदस्यले ८० वर्षमाथिका ज्येष्ठ नागरिकलाई सम्मान गरेका छन् । ज्येष्ठ नागरिक समाज सुन्दरहरैंचा– ७ र गणेशपुर टोल विकास संस्थाको आयोजनामा भएको कार्यक्रममा वडा नम्बर ३ र ७ का ज्येष्ठ नागरिकलाई सम्मान गरिएको हो ।

सुन्दरहरैंचा– ७ निवासी षडानन्द दाहाल (गोपाल) को गत महिना जापानमा निधन भएपछि उनको सम्झनामा बुबा पिताम्बर दाहाल, आमा रुद्रकुमारी दाहाल तथा परिवारका सदस्यले ८० वर्षमाथिका ११ जना ज्येष्ठ नागरिकलाई सम्मान गरेका हुन् । ज्येष्ठ नागरिक भवन सुन्दरहरैंचा–७ को हलमा भएको कार्यक्रममा सुन्दरहरैंचाको वडा नम्बर ३ र ७ का ज्येष्ठ नागरिकलाई सम्मान गरिएको हो ।

ज्येष्ठ नागरिकहरु हिरण्यप्रसाद भण्डारी, कुसुमलाल यादव, अकली ऋषिदेव, रोयिबा मण्डल, चन्द्रबहादुर रायमाझी, शुकमती नाल्बो, हीरादेवी भण्डारी, मनमाया अधिकारी, बिर्खबहादुर बिक, लालसरी सरदार र पविमाया भुजेललाई सम्मान गरिएको हो । उनीहरुलाई कार्यक्रमका प्रमुख अतिथि सुन्दरहरैंचा नगरपालिकाको वडा नम्बर ७ का अध्यक्ष चैतन्यप्रसाद सिटौला तथा विशेष अतिथि ज्येष्ठ नागरिक सेवा समाज सुन्दरहरैंचाका अध्यक्ष रामकुमार कार्कीलगायतले सम्मान गरेका थिए । उनीहरुलाई दोसल्ला ओढाउनुका साथै नगद प्रदान गरिएको थियो ।

कार्यक्रमलाई सम्बोधन गर्दै प्रमुख अतिथि सिटौलाले मृतात्माको शान्तिको कामनाका साथ ज्येष्ठ नागरिकलाई सम्मान गर्ने कार्यले समाजमा रचनात्मक काम गर्न उत्प्रेरणा जाग्ने बताए । सुन्दरहरैंचा नगरपालिकाले ज्येष्ठ नागरिकलाई सम्मान गर्दै नगरपालिकाभित्र वृद्धाश्रम बनाउन अनुमति नदिने नीति लिएको बताए । नगरपालिकाको वडा नम्बर ७ को ज्येष्ठ नागरिक समिति निस्क्रिय भएकाले सक्रिय हुन पनि उनले सुझाव दिए ।

विशेष अतिथि कार्कीले छोराको सम्झनामा ज्येष्ठ नागरिकको सम्मान गर्ने दाहाल परिवारले ज्येष्ठ नागरिक समाज सुन्दरहरैंचालाई भवन निर्माणको लागि जग्गा दान दिएको पनि स्मरण गरे । ज्येष्ठ नागरिक भवनको निर्माणमा स्थानीय तहका साथै संघ र प्रदेश सरकारमार्फत् आर्थिक स्रोत जुटाउन दाहाल परिवारले गरेको कार्यको पनि उनले प्रशंसा गरे ।

कार्यक्रमलाई सम्बोधन गर्दै ज्येष्ठ नागरिक समाज सुन्दरहरैंचाकी सदस्य तथा स्वर्गीय षडानन्द दाहालकी आमा रुद्रकुमारी दाहालले छोराको आत्माको चिरशान्तिको लागि गरिएको कार्यक्रममा उपस्थित सबैलाई धन्यवाद ज्ञापन गरेकी थिइन् । ज्येष्ठ नागरिक समाजको भवन बनाउन जग्गा दान दिएको स्मरण गर्दै उनले जग्गादाता तथा अन्य सहयोग गर्नेको विवरण र इतिहास बिर्सन नहुने बताइन् ।

गणेशपुर टोल विकास संस्थाका अध्यक्ष शंकरमान कार्कीले टोल विकास संस्था समाज तथा अन्य संघसंस्थासँग मिलेर काम गर्न तयार भएको बताए ।

कार्यक्रममा स्वर्गीय षडानन्द दाहालकी भाउजू कमला पोखरेलले स्वागत मन्तव्य राखेकी थिइन् भने कार्यक्रमको सञ्चालन षडानन्दका भाइ मुकुन्द दाहालले गरेका थिए । ज्येष्ठ नागरिक समाज सुन्दरहरैंचा– ७ का अध्यक्ष लोकनाथ ढुङ्गेलको अध्यक्षतामा भएको कार्यक्रममा वडा नम्बर ७ का सदस्य भुवनसिंह मगर, ब्रह्मकुमारी राजयोग सेवा केन्द्र सुन्दहरैंचा– ७ का प्रतिनिधि तथा अन्य संघसंस्थाका प्रतिनिधि उपस्थित थिए ।