धरानः अघिल्लो हप्तका धरानको जंगलमा भेटिएको शवको सनाखत नहुँदा प्रहरीलाई अनुसन्धानमा समस्या परेकोमा शवको सनाखत हुनासाथ प्रहरीले २ जनालाई पक्राउ गरेको छ । प्रेमीसँग मिलेर आफ्नै श्रीमान्को हत्या गरि शरीर टुक्र्याएर धरानको जंगलमा फाल्ने महिला र उनका प्रेमीलाई प्रहरीले मंगलबार सार्वजनिक गरेको हो ।

आज साँझ ५ बजे इलाका प्रहरी कार्यालय धरानले पत्रकार सम्मेलन गर्दै हत्या गरिएका व्यक्ति झापाको दमकका ४३ वर्षीय दिनेश सिग्देल भएको जानकारी दिएको हो । सिग्देलको हत्यामा संलग्न उनकी कान्छी श्रीमती ३० वर्षीया अनिता केसी र उनका प्रेमी २९ वर्षीय सरोज भण्डारीलाई पक्राउ गरेर प्रहरीले सार्वजनिक गरेको हो ।

प्रहरीका अनुसार दिनेशले १० वर्षअघि सुनसरीको वराहक्षेत्र– १० प्रकाशपुरकी अनितासँग दिनेशले दोस्रो विवाह गरेका थिए । उनका प्रेमी सरोज भण्डारीको घर विराटनगर महानगरपालिका ४ इक्राही टोलमा रहेको छ । उनी सिटी सफारी चालक हुन् । विवाहित भण्डारीको श्रीमतीसँग सम्बन्ध विच्छेदको प्रक्रिया चलिरहेको प्रहरीले जनाएको छ ।

प्रहरीका अनुसार अनिताको सम्बन्ध सरोजसँग बढेको थाहा पाएपछि बहराइनमा रहेका दिनेश कसैलाई थाहै नदिई नेपाल आएका थिए । १५ दिनको बिदा लिएर पुस २० गते नेपाल आएका उनी पुस २१ गते विराटनगर आएका थिए । सो दिन विराटनगरमा कान्छी श्रीमती अनितासँगै होटलमा बसेका थिए भने २२ गते बेलुका उनीहरु अनिताको डेरा विराटनगर– ३, पीपल चोकमा बसेका थिए ।

सो रात दिनेश र अनिताबीच विवाद भइरहेको समयमा आएका सरोजले दिनेशकै गलबन्दीले घाँटीमा कसेर हत्या गरेको प्रहरीले जनाएको छ । हत्या गरेपछि त्यस रात शवलाई नचलाई राखेर उनीहरु अन्यत्रै बसेको र पुस २३ गते ग्रेण्डर मेसिनले शव टुक्र्याएको पक्राउ परेकाले बयानको क्रममा बताएका छन् । पुस २३ गते साँझमा टेम्पो भाडामा लिएर धरान भेडेटार सडकखण्डमा फालेर सो रात उनीहरु भेडेटारमा बास बसेर भोलिपल्ट मात्र विराटनगर फर्किएको पाइएको प्रहरीले जनाएको छ ।

पुख्र्यौली घर इलामको चुलाचुली गाउँपालिका ५ बाँझो भएका सिग्देशलका जेठी श्रीमतीतर्फ २ छोरा र २ छोरी छन् भने कान्छी श्रीमतीतर्फ एउटी छोरी छिन् ।

गत बुधबार र बिहीबार धरान ४ को आपगाँछी क्षेत्रको जंगलमा २ वटा झोलामा पुरुषको शरीरको विभिन्न भागहरु काटेर फालेको अवस्थामा भेटिएको थियो । दाउरा खोज्न गएका स्थानीयले जेब्रा झोलामा मानिसको शरीरका अंग देखेपछि प्रहरीलाई खबर गरेका थिए । सो झोलामा टाउको र एउटा खुट्टा फेला परेको थियो । संघीय प्रहरी इकाई र इलाका प्रहरी कार्यालय धरानको टोली जंगलमा सर्च गर्दा भोलिपल्ट बिहीबार थप अर्को जेब्रा झोलामा शरीरका अन्य भागहरु फेला परेका थिए ।

शवको सनाखत हुन नसक्दा प्रहरीले मृतकको अनुहारको स्केच बनाएर सार्वजनिक समेत गरेको थियो ।