विराटचोकः सरकारले सुकुम्बासी समस्या समाधानका लागि नयाँ आयोग गठन गरेसँगै आयोगले काम थालेको छ ।

मोरङको सुन्दरहरैंचा नगरपालिकामा आयोगका केन्द्रीय अध्यक्ष केशव निरौला तथा जनप्रतिनिधिहरु स्थानीय तहमा आयोगबाट खटिएका कर्मचारीसहित वडा नम्बर १० मा रहेको सुकुम्बासी बस्तीमा बुधबार जग्गा नापजाँचका लागि प्राविधिक टोलीसहित पुगेका थिए । उच्चस्तरीय जिपीएस प्रविधिबाट जग्गाको नापजाँच गर्न शुरु गरिएको बताइएको छ ।

पहिलो चरणमा छनोटमा परेका ६८ पालिकामध्येको पहिलो पटक सम्झौता गर्ने सुन्दरहरैंचामा तत्थ्याङ्क सङ्कलन गरी सफ्टवेयरमा प्रविष्ट गराइसकेपछि नापजाँचको कार्य शुरु भएको अध्यक्ष निरौलाले बताए ।

नापजाँचको प्रक्रिया समापन भएपछि सुकुम्बासी पहिचान गरेर वडामा रहेको सहजीकरण समिति, पालिका स्तरीय समितिबाट जिल्लामा पुगेपछि निणर्य गरेर श्रेस्ता तयार पारी कित्ता नम्बर उल्लेख भएपछि लालपूर्जा बन्ने बताइएको छ । आयोगले वडा नं ८ को कार्यालय चिरममा स्थानीय सेवा केन्द्र स्थापना गरेको छ ।

सुकुम्बासीहरुका लागि निःशुल्क जग्गा उपलब्ध गराउन लागेको बताइएको छ । धेरै पहिलेदेखि १० धुर सरकारी जग्गामा संरचना बनाएर बस्दा सरकारले उठाउने पो हो कि भनेर डर लाग्ने गरेकोमा नापजाँच गर्न कर्मचारी आउँदा ज्यादै खुशी लागेको स्थानीय उर्मिला रोक्का बताउँछिन् ।

नगरपालिकामा अहिलेसम्म ६ हजार ७२ घरधुरीले अव्यवस्थित बसोबास, भूमिहीन सुकुम्बासी र दलित सुकुम्बासीको फारम भरेको नगरप्रमुख शिवप्रसाद ढकालले बताए । नगरभित्रका यस्ता सबै परिवारलाई चाँडै लालपूर्जा उपलब्ध गराउने उनले बताए । यसका लागि ४ वटा स्टेशन र मेसिनले काम गरिरहेको पनि उनले जानकारी दिए । आफ्नै कार्यकालमा यो काम समापन गर्ने योजना रहेको समेत मेयर ढकाल बताउँछन् ।

यस्तै, वडा नम्बर १० का वडाध्यक्ष राजेन्द्रबहादुर थापाले यो कार्यबाट जनतामा अव चाहिँ जग्गा पाइन्छ कि भन्ने आशा र खुशी पलाउन थालेको बताउँछन् ।

हालका जनप्रतिनिधिको पदावधि सकिन लागेको र नयाँ निर्वाचनको मिति घोषणा भएसँगै जनप्रतिनिधिहरु आफ्नै पालामा पूर्जा वितरण गर्न कम्मर कसेर लागि परेका छन । खास गरी यस्ता बस्तीलाई भोट बैंकको रुपमा हेरिने गरेको र यसअघिका चुनावमा विभिन्न राजनीतिक दलका उमेद्वारले सुकुम्बासीलाई लालपूर्जा उपलब्ध गराउने आश्वासन समेत बाँड्दै आएका थिए ।