चतराः सुनसरीको वराहक्षेत्र नगरपालिका वडा नं २ लाई देशकै पहिलो पूर्ण बीमायुक्त वडा घोषणा गरिएको छ ।

स्वास्थ्य बीमा कार्यक्रम अन्तर्गत नमूना स्थानीय तह घोषणा कार्यविधि २०७८ को परिच्छेद २ को बुँदाको (ख) लाई आधार मानेर पूर्ण बीमायुक्त घोषणा गरिएको हो । स्वास्थ्य मन्त्रालयका प्रमुख विशेषज्ञ तथा स्वास्थ्य बीमा बोर्डका पूर्व कार्यकारी निर्देशक गुणराज लोहनीले शुक्रबार वराहक्षेत्रको नगरपालिकाको वडा नं २ लाई देशकै पहिलो पूर्ण स्वास्थ्य बीमायुक्त वडा घोषणा गरेका हुन् ।

वडा कार्यालय र चतरा अस्पतालले संयुक्त रूपमा वडालाई स्वास्थ्य बीमायुक्त वडा घोषणा गरिएको हो । वडा कार्यालयको फागुन १० गतेको निर्णय अनुसार वडालाई स्वास्थ्य बीमायुक्त वडा घोषणा गरिएको हो । २०६८ सालको जनगणना अनुसार १ हजार ७ सय ३१ परिवार ८ हजार २ सय ६ जनसङ्ख्या रहेको वडामा ९५ दशमलव ८५ प्रतिशत अर्थात् ७ हजार ८ सय ६५ ले स्वास्थ्य बीमा गरेको वडाले जनाएको छ ।

चतरा अस्पतालको प्राङ्गणमा आयोजना भएको कार्यक्रम वडा नं २ का अध्यक्ष तथा चतरा अस्पतालका व्यवस्थापन समितिका अध्यक्ष हरिकृष्ण भट्टराईको सभाध्यक्षतामा भएको थियो । कार्यक्रममा वडाध्यक्ष भट्टराईले वडाको महत्वपूर्ण योजना सफल गर्न पाउँदा खुशी लागेको बताए ।

कार्यक्रमका प्रमुख अतिथि स्वास्थ्य मन्त्रालयका प्रमुख विशेषज्ञ तथा स्वास्थ्य बीमा बोर्डका पूर्व कार्यकारी निर्देशक गुणराज लोहनीले वडालाई पूर्ण बिमा युक्त वडा घोषणा हुनु ऐतिहासिक नमूना कार्य भएको बताए ।

कार्यक्रममा स्वास्थ्य कार्यालय सुनसरीका प्रमुख सागर प्रसाईँ, नेकपा एमालेका प्रदेश कमिटी सदस्य मनोज पौडेल, नेपाली कांग्रेस वडा नं २ का सभापति अमर कटुवाल, माओवादी केन्द्रकी नेतृ दिलु गजमेर, नेकपा एकीकृत समाजवादीका सुनसरी जिल्ला कार्य समिति सदस्य सुरेशमणि नेपाल, जसपा वराहक्षेत्र २ का अध्यक्ष दिपल राई, अस्पतालका पूर्व शिवराज दाहाल, पूर्व सदस्य युवराज बस्नेत सदस्य लगायतले मन्तव्य राखेका थिए । कार्यक्रममा अस्पतालका पूर्व अध्यक्ष, सदस्यहरू, पूर्व प्रमुखहरू, सहयोगी संघ, संस्था, व्यक्तिहरूलाई सम्मान समेत गरिएको थियो ।

कार्यक्रमममा अस्पतालका कर्मचारीद्वय सुकुमाया लिम्बू र उत्सव खतिवडालाई जनही नगद १० हजारसहित सम्मानपत्रसहित उत्कृष्ट कर्मचारीको रूपमा पुरस्कृत गरिएको थियो ।