विराटचोकः सुन्दरहरैंचाका ३० जना कविहरुको कविता संग्रह सुन्दरहरैंचा दर्पण लोकार्पण भएको छ । कार्यक्रमका प्रमुख अतिथि सुन्दरहरैंचा नगरपालिकाका प्रमुख शिवप्रसाद ढकाल, विशिष्ट अतिथि प्रा.डा. टङ्कप्रसाद न्यौपाने तथा अतिथिहरु डा. दिवाकर रेग्मी, दधिराज सुवेदी, डा. भोलानाथ पोखरेल, आचार्य अ, मोहनप्रसाद काफ्ले, बम देवान, गायक रामा मण्डल तथा लक्ष्मी सिर्जन बजगाईँलगायतले संयुक्त रुपमा सङ्ग्रहको लोकार्पण गरेका हुन् ।
कार्यक्रमलाई सम्बोधन गर्दै प्रमुख अतिथि सुन्दरहरैंचा नगरपालिकाका प्रमुख शिवप्रसाद ढकालले साहित्यकारसँग आफ्नो न नजिकको न टाढाको सम्बन्ध रहेको बताए । साहित्यको महत्वलाई बुझाएर सुन्दरहरैंचाले स्थानीय पाठ्यक्रममा कला साहित्यलाई पनि समावेश गराएको उनको भनाइ थियो ।
भाषाविद् प्रा. डा. टङ्क न्यौपानेले स्थानीय सरकारले साहित्यिक संस्थालाई स्वायत्त छोड्न नचाहने हुनाले स्थानीय स्तरमा प्रज्ञा प्रतिष्ठानको महत्व नहुने बताए । जनगणनामा भाषिक तथ्याङ्क नै गलत आउने गरेको उनको भनाइ थियो । नेपालमा संस्कृत र अङ्ग्रेजी मातृभाषा भएका मानिस नभए पनि तथ्याङ्कमा ती मातृभाषी रहेको पाइने गरेको उनले औँल्याए ।
कार्यक्रममा शुभकामना मन्तव्य राख्दै संस्थाका सल्लाहकार आचार्य अ ले संस्था जन्मिएको १ वर्ष नहुँदै राम्रो कामको शुरुवात गरेको बताए । नाटकसम्बन्धी अधिगोष्ठी पनि साहित्यिक संस्थाले गर्नुपर्ने उनको सुझाव थियो ।
प्राज्ञ दधिराज सुवेदीले साहित्यिक रचनाले पाठकलाई पूर्ण अनुभूति र सन्तुष्टि दिन सक्नुपर्ने बताए ।
डा. दिवाकर रेग्मीले लोकार्पित पुस्तकमाथि समीक्षा गरेका थिए । कविता नभएको भए सभ्यताको विकास असम्भव रहेको उनको भनाइ थियो ।
कार्यक्रममा रोहिणी रसिक, बम देवान, पशुपति पराजुली, चन्द्र सम्बाहाम्फे, लक्ष्मी अच्युत ढुङ्गानालगायतले आफ्ना सिर्जना वाचन गरेका थिए ।
कार्यक्रममा साहित्यकार मोहनप्रसाद काफ्ले तथा गायक तथा संगीतकारद्वय रामा मण्डल र लक्ष्मी सृजन बजगाईँलार्य सम्मान गरिएको थियो ।
सुन्दरहरैंचा कला साहित्य विकास समितिका अध्यक्ष छवि वैरागी घिमिरेको अध्यक्षतामा भएको कार्यक्रमको सञ्चालन नझरेका फूलहरुका प्रस्तोता केपी घिमिरेले गरेका थिए । कार्यक्रम आयोजक सुन्दरहरैंचा कला साहित्य विकास समितिका उपाध्यक्ष दीपक न्यौपानेले कार्यक्रममा स्वागत मन्तव्य राखेका थिए ।
You must be logged in to post a comment Login