विराटचोकः सुन्दरहरैंचा उद्योग वाणिज्य संघको १० औँ वार्षिक साधारणसभा सम्पन्न भएको छ । शनिबार मोरङको सुन्दरहरैंचा ९ स्थित नेपालीरिका होटलमा साधारसभा सम्पन्न भएको हो ।

कार्यक्रममा संस्थाका अध्यक्ष कृष्णप्रसाद रिजालले वार्षिक प्रतिवेदन प्रस्तुत गरेका थिए । आगामी दिनमा उद्यमी अभियान, सफ्टवेर निर्माण तथा सचिवालय व्यवस्थापन, व्यापार महोत्सव, सामुहिक बीमा, कर शिक्षा, व्यावसायिक सबलीकरण, हाटबजार व्यवस्थापन लगायतका काम गर्ने लक्ष्य रहेको अध्यक्षको प्रतिवेदनमा उल्लेख छ ।

वाणिज्य संघले कोभिडका समयमा अक्सिजन सङ्कलन, स्वाब सङ्कलन पिसिआर टेष्ट गर्ने कार्य, स्वास्थ्य सामग्री हस्तान्तरणको सहजीकरण गरेकोमा अधिकांश वक्ताहरुले प्रशंसा गरेका थिए ।

कार्यक्रममा सार्वजनिक शौचालय महाअभियान अन्तर्गत सलकपुर र विराटचोकमा बनेका सार्वजनिक शौचालय सुन्दरहरैंचा उद्योग वाणिज्य संघलाई हस्तान्तरण गरेका थिए । कार्य सम्पन्न भएकाले शौचालयको सञ्चालन गर्न शौचालय निर्माण समितिले शौचालयको व्यवस्थापन हस्तान्तरण गरेको संयोजक भोलेश्वर दुलालले बताए ।

साधारणसभाको अवसरमा विभिन्न क्षेत्रका व्यक्तिलाई सम्मान गरिएको थियो । सम्मानित हुने व्यवसायीमा ४४ वर्षदेखि कृषि पेशामा लाग्ने रेवतीकुमार तिम्सिनालाई सम्मान गरिएको थियो । तिम्सिनाले वडा नम्बर १ मा मह, च्याउ र मेवा खेती गर्दै आएका छन् । यस्तै लामो समयदेखि व्यवसाय गर्दै आएका विजय मिष्ठान्न भण्डारका सञ्चालक हरि काफ्ले, आरती अग्रहरी, धनमाया तामाङ र कुमारी सुवेदीलाई व्यावसायिक क्षेत्रमा पुर्याएको योगदानको उच्च मूल्याङ्कन गर्दै सम्मान गरेको हो ।

कोभिडको बेलामा सहयोग गर्ने व्यक्तिलाई समेत संघले सम्मान गरेको छ । जनताको जीवन रक्षाका लागि उद्योग वाणिज्य संघले सञ्चालन गरेको स्वाब सङ्कलन कार्यमा खटिने प्राविधिक मुनादेवी भट्टराईलाई सम्मान गरिएको हो । यस्तै, स्वास्थ्य क्षेत्रमा योगदान पुर्याउने मृगौलिया स्वास्थ्य चौकीका इन्चार्ज माधव रेग्मी, एम्बुलेन्स चालक डिल्लीराम ढकाल र कोभिडको बेलामा शव व्यवस्थापन गर्ने समुन्द्र बिकलाई कार्यक्रमका प्रमुख अतिथि नेपाल उद्योग वाणिज्य महासंघका पूर्व अध्यक्ष चण्डीराज ढकालले प्रमाणपत्रद्वारा सम्मान गरेका थिए ।

आगलागीपीडित तीर्थ श्रेष्ठलाई २५ हजार र सुकुना बहुमुखी क्याम्पस सञ्चालक समति अध्यक्ष केशव अधिकारीलाई २० हजारको छात्रवृत्तिवापतको रकम हस्तान्तरण गरिएको छ ।

कार्यक्रममा लेखा समितिको प्रतिवेदन लेखा संयोजक कृष्णप्रसाद ओझाले प्रस्तुत गरेका थिए । कार्यक्रममा उद्योग वाणिज्य महासंघका पूर्व उपाध्यक्ष किशोर प्रधान, उमेशलाल श्रेष्ठ लगायता वक्ताले देशमा सिर्जित आर्थिक तरलता अभाव र महङ्गीले व्यावसायिक क्षेत्रमा परेको असरका बारेमा प्रश्न उठाएका थिए ।