विराटचोकः केराबारी गाउँपालिका वडा नम्बर ७ को सार्वजनिक सुनुवाइ आज सम्पन्न भएको छ । वडा नम्बर ७ का अध्यक्ष नारायणकुमार लिम्बूको अध्यक्षतामा भएको कार्यक्रममा सहभागीले वडाका विभिन्न विषयका जिज्ञासा जनप्रतिनिधि तथा अन्य सरोकारवालासँग राखेका थिए ।

वडावासीमार्फत् आएका जिज्ञासा र कार्यक्रममा उपस्थित सहभागीले सोधेका जिज्ञासाको जवाफ, वडाध्यक्ष राई, दलित महिला सदस्य रेखा बिक, महिला सदस्य विमला तामाङ, वडा सचिव सिर्जना तामाङ, सामुदायिक स्वास्थ्य इकाइ प्रमुख बालकुमारी चालिसेलगायतले दिएका थिए ।

कार्यक्रममा आफ्नो भनाइ राख्दै वडाध्यक्ष राईले टोल विकास संस्थालाई अधिकारसम्पन्न बनाउने, शैक्षिक गुणस्तर सुधार्न विद्यालयका समस्याको बारेमा जानकारी लिई पूरा गर्न कदम चाल्ने, किसानको हितअनुकूलका कार्यक्रम सञ्चालन गर्नेलगायतका काम वडाले गर्न पहल गर्ने बताए ।

कार्यक्रममा वडा सचिव सिर्जना तामाङले चालु आर्थिक वर्षमा वडाले सम्पन्न गरेका र सम्पन्न हुन बाँकी रहेका योजनाको बारेमा जानकारी दिएकी थिइन् । चालु आर्थिक वर्षमा वडामा जम्मा ५५ लाख ८५ हजार रुपैयाँका आयोजना सम्पन्न भएको उनले जानकारी दिइन् ।

महिलाको लागि सीप विकास, नेतृत्व विकासलगायतका काम हरेक वर्ष भइरहेको वडा सदस्य विमला तामाङले बताइन् । हालै ४० जना महिलालाई सीपमूलक तालीम दिइएको उनले बताइन् ।

वडामा दलित तथा जनजातिलक्षित विभिन्न कार्यक्रमहरु पनि सञ्चालन भइरहेको दलित महिला सदस्य रेखा बिकले बताइन् । उनका अनुसार न्यून आय भएका दलितहरुलाई सिलाइ मेसिन तथा आरन मेसिन वितरण गरिएको उनको भनाइ थियो । बाख्रापालन गर्ने दलित तथा गैरदलितलाई बाख्राका पाठा वितरण गर्नुका साथै वडाका महिलाहरुलाई समेटेर उद्घोषण तालीम पनि हालै दिइएको उनको भनाइ थियो ।

सेवाग्राहीले राखेको जिज्ञासाको जवाफ दिने क्रममा सामुदायिक स्वास्थ्य एकाइ प्रमुख चालिसेले मन्त्रालय तथा विभागबाट आउने औषधीको स्वास्थ्य संस्थामा अभाव हुने गरेको जानकारी दिइन् । जीवनजल, सिटामोल, दमको औषधीलगायतका औषधी यस्ता औषधीमा पर्ने उनको भनाइ थियो । कुनै औषधी १ वर्षदेखि नै अभाव रहेको उनले बताइन् । गाउँपालिकाको स्वास्थ्य शाखाले खरीद गर्न नमिल्ने औषधी मन्त्रालय तथा विभागले नपठाइदिँदा समस्या हुने गरेको उनले सुनाइन् ।

कार्यक्रममा लालबहादुर बस्नेत, शेखर बराल, युवराज राई, पुण्डरी सुवेदी, टेकबहादुर थापा, महेश्वरी तामाङ, शोकबहादुर बस्नेत, पर्शुराम बराल, डम्बरु बराल, कमल चौलागाईँलगायतले जिज्ञासा राखेका थिए ।

विराट मिडिया एण्ड एड्भरटाइजिङ प्रालिको आयोजनामा भएको कार्यक्रममा वडाका विभिन्न विद्यालयका प्रधानाध्यापक, टोल विकास संस्था, सामुदायिक वन, खानेपानी उपभोक्ता समिति, सामुदायिक स्वास्थ्य इकाइका प्रतिनिधि तथा वडावासीको सहभागिता थियो ।