विराटचोकः बैशाख ३० गते हुने स्थानीय तहको निर्वाचनका लागि वडाध्यक्ष पदमा उम्मेद्वारी दिएका विभिन्न दलका उम्मेद्वारबीच सार्वजनकि बहस (ककस) कार्यक्रम आइतबार सम्पन्न भएको छ ।

गछिया चोकको खुला चौरमा भएको कार्यक्रममा सुन्दरहरैंचा नगरपालिकाको वडा नम्बर २, ३, ४, ५, ६ र ७ मा विभिन्न दलबाट वडाध्यक्ष पदमा उम्मेद्वारी दिएका व्यक्तिबीच सार्वजनिक बहस भएको हो । कार्यक्रममा आफ्नो भनाइ राख्ने अधिकांश उम्मेद्वारले वडाको विकासमा आफूले गर्ने कामको बारेमा उपस्थित मतदातालाई जानकारी गराएका थिए ।

यस्ता थिए वडाध्यक्ष पदका उम्मेद्वारका प्रतिबद्धताहरुः
सन्तोष लिङ्देन, वडा नम्बर ६ नेपाली कांग्रेस
– भ्रष्टाचार गदिँन,
– राज्यबाट दिइने कुनै पनि सेवा सुविधा लिन्नँ
– एक व्यक्ति, एक कार्यकालको मान्यता राख्छु, फेरि उम्मेद्वार हुन्नँ ।

चैतन्यप्रसाद सिटौला, वडा नम्बर ७, नेपाली कांग्रेस
– बायो इन्जिनियरिङ र सिभिल इन्जिनियरिङमार्फत् गछिया खोलाको तटबन्ध गर्छु र वृक्षरोपण गर्छु,
– आवश्यकताका आधारमा सबै सडकहरुको स्तरोन्नति गर्छु,
– भोकालाई भोजन होइन आयआर्जनको लागि आवश्यक सीप प्रदान गर्छु,
– वडाभित्रकै बैंकमार्फत् सामाजिक सुरक्षा भत्ता वितरणको व्यवस्था मिलाउँछु,
– वर्षमा २ पटक ज्येष्ठ नागरिकको निःशुल्क स्वास्थ्य परीक्षणको व्यवस्था गर्छु ।

भुवनसिंह मगर, वडा नम्बर ७, स्वतन्त्र
– शिक्षा, स्वास्थ्य र खानेपानीलाई प्राथमिकतामा राख्छु,
– ठडिया आधारभूत विद्यालयमा अङ्ग्रेजी माध्यमबाट पठनपाठनको व्यवस्था गर्छु,
– ज्येष्ठ नागरिकलाई निःशुल्क एम्बुलेन्सको व्यवस्था सरकारमार्फत् उपलब्ध गराउँछु, सरकारबाट सम्भव नभए निजी खर्चमा निःशुल्क एम्बुलेन्स सेवा उपलब्ध गराउँछु,
– सामुदायिक विद्यालयका विद्यार्थीलाई १ जोडी विद्यालय पोशाक निजी खर्चमा उपलब्ध गराउँछु,
– वडाभित्रका सबै बाटोको नाम र नम्बरिङ गरी गुगल म्यापमा जोड्नेछु ।

पोष्टकुमार श्रेष्ठ, वडा नम्बर ७, नेकपा एमाले
– गछिया खोला कटान नियन्त्रणका लागि तत्काल अस्थायी तटबन्ध निर्माण गर्नेछु,
– गछिया खोलाबाट सङ्कलित ४० प्रतिशत राजस्व गछिया खोलाको तटबन्धनको लागि विनियोजन गर्ने व्यवस्था मिलाउँछु,
– समाजसेवी मनको भएको हुनाले समाजका हरेक समस्याको निराकरणमा सहयोग गर्नेछु,
– वडावासीले भनेअनुसारको काम गर्न सकिनँ भने तत्काल राजीनामा दिनेछु ।

लीलाप्रसाद पोखरेल, वडा नम्बर ७, विवेकशील साझा
– विकृत राजनीतिविरुद्ध आवाज उठाउन भूमिका निर्वाह गर्नेछु,
– निर्वाचित हुनासाथ सर्वदलीय विशेषज्ञ समूह निर्माण गरी सल्लाह र सुझाव लिनेछु,
– वडा सदस्यहरु हप्तामा १ पटक टोलटोलमा गएर वडावासीका समस्या बुझ्ने व्यवस्था गर्नेछु,
– १२ कक्षासम्म निःशुल्क शिक्षाका लागि पहल गर्नेछु ।

मिलन लुइँटेल, वडा नम्बर ७, नेकपा माओवादी केन्द्र
– कृषि र सहकारी क्षेत्रमा प्राप्त गरेको अनुभवको आधारमा ती क्षेत्रको उत्थानमा विशेष पहल गर्नेछु,
– युवाको मर्म र भावनाअनुरुप काम गर्नेछु,
– हरेक वर्ष ३० जनालाई जेटीए र ३० जनालाई भेटेनरीको निःशुल्क तालीमको व्यवस्था गर्नेछु,
– ५ वर्षभित्रमा गछिया खोलाको ८० प्रतिशत तटबन्धको काम पूरा गर्नेछु,
– कृत्रिम गर्भाधान निःशुल्क गर्ने व्यवस्था गर्नेछु,
– हरेक वर्ष कम्तीमा ५ सय परिवारलाई निःशुल्क स्वास्थ्य बीमा सेवा उपलब्ध गराउनेछु ।
– ८० वर्षमाथिका ज्येष्ठ नागरिकलाई घरमै सामाजिक सुरक्षा भत्ता वितरण गर्ने व्यवस्था मिलाउनेछु,
– मातृ शिशु आहार कार्यक्रम शुरु गर्नेछु ।