विराटचोकः नेपाल राष्ट्र बैंकले जेठ महिनादेखि लागू हुने गरी बैंक तथा वित्तीय संस्था शनिबार र आइतबार सार्वजनिक दिने निर्णय गरेको छ । राष्ट्र बैंकका गभर्नरको आज (बैशाख २८ गते)को स्वीकृतिबमोजिम सो निर्णय गरिएको हो ।
त्यस्तै, दशैँ र तिहारका सार्वजनिक बिदाबाहेक अन्य बिदा लगातार दुई दिनभन्दा बढी भएमा तेस्रो दिनदेखि बैंक विभाग र मुद्रा व्यवस्थापन विभाग (टक्सार महाशाखासमेत) बाट प्रवाह हुने सेवा, भुक्तानी प्रणाली विभागबाट हुने आटीजीएस सेवा सञ्चालन हुने भएका छन् । मौद्रिक व्यवस्थापन विभागबाट हुने सेवालगायत अन्य अत्यावश्यक सेवा तथा प्रदेशस्थित कार्यालयको अत्यावश्यकीय बैंकिङ सेवालाई नियमित गर्न सीमित सङ्ख्यामा कर्मचारीलाई खटाई निर्धारित कार्यालय समयसम्म सञ्चालन गर्नुपर्ने पनि राष्ट्र बैंकले निर्देशन दिएको छ । ती सेवा सञ्चालनमा सहयोग गर्न सूचना प्रविधि विभागले आवश्यक परेमा आवश्यकताअनुसार कर्मचारी खटाउन पनि निर्देशन दिइएको छ ।
आइतबार सार्वजनिक बिदा दिइने भएपछि जेठबाट कार्यालय समय बिहान साढे ९ बजेदेखि अपराह्न्न साढे ५ बजेसम्म कायम गरिएको छ । कात्तिक १६ गतेदेखि माघ १५ गतेसम्म भने कार्यालय सयम बिहान साढे ९ बजेदेखि दिउँसो साढे ४ बजेसम्म बैंक खुला हुने भएका छन् । ती तीन महिनामा शुक्रबार भने बिहान साढे ९ बजेदेखि बेलुका साढे ३ बजेसम्म कार्यालय सञ्चालन हुनेछन् ।
विभाग, कार्यालय, महाशाखा र इकाइले प्रत्यक्ष सेवाग्राहीले एकैदिनमा सम्पन्न हुने एकै सेवाका लागि थप अर्को साता कार्यालय आउनुपर्ने अवस्था सिर्जना हुन नदिने सुनिश्चतता गरी कार्य व्यवस्थापन गर्न केन्द्रीय बैंकले निर्देशन दिएको छ ।
हप्ताभरि सम्पन्न गरिएका कार्यहरुको सूची तथा सेवा प्रवाहको संख्या अध्ययन तथा मूल्याङ्कनका लागि अभिलेख राख्न पनि राष्ट्र बैंकले सूचनामा उल्लेख गरेको छ । प्रकाशित सूचनामा नेपाल राष्ट्र बैंकको जनशक्ति व्यवस्थापन विभागका कार्यकारी निर्देशक तुलसीप्रसाद घिमिरेले हस्ताक्षर गरेका छन् ।
You must be logged in to post a comment Login