विराटचोकः नेपाल तामाङ घेदुङको पहिलो अधिवेशनमा सहभागी भएका वक्ताले तामाङ जातिमा चेतना जगाउन शिक्षामा जोड दिनुपर्नेमा वक्ताले जोड दिएका छन् ।

कार्यक्रमको औचित्यमाथि प्रकाश पार्ने क्रममा प्रदेश अध्यक्ष मित्रसेन योञ्जनले अरुलाई गाली गर्नुभन्दा पनि आफू शिक्षित भएर सक्षम हुनुपर्नेमा जोड दिए ।

भाषा साहित्य प्रमुख काजीमान थिङले तामाङ जाति नाचगानमा बढी सक्रिय हुने तर शिक्षा लिने क्रममा पछि पर्ने हुनाले समाजमा पछि परेको बताए । तामाङ जाति पछि परेकै कारण र प्रतिवाद गर्न नसकेकै कारण तामाङ जातिको चाड ल्होसारमा दिने बिदा पनि नेपाल सरकारले कटौती गरेको उनले बताए ।

घेदुङका सङ्घीय अध्यक्ष मोहन गोलेले जनसङ्ख्यामा पाँचौँ स्थानमा रहेको तामाङ जाति शिक्षामा भने ५८ औं स्थानमा रहेको उल्लेख गरे । सबै वक्ताले तामाङ जातिमा शिक्षाको पहुँच बढाउनुपर्ने बताए ।

घेदुङका प्रदेश सहसचिव विपिन स्याङ्बोले गणतन्त्र ल्याउन बलिदानी दिने तामाङ जातिलाई अहिले सरकारले उपेक्षा गरेको बताए ।

सुन्दरहरैंचाका नगरप्रमुख शिवप्रसाद ढकालले आदिवासी जनजातिको हक हितका लागि सहयोग गर्न स्थानीय सरकार सदैव लागिपर्ने बताए । त्यस्तै, लक्ष्मण तामाङले प्रदेशको नाम जातीय पहिचानको आधारमा राखिनुपर्ने बताए ।

प्रदेश सांसद राजकुमार ओझाले प्रदेश विधेयक बनेपछि सबै भाषाभाषीको सम्मान हुने उल्लेख गरे । संसद क्षेत्र विकास पूर्वाधार कोषमार्फत् १० लाख रुपैयाँ विराटचोकमा बन्ने रिन्छेन छ्योलिङ बौद्ध गुम्बाको लागि विनियोजन गर्ने बताए ।

सांसद लोकप्रसाद सङ्ग्रौलाले तामाङ जातिमा राष्ट्रियताको भावना उच्च रहेको उल्लेख गरे । कार्यक्रममा नेकपाका केन्द्रीय सदस्य महेश रेग्मी र नेपाली काङ्ग्रेसका केन्द्रीय सदस्य गुरुराज घिमिरेले पनि सम्बोधन गरेका थिए ।

कार्यक्रममा सुकुना तेक्वान्दो डोजाङका प्रशिक्षार्थीले खेलकौशल प्रस्तुत गरेका थिए । कार्यक्रमको शुरुमा बोम्बो (झाँक्री) नाच प्रस्तुत गरिएको थियो । त्यस्तै, तामाङ सेलोलगायतका सांस्कृतिक कार्यक्रम पनि प्रस्तुत गरिएका थिए ।

आज हुने घेदुङको बन्द सत्रले प्रदेशको नयाँ कार्यसमिति चयन गर्नेछ ।

यो पनि पढ्नुहोस्

मुख्यमन्त्री राई भन्छन्, ‘एउटा नारा र नीतिले मात्रै देश विकास हुँदैन’

नेपाल तामाङ घेदुङको पहिलो प्रदेश सम्मेलन पुस १ र २ गते हुने