युरोपेली च्याम्पियन्स लिग फुटबल अन्तर्गत अन्तिम–१६ को पहिलो लेगमा गएराति भएका खेलमा रियल मड्रिड, पेरिस सेन्ट जर्मेइन (पीएसजी), बोडोग्ल्म्टि विजयी भएका छन् ।

घरेलु मैदानमा भएको खेलमा मड्रिडले म्यानचेस्टर सिटीलाई ३–० गोलले हरायो । मड्रिडका लागि फेडेरिको भाल्भेर्डेले ह्याट्रिक गरे । यो जीतसँगै मड्रिड ८ खेलमा १५ अङ्कसहित तालिकाको नवौँ स्थानमा छ । सिटी ८ खेलमा १६ अङ्कसहित आठौँ स्थानमा छ ।

यस्तै घरेलु मैदानमा भएको खेलमा पीएसजीले चेल्सीलाई ५–२ गोलले हरायो । पीएसजीका खभिचा क्वारत्स्खेलियाले २ तथा ब्राडली बारकोला, ओउसमान डेम्बेले र भितिन्हाले १/१ गोल गरे । चेल्सीका मालो गुस्तो र इनजो फर्नान्डेजले गोल गरे । यो जीतसँगै पीएसजी ८ खेलमा १४ अङ्कसहित तालिकाको ११औँ स्थानमा छ । चेल्सी ८ खेलमा १६ अङ्कसहित छैटौँ स्थानमा छ ।

यस्तै घरेलु मैदानमा भएको खेलमा बोडोग्ल्म्टिले स्पोर्टिङलाई ३–० गोलले हरायो । बोडोग्ल्म्टिका सोन्ड्रे ब्रुनस्ट्याड, ओले डिड्रिक ब्लुमबर्ग र कास्पेर होगले गोल गरे । यो जीतसँगै बोडोग्ल्म्टि ८ खेलमा ९ अङ्कसहित तालिकाको २३औँ स्थानमा छ । स्पोर्टिङ ८ खेलमा १६ अङ्कसहित सातौँ स्थानमा छ ।

यस्तै हिजो भएको पहिलो खेलमा घरेलु टोली लेभेरकुसेन र आर्सनलबीचको खेल १–१ गोलको बराबरीमा सकिएको छ । लेभेरकुसेनका रोबर्ट एन्ड्रिच र आर्सनलका काई हाभेर्ट्जले गोल गरे । यो बराबरीसँगै आर्सनल ८ खेलमा २४ अङ्कसहित शीर्ष स्थानमा यथावत् छ । लेभेरकुसेन ८ खेलमा १२ अङ्कसहित १६औँ स्थानमा छ ।

च्याम्पियन्स लिगमा आर्सनल २४ अङ्कसहित शीर्ष, बायर्न म्युनिख २१ अङ्कसहित दोस्रो र लिभरपुल १८ अङ्कसहित तेस्रो स्थानमा छन् ।

सर्वोच्च अदालतले राष्ट्रिय स्वतन्त्र पार्टीका सभापति रवि लामिछानेको दुई अभियोगपत्र संशोधनका लागि महान्यायाधिवक्ताले गरेको निर्णय विरुद्धको रिट पूर्ण सुनुवाइका लागि पठाउने आदेश गरेको छ ।

न्यायाधीशद्वय सपना प्रधान मल्ल र श्रीकान्त पौडेलको इजलासले चैत १ गते पेसी तोक्न आदेश गरेको हो । महान्यायाधिवक्ता सविता भण्डारीले पुस ३० गते लामिछानेविरुद्ध कास्की, काठमाण्डौ, रुपन्देही र पर्सा जिल्ला अदालतमा दायर मुद्दाहरूमा सङ्गठित अपराध र सम्पत्ति शुद्धीकरणको दाबी हटाउने गरी अभियोगपत्र संशोधन गर्ने निर्णय गरेपछि वरिष्ठ अधिवक्ता दिनेश त्रिपाठीसहितले सर्वोच्च अदालतमा रिट दायर गरेका थिए ।

रिटमा महान्यायाधिवक्ताको निर्णयलाई प्रथम दृष्टिमै गैरकानूनी, बदनियतपूर्ण र स्वेच्छाचारी भन्दै बदर गर्न माग गरिएको छ । सम्पत्ति शुद्धीकरणसम्बन्धी मुद्दा फिर्ता लिन संहिताको दफा ११६ ले रोक लगाएको अवस्थामा दफा ३६ को आधारमा अभियोग संशोधन गर्नु कानूनको कपटपूर्ण प्रयोग भएको रिटको दाबी छ ।

यस्तो गम्भीर आर्थिक अपराधमा उन्मुक्ति दिँदा नेपाल अन्तर्राष्ट्रिय वित्तीय कारबाही कार्यदलको कालोसूचीमा पर्ने र हजारौं बचतकर्ताको न्याय पाउने अधिकार खोसिने रिटमा उल्लेख छ ।

संयुक्त राष्ट्रसङ्घले आराेग्य दिवससम्बन्धी नेपालको प्रस्ताव पारित गरेको छ । महासभाले आज प्रस्ताव पारित गरेको हो । अब विश्वका विभिन्न देशमा हरेक वर्ष अप्रिल १५ तारिखमा यो दिवस मनाइनेछ ।

राष्ट्रसङ्घका लागि नेपालका स्थायी प्रतिनिधि लोकबहादुर थापाका अनुसार नेपालले गरेको प्रस्तावमा स्वास्थ्य भन्नाले केवल रोग नलाग्नु मात्र नभई शारीरिक, मानसिक, सामाजिक, सांस्कृतिक, भावनात्मक तथा पर्यावरणीय समग्र कल्याणलाई जनाउने उल्लेख छ ।

राजदूत थापाका अनुसार आरोग्य दिवससम्बन्धी प्रस्तावले विश्वभर सुदृढ र दिगो समाज निर्माणका लागि रोकथाममुखी स्वास्थ्य सेवा, स्वस्थ जीवनशैली तथा समावेशी स्वास्थ्य प्रणाली प्रवर्द्धन गर्नुपर्ने आवश्यकतामा पनि जोड दिएको छ ।

यो प्रस्ताव पारित गर्ने प्रक्रियामा सहयोग र समर्थन गर्ने देशहरूप्रति आभार व्यक्त गर्दै राजदूत थापाले यो नेपालका लागि महत्त्वपूर्ण कूटनीतिक उपलब्धि भएको बताउनुभएको छ ।