तस्बिरः राष्ट्रिय खेलकुद परिषद
इनरुवाः सुनसरीको इनरुवा नगरपालिका र मनमोहन मेमोरियल क्रिकेट सेन्टर प्रदेश १ कमिटीको संयुक्त आयोजनामा दोस्रो मनमोहन स्मृति राष्ट्रिय एक दिवसीय पुरुष क्रिकेट प्रतियोगिता पुस १५ गतेदेखि सुनसरीको इनरुवामा हुने भएको छ ।

इनरुवा रंगशालामा हुने प्रतियोगितामा तीन विभागीय टोली (आर्मी÷पुलिस÷एपीएफ), सातै प्रदेश, मलेसियाको राष्ट्रिय टिम र आयोजक गरी १२ टिमले लिग कम नकआउट आधारमा प्रतिस्पर्धा गर्ने बताइएको छ । सहभागी टिमलाई ४ समूहमा विभाजन गरिने र समूहको शीर्ष टिम सोझै सेमीफाइनलमा पुग्ने जनाइएको छ ।

उपाधी विजेताले ४ लाख ५ हजार, उपविजेताले २ लाख ५ हजार तथा सेमीफाइनलमा पराजित हुने टिमले समान ३० हजार नगद पुरस्कार पाउने भएका छन् । प्रत्येक खेलको ‘म्यान अफ द म्याच’ लाई ३ हजार ५ सय नगद र ‘म्यान अफ द सिरिज’ लाई नगद ५५ हजार दिइने जनाइएको छ ।

प्रतियोगिताले इनरुवालाई चिनाउन अझ सहयोग पुग्ने विश्वास राष्ट्रिय खेलकुद परिषद्का सदस्य–सचिव रमेशकुमार सिलवालले पत्रकार सम्मेलनमा लिए । इनरुवा नगरपालिका मेयर राजन मेहताले प्रतियोगितालाई सफलतापूर्वक सम्पन्न गर्न सक्दो सहयोग गर्ने बताए ।

मनमोहन मेमोरियल क्रिकेट सेन्टरका अध्यक्ष ठाकुर गैरेले पुरुष क्रिकेट आयोजना गर्दै आइरहेकोमा अब महिला क्रिकेट आयोजनामा पनि सेन्टरले ध्यान दिने बताए । प्रतियोगिता सञ्चालन गर्न १ करोड २५ लाख २ हजार ५ सय खर्च हुने आयोजकले अनुमान गरेको छ ।