विराटचोकः नागरिक उड्डयन प्राधिकरणले चालु आर्थिक वर्षमा देशका विभिन्न विमानस्थलको रन–वे, ट्याक्सी–वे तथा एप्रोन (पार्किङ) निर्माणका लागि एक अर्ब २३ करोड ७६ हजार रूपैयाँ बजेट विनियोजन गरेको छ । टर्मिनल भवन निर्माणका लागि मात्र प्राधिकरणले एक अर्ब ५० करोड रूपैयाँ बजेट विनियोजन गरेको छ ।

अन्तर्राष्ट्रिय तथा आन्तरिक विमानस्थलको स्तरोन्नति, टर्मिनल भवन निर्माण लगायत संरचना निर्माण प्राथमिकतामा राखिएको प्राधिकरणले जनाएको छ ।
कुन विमानस्थलका लागि कति बजेट ?

ताप्लेजुङको सुकेटार विमानस्थलमा धावनमार्ग विस्तारका लागि यस वर्ष ७० करोड बजेट छुट्याइएको छ ।

चन्द्रगढी विमानस्थलको डिभिओआर÷डिएमईसम्म (जहाजको स्थिति, ठाउँ र सञ्चार सुविधा) पुग्ने बाटो तथा सवारी पार्किङ क्षेत्र विस्तारका लागि ३० लाख रूपैयाँ बजेट विनियोजन गरिएको छ ।

विराटनगर विमानस्थलमा धावनमार्ग विस्तार तथा ट्याक्सी–वे सुधारका लागि तीन करोड रूपैयाँ छुट्याइएको छ ।

ताप्लेजुङको सुकेटार विमानस्थलका लागि दुई करोड रूपैयाँ विनियोजन भएको छ ।

उदयपुरमा सगरमाथा विमानस्थल निर्माणका लागि चार करोड १५ लाख रूपैयाँ विनियोजन गरिएको छ ।

संखुवासभाको तुम्लिङटार विमानस्थलमा ल्यान्ड–स्केपिङका लागि ५० लाख रूपैयाँ विनियोजन गरिएको छ ।

राजविराज विमानस्थलमा चेनलिंक फेन्स बनाउन एक करोड ५० लाख रुपैयाँ विनियोजन भएको छ ।

बझाङ विमानस्थलमा चेनलिंक फेन्सका लागि एक करोड ३२ लाख रूपैयाँ छुट्याइएको छ ।

मुगुको रारा विमानस्थलमा एप्रोन तथा धावनमार्गको पूर्वपट्टी पहिरो नियन्त्रणका लागि नौ करोड ९६ लाख ४६ हजार रूपैयाँ विनियोजन भएको छ । रारा विमानस्थलमा स्लरी सिल गर्न दुई करोड बजेट विनियोजन भएको छ ।

दार्चुलाको गोकुलेश्वर विमानस्थललाई दुई करोड ६५ लाख रूपैयाँ छुट्याइएको छ ।

महेन्द्रनगर विमानस्थललाई २४ करोड ४२ लाख र कमलबजार विमानस्थललाई एक करोड रूपैयाँ सुदृढीकरणका निम्ति छुट्याइएको छ ।

बहुवर्षीय आयोजना अन्तर्गत भरतपुर विमानस्थलको धावनमार्ग विस्तारका लागि १२ करोड रूपैयाँ, अर्घाखाँची विमानस्थलको धावनमार्ग, ट्याक्सी–वे, एप्रोन, कालोपत्रे तथा फेन्सिङ ड्रेनेज बनाउन ६ करोड २२ लाख रूपैयाँ प्राधिकरणले छुट्याएको छ ।

बाजुरा विमानस्थलमा स्लरी सिलका लागि दुई करोड रूपैयाँ छुट्याइएको छ ।

हुम्लाको सिमकोट विमानस्थलमा एप्रोन (पार्किङ) विस्तार गर्न प्राधिकरणले ६ करोड रुपैयाँ बजेट छुट्याएको छ ।

दाङ विमानस्थल सुदृढीकरण तथा विस्तारका लागि एक करोड ९४ लाख रूपैयाँ विनियोजन भएको छ ।

भक्तपुरको नलिञ्चोकमा हेलिप्याड बनाउन १५ करोड रूपैयाँ विनियोजन गरिएको छ ।

कालिकोट विमानस्थलमा कालोपत्रे लगायत अन्य कामका लागि चार करोड २५ लाख रूपैयाँ विनियोजन भएको छ । कालिकोट विमानस्थलमा नै रिटेनिङ वाल तथा ड्रेन बनाउन ५० लाख रूपैयाँ छुट्याइएको छ ।

सिमरा विमानस्थलमा बाटो (पेरिफेरि र एक्सेस रोड), धावनमार्ग, ट्याक्सी–वे ओभर–लेका निर्माणका लागि आठ करोड रूपैयाँ छुट्याइएको छ ।

जोमसोम विमानस्थलमा नदी नियन्त्रण तथा विमानस्थल सुदृढीकरणका लागि चार करोड ४२ लाख रूपैयाँ विनियोजन भएको छ ।

डोल्पाको जुफाल विमानस्थलको धावनमार्ग स्तरोन्नतिका लागि तीन करोड रूपैयाँ विनियोजन भएको छ ।

सुर्खेत भेरीगंगा रामघाट विमानस्थल निर्माणका लागि ४ करोड ४२ लाख ४७ हजार रूपैयाँ बजेट विनियोजन भएको छ ।