केराबारीः जिल्ला समन्वय समिति मोरङका अध्यक्ष अजम्बर राईले आफूले बाँसको खबटा, ढोड, सल्लाको खोटो र दाउरा बालेर पढ्नु परेको कुरा विद्यालयका बालबालिकालाई सुनाए । अहिलेको पुस्तालाई विगतको स्मरण गराउने उद्देश्यले सोमबार मोरङको केराबारीमा भएको अन्तरपुस्ता संवाद कार्यक्रममा उनले आफ्नो विगत सुनाएका हुन् ।

दशैंमा मात्रै नयाँ कपडा लगाएको, १० वर्षको उमेरदेखि मात्रै विद्यालय गएको, पाटीमा खरीले लेखेर पढेको, विराटनगरमा क्याम्पस पढ्दा १० पैसामा भक्का खाएको, महिनामा ५० रुपैयाँले खर्च पुर्याउनुपर्ने भएकाले महिनौ मासु खान नपाएको आफ्नो कहानी उनले सुनाएका थिए । त्यस्तै राजनीतिक आन्दोलनमा सहभागी हुँदा जनवादी गीतको प्रभावले कम्युनिष्टतर्फ लागेको समेत उनले सुनाएका थिए । कार्यक्रमको प्रमुख अतिथिको रुपमा रहेका राईले आफ्नो बाल्यकादेखिको कुरा स्मरण गराएका थिए ।

कार्यक्रमका विशिष्ट अतिथि केराबारी गाउँपालिकाका अध्यक्ष सुमन मिरिचिङले बाल्यकालको अवस्था सुनाउनुको साथै युवावस्थामा भएको वैदेशिक रोजगारको यात्रा फलदायी नभएको बताए । त्यो विभिन्न देश घुम्ने बाहेक कुनै प्रगति नभएको र विदेश जाने होइन नेपालमै काम गर्नुपर्छ भन्ने शिक्षा दिन सफल भएको बताए । उनले स्वदेशमै श्रम गर्न र श्रमको सम्मान गर्न विद्यार्थीलाई सुझाव दिएका थिए । काम गर्न लजाउने अवस्थाले समाज पछि परेको उनको भनाइ थियो ।

केही वर्ष विदेश बसे पनि समय आएपछि परिवार, समाज र देश निर्माणको जिम्मेवारी देखेर राजनीतिमा लागेको उनले सुनाए । ५ वर्षमा केराबारीको मुहार फेरेर देखाउने समेत उनले बताए । उनले गाउँपालिकाले दुर्व्यसनमा लाग्ने युवालाई लक्षित गरेर कार्यक्रम ल्याएर यसलाई नियन्त्रण गर्ने बताए । गाउँपालिकाले युवा लक्षित विभिन्न कार्यक्रम ल्याएको बताउँदै समृद्ध गाउँपालिका निर्माणमा आफू लागिपर्ने उनले बताए ।

कार्यक्रममा सहभागी अधिकांशले आफूले खेल्ने खेलमा परिवर्तन आएको बताएका थिए । पहिले भाले जुधाइ, कबड्डीका साथै मोजाको फुटबल बनाएर खेल्ने गरेको बताए । मोवाइल, टिभी, रेडियो समेत नहुने भएकाले अहिले जस्तो आधुनिक परिवेश नभएको उनीहरुले बताएका थिए । त्यो समय धेरै दुःख भएकाले पढ्ने अवसर नपाएको र गाईवस्तु हेर्न जानु परेको गाउँपालिकाकी निवर्तमान उपाध्यक्ष शान्ति भुजेलले बताइन् । अहिले भने स्मार्ट जमना आएको उनको भनाइ थियो ।

कार्यक्रममा गाउँपालिका उपाध्यक्ष मनमाया मगरले १४ वर्षमा विवाह गरेर १५ वर्षमा आमा बन्नुपर्दाको अप्ठ्यारो सुनाएकी थिइन् । ठूलो परिवार भएको तथा आफूले केही काम गर्न नजान्नु पर्दाको अप्ठ्यारको बारेमा आफ्नो अनुभव उनले सुनाएकी थिइन् । विवाह गर्नको लागि कानुनले तोकेको उमेर पूरा गरेर आफू आत्मनिर्भर भएपछि मात्रै विवाह गर्न उनले सुझाएकी थिइन् ।

कार्यक्रममा सहभागी बालबालिकाले पनि आफ्नो अनुभव सुनाएका थिए । उनीहरुले पढाइको अवस्था, सानो उमेरमा खेलेका खेल र अहिलेको अवस्थाको बारेमा अनुभव सुनाएका थिए ।

मोरङको केराबारीमा ‘अन्तरपुस्ताको ऐक्यबद्धता सबै उमेर समूहमैत्री विश्व निर्माणमा साझा प्रतिबद्धता’ भन्ने नाराका साथ अन्तर पुस्ता संवाद कार्यक्रम सम्पन्न भएको हो । केराबारी गाउँपालिका र राष्ट्रिय युवा परिषद् नेपाल जिल्ला कार्यसमिति मोरङको संयुक्त आयोजनामा सोमबार भएको कार्यक्रममा विभिन्न विद्यालयका ३५ विद्यार्थीको सहभागिता रहेको थियो ।

कार्यक्रम आयोजक राष्ट्रिय युवा परिषद् मोरङका अध्यक्ष सन्तोष घिमिरेको अध्यक्षतामा भएको थियो ।