विराटचोकः ३७ हजार फिटको उचाइमा दुई पाइलटहरू निदाउँदा उनीहरूले धावनमार्ग छुटाएको एउटा उड्डयन सम्बन्धी पत्रिकाले जनाएको छ । तर उनीहरू ब्युँझिएपछि विमान सुरक्षित रूपमा अवतरण भएको छ ।

विमान उचाइ घटाउनुपर्ने विन्दु पार गरेर अगाडि बढेपछि इथियोपियाको आदिस अबाबा विमानस्थलका एअर ट्राफिकले सम्पर्क गर्ने प्रयास गरेका थिए ।
एभिएशन हेराल्डका अनुसार अन्ततः पाइलटहरू ब्युँझे र दोस्रो पटकमा विमानलाई अवतरण गराएका थिए ।

सरकारी सञ्चारमाध्यम फनाका अनुसार इथियोपियन एअरलाइन्सका ती पाइलटलाई अनुसन्धान रोकेर बिदामा राखिएको छ ।

यात्रुवाहक सो विमान अघिल्लो यही अगस्ट १५ मा सुडानको खार्तुम विमानस्थलबाट उडेको थियो ।

१५४ सीट क्षमताको उक्त बोइङ ७३७ विमानले दुई देशबीचको उक्त हवाई मार्गमा सामान्यतः दुई घण्टाभन्दा कम समय लगाउँछ ।

त्यस घटनाप्रति पाइलटहरूको कामको दैनिकीलाई लिएर सहानुभूति प्रकट गर्नेदेखि त्यस्तो जिम्मेवारीमा पनि निदाएको भन्दै अचम्मित हुने गरी प्रतिक्रिया आएका छन् ।

एभिएशन हेराल्डको वेबसाइट रहेको एउटा प्रतिक्रियामा भनिएको छः ‘मैले इथियोपियाली चालक दललाई खासगरी यहाँ दोष लगाउँदिनँ – यस्तो संसारमा जुनसुकै चालक दललाई हुन सक्छ र सम्भवतः भएको पनि छ । गल्ती कम्पनी र नियमनकर्ताहरूको छ ।’

अर्का एकजनाले त्यसको एकमात्र समाधान रहेको बताउँदै भनेका छन्, ‘बर्खास्त । कुरै सकियो ।’

अन्यले यस घटनाको रमाइलो पक्ष भन्दै ट्वीटरमा लेखेका छन्, “यस काममा निदाउने कुरालाई नयाँ उचाइमा पु¥याइएको छ !’

एक जना उड्डयन विश्लेषकले यस घटनालाई निकै चिन्ताजनक भन्दै ट्वीट गरेका छन् ।

‘पाइलटहरू थकित हुने कुरा कुनै नयाँ होइन र यसले अन्तर्राष्ट्रिय रूपमा हवाई सुरक्षाका लागि सबैभन्दा ठूलो जोखिम देखाइरहेको छ,’ उड्डयन विश्लेषक एलेक्स मचेरसले ट्वीटरमा लेखेका छन् । – बीबीसीबाट