इटहरीः स्व. जयनन्द लामा अभिनित फिल्म अभियानको पहिलो पटक प्रिमियर शो गरिने भएको छ । कोशी भिजन फिल्मस्को ब्यानर तथा ऐतिहासिक तामाङ थाकथलो ‘किपट’ को कथामा निर्माण भएको फिल्म भोलि भदौ १८ गते इटहरीको इलाइट सिनेमा हलमा प्रिमियर शो हुन लागेको हो ।

दिउँसो २ बजे हुने प्रिमियर शोको अघि रेड कार्पेट पनि गरिने फिल्मका निर्माता तथा निर्देशक लाखमान योन्जन तामाङले बताए । भदौ २५ गते तरहरामा र असोज १० गते काठमाडौको जमलमा प्रिमियर शो गरिने बताइएको छ ।

फिल्मको यसअघि एक ट्रेलर र पोस्टर इटहरीमा एक पत्रकार सम्मेलन गरि सार्वजनिक गरिएको थियो । लाखमान योन्जन तामाङको लेखन तथा निर्देशन रहेको ‘अभियान’ निर्माणमा ५५ लाख रुपैयाँ लगानी लागेको जनाइएको छ । ट्रेलर रिलिज तथा सेन्सर पास भए पनि फिल्मको प्रदर्शन मिति भने तय भएको छैन ।

मैना घिसिङ निर्माता रहेको फिल्ममा स्व. जयनन्द लामाका साथमा अमर पाख्रिन तामाङ, पूजा तामाङ, दावा फिन्जो तामाङ, श्याममाया तामाङ, रश्मिला वाइबा तामाङ, सन्तोष सराकार, रितेशजंग खत्री, दिनेश तामाङ, दिनेश कोइराला, मदन राई, शम्भु योन्जन तामाङ, गजम घिसिङ, कमल राई, मेनुका राई, कुमारी लिम्बू, कृष्ण काफ्ले, सन्तोष राई, नुनु बोम्जन तामाङ लगायतको अभिनय रहेको छ ।

निर्देशक लामाले नै फिल्मका लागि २ वटा गीत लेखेका छन् । ती गीतमा दीपा लामा, जोनी तामाङ, सुरज रौनियारको स्वर रहेको छ । संगीत तथा एरेन्ज कुन्दन राई र जोनी तामाङको रहेको छ । राजेश लेप्चाको द्वन्द्व निर्देशन रहेको चलचित्रलाई सुमन तामाङले छायाङ्कन गरेका हुन् । चलचित्रको सम्पादन हेमन तामाङले गरेका छन् ।