विराटचोकः मंसिर ४ गते हुने प्रतिनिधि सभा र प्रदेश सभाको निर्वाचनका लागि नेकपा एमालेले मोरङका ६ संघीय निर्वाचन क्षेत्र र १० प्रदेश सभाका लागि उम्मेद्वार टुङ्गो लगाएको छ । २ क्षेत्रमा भने उम्मेद्वारको टुङ्गो लाग्न बाँकी छ । तर एमालेले त्यसलाई सार्वजनिक भने गरेको छैन ।
एमालेका एक नेताका अनुसार २ वटा निर्वाचन क्षेत्रमा भने उम्मेद्वारको टुुङ्गो लाग्न सकेको छैन । प्रदेश सभाका लागि क्षेत्र नम्बर १ र क्षेत्र नम्बर २ को (क) मा उम्मेद्वारको टुङ्गो लाग्न नसकेपछि ती क्षेत्रका लागि पार्टी अध्यक्ष केपी ओलीलाई उम्मेद्वारको टुङ्गो लगाउने गरी जिम्मेवारी दिइएको छ ।
एमाले स्रोतका अनुसार पार्टीले मोरङ क्षेत्र नम्बर १ मा घनश्याम खतिवडालाई उठाउने भएको छ । क्षेत्र नम्बर २ मा ऋषिकेश पोखरेल, क्षेत्र नम्बर ३ मा भानुभक्त ढकाल, क्षेत्र नम्बर ४ विनोद ढकाल, क्षेत्र नम्बर ५ मा योगेन्द्र मण्डल र क्षेत्र नम्बर ६ मा लालबाबु पण्डितलाई एमालेले चुनावी मैदानमा अघि सार्ने भएको छ ।
उता, प्रदेश सभाका लागि क्षेत्र नम्बर १ (क) मा रुपेश खतिवडा र क्षेत्र नम्बर २ को (ख) मा लीलाबल्लभ अधिकारीको नाम टुङ्गो लागेको छ ।
क्षेत्र नम्बर ३ मा ज्ञानेन्द्र सुवेदी र रामकुमार बस्नेत, क्षेत्र नम्बर ४ मा जीवन घिमिरे र जयप्रकाश राजवंशीले टिकट पाउने लगभग पक्का भएको छ । क्षेत्र नम्बर ५ मा ज्ञानेश्वर राजवंशी र मोहम्मद दिलशाद तथा क्षेत्र नम्बर ६ मा नागेश पोखरेल र कृष्ण बस्नेत (पर्शुराम)ले टिकट पाउने भएका छन् ।
क्षेत्र नम्बर १ र २ मा थप एकएक जना उम्मेद्वारको नाम टुङ्गो लागेपछि सबै उम्मेद्वारको नाम सार्वजनिक गरिने बताइएको छ ।
You must be logged in to post a comment Login