पोखराः नवौं राष्ट्रिय खेलकुद प्रतियोगिताको पुरुष फुटबलमा एपीएफ क्लबले आर्मीलाई सडन डेथमा हराउँदै स्वर्ण पदक जितेको छ ।

पोखरा रंगशालास्थित फुटबल मैदानमा भएको अत्यन्तै प्रतिष्पर्धात्मक फाइनल खेलको निर्धारित समय गोलरहित बराबरीमा रोकिएपछि अतिरिक्त समय थप गरिएको थियो । उक्त समयमा समेत गोल हुन नसकेपछि खेल टाइब्रेकरमा धकेलिएको थियो ।

एपीएफको जीतमा गोरक्षक राजु नगरकोटी नायक बने । उनले २ पेनाल्टी प्रहारलाई बचाउ गर्दै टोलीलाई स्वर्ण दिलाएका हुन् ।

एपीएफका लागि नवीन लामा, आवास लामिछाने, सुदिल सिर्खाकार, गोलरक्षक राजु नगरकोटी, रितेश धिमाल र विश्वास उदासले गोल गरे । सनिस श्रेष्ठको प्रहार बाहिरियो ।

आर्मीका नवयुग श्रेष्ठ, जर्ज प्रिन्स कार्की, सीमान्त थापा, विवेक बस्नेत र विकास खवासले गोल गर्दा सुमन अर्याल र सेसेहाङ आङदेम्बेको प्रहार एपीएफका राजु नगरकोटीले बचाउ गरे ।

आर्मीका सेसेहाङ आङदेम्बेको प्रहार राजुले बचाउ गरे पनि अघि बढेको भन्दै पुनः प्रहारको अवसर प्राप्त गरेको थियो । दोस्रो प्रहारलाई समेत उनले बचाउ गरे । १४ औं मिनेटमा नवयुगले उत्कृष्ट ओभरहेड किक प्रहार गर ेपनि दोस्रो बार नजिकैबाट बाहिरियो ।

३३ औं मिनेटमा एपीएफका मणि लामाले गरेको उत्कृष्ट प्रहारलाई आर्मीका गोलरक्षक विकेश कुथुले उत्कृष्ट बचाउ गरे । उनले डाइभ गर्दै बचाउ गर्दा रिवाउन्ड भएको बललाई नवीन लामाले प्रहार गर्न खोज्दा असिस्टेन्ट रेफ्रीले अफसाइडको संकेत गरे ।

३५ औं मिनेटमा आर्मीका सुमन अर्यालले डि एरिया क्षेत्रमा गल्ती गर्दा एपीएफका प्रदीप लामा गोल गर्नबाट चुके । उनको प्रहार बाहिरियो । ४० औं मिनेटमा मणि लामाको सेन्टरलाइन नजिकैको फ्रिकिक प्रहार सोझै गोलरक्षक विकेश कुथुको हातमा पुग्यो ।

४९ औं मिनेटमा दिनेश हेन्जनको कर्नरमा विकास तामाङको हेडर एपीएफका गोलरक्षक राजु नगरकोटीले बचाउ गरे । ५८ औं मिनेटमा एपीएफका मणि लामाले निकालिदिएको उत्कृष्ट पासमा आर्मीका गोलरक्षक विकेश अघि बढ्दै बचाउ गर्न खोजे पनि एपीएफका विकु तामाङले नवीनलाई पास दिए पनि गोल गर्नबाट चुके । नवीनले नियन्त्रणमा लिँदै प्रहार गरेको बल आर्मीका सुमन अर्यालले हेड गर्दै टोलीको सङ्कट टारे । ६१ औं मिनेटमा हरि कार्कीको प्रहार विकेशले उत्कृष्ट बचाउ गरे ।

६६ औं मिनेटमा प्रिन्स कार्कीको कर्नरमा सेसेहाङ आङ्देम्बेको ओभरहेड किक प्रहारमा सुदिल राईको हेड बाहिरियो । ७० औं मिनेटमा नवयुगको पासमा प्रिन्सको प्रहार पहिलो बार नजिकैबाट बाहिरियो । ७२ औँ मिनेटमा आवास लामिछानेको पासमा प्रदीप लामाको प्रहार क्रसबार नजिकैबाट बाहिरियो । ८४ औँ मिनेटमा आर्मीका प्रिन्स कार्की र सुदिल राई खाली भएको अवस्थामा एपीएफका गोलरक्षक राजु निकै अघि बढी क्लियर गर्दै गोल हुनबाट जोगाए । ८५ औं मिनेटमा सीमान्त थापाले सुदिललाई उत्कृष्ट पास दिए पनि बल नियन्त्रणमा लिन नसक्दा गोल गर्ने सुवर्ण अवसर खेर गयो ।

निर्धारित ९० मिनेटको समाप्तिपछि थप गरिएको ४ मिनेटमा एपिएफका सनिस श्रेष्ठले सुदिललाई लडाएपछि डिएरिया नजिकै फ्रिकिकको अवसर प्राप्त हुँदा प्रिन्स कार्कीले उत्कृष्ट फ्रिकिक प्रहार गरे पनि गोलरक्षक नगरकोटीले बचाए ।

आर्मीले यसअघि गण्डकी प्रदेशलाई १–० ले हराउँदै फाइनलको यात्रा तय गरेको थियो भने एपिएफले सुदूर पश्चिम प्रदेशलाई ५–१ को फराकिलो गोल अन्तरले पाखा लगाएको थियो । पुरुष फुटबलमा गण्डकीले सुदूरपश्चिम प्रदेशलाई १–० को गोल अन्तरले हराउँदै कास्य जितेको छ ।