विराटचोकः चुनावी आमसभालाई सम्बोधन गर्ने क्रममा विभिन्न जिल्लामा पुग्ने क्रममा सुन्दरहरैंचाको गछियामा आएका नेकपा माओवादी केन्द्रका अध्यक्ष प्रचण्डले संयमता अपनाएका छन् । विपक्षीलाई र विशेष गरी पछिल्लो समय नेकपा एमालेलाई गाली गर्ने गरेका प्रचण्डले गछियामा भने संयमता अपनाएका छन् ।

कार्यक्रमको शुरुमै उनले आयोजकको व्यवस्थापन पक्षको सह्राना गरे । ‘यो व्यवस्थित र आकर्षक चुनावी सभाका सभाध्यक्ष महोदय,’ भाषणको शुरुवात्मा यसरी भाषण गरेका प्रचण्डले आफ्नो १४ मिनेट लामो भाषणमा कसैलाई गाली गरेनन् । ‘यहाँहरु सबैलाई म अभिवादन गर्न चाहन्छु । जय नेपाल लालसलाम ।’

आफ्नो भाषणको अन्त्यमा पनि उनले भने, ‘जय नेपाल । लाल सलाम ।’

गठबन्धनका कारण अहिले देशभर गठबन्धनका बाम घटकले पनि जय नेपाल भन्ने गरेको र नेपाली कांग्रेसका नेता तथा कार्यकर्ताले पनि लाल सलाम भन्ने गरेको भन्दै शान्ति सम्झौतापछि नै आफूले जय नेपाल र नेपाली कांग्रेसका तत्कालीन सभापति गिरिजाप्रसाद कोइरालाले लाल सलाम भनेको स्मरण गराउँदै उनले भावनात्मक सम्बन्ध स्थापित गर्न खोजे ।

‘यो जय नेपाल र लाल सलाम भन्ने अहिले देशभर चलेको छ’, उनले विस्तृत शान्ति सम्झौतापछिको घटना स्मरण गर्दै भने, ‘विस्तृत शान्ति सम्झौतामा हस्ताक्षर गरेपछि मैले गिरिजाबाबुतिर फर्केर जय नेपाल भनेको हुँ र गिरिजाबाबुले पनि मपट्टी फर्किएर लाल सलाम भन्नुभएको हो ।’ जति बेला कांग्रेस र कम्युनिष्ट मिले त्यसबेला देशमा ठूला क्रान्ति सफल भएका तर उनीहरु नमिल्दा देशमा समस्या देखिएको उनको भनाइ थियो ।

‘जुन दिन १२ बुँदे शान्ति सम्झौताको दायाँतिर गिरिजाप्रसाद कोइरालाले हस्ताक्षर गर्नुभयो, बायाँतिर मैले हस्ताक्षर गरेँ । त्यो दिन प्रतीकात्मक रुपमा मैले रुख चिह्नमा छाप लगाएको हो र गिरिजाबाबुले कोइरालाले हँसिया हथौडामा छाप लगाउनुभएको हो’, आफ्नो भाषणमा मिठास ल्याउँदै उनले भने, ‘त्यसकारण हामीले रुख र हँसिया हथौडाको साथ छुट्नुहुँदैन ।’

मंसिर ४ गतेको निर्वाचन जनमत संग्रहजस्तै रहेको पनि उनले जनाए । जनतालाई अधिकार दिलाएको वर्तमान संविधानपछि देशले समृद्धिको यात्रा तय गर्छ भन्ने भए पनि आफूले प्रस्ताव गरेका व्यक्ति प्रधानमन्त्री हुँदा संविधान धरापमा परेको बताए । अहिलेको गठबन्धन देशलाई स्थायित्व दिन चाहने र देशलाई पछाडि फर्काउनेबीचको लडाइँको रुपमा रहेको उनको भाइ थियो । संविधानको रक्षा गर्न संयुक्त लोकतान्त्रिक वाम गठबन्धनलाई जिताउनुपर्ने उनले औँल्याए ।

नेपालको पूर्वी क्षेत्र सचेत मतदाता बस्ने क्षेत्र भएको बताउँदै सचेत मतदाताले विवेकपूर्ण ढङ्गले मतदान गर्नुपर्ने उनको भनाइ थियो ।

देशमा राजनीतिक परिवर्तन धेरै भए पनि आर्थिक समृद्धिबिनाको परिवर्तनको औचित्य नदेखिएको उल्लेख गरे । आर्थिक समृद्धिका लागि गठबन्धनका उम्मेद्वारलाई जिताउन आवश्यक रहेको उनले बताए ।

गठबन्धनको तर्फबाट मोरङ क्षेत्र नम्बर ६ मा उम्मेद्वार रहेका नेपाली कांग्रेसका नेता डा. शेखर कोइरालालाई गिरिजाप्रसाद कोइरालाको ‘दाहिने हात’ भन्दै १२ बुँदे शान्ति सम्झौता गराउनमा डा. शेखर कोइरालाको भूमिका महत्वपूर्ण रहेको स्मरण गरे । इमान्दार नेताको रुपमा शेखर कोइराला रहेको भनी आफूले मूल्याङ्कन गरेको उनले सुनाए ।

संघमा कांग्रेसका नेता शेखर कोइराला र प्रदेशमा माओवादी केन्द्रका नेता जीवन आचार्यलाई जिताउन उनले मतदातासमक्ष अनुरोध गरे ।

पूर्वाञ्चल विश्वविद्यालयमा मेडिकल कलेज स्थापना गरेर सञ्चालन गर्ने उनले जनाए ।

गछिया र बुढी खोलाको तटबन्धनका लागि विशेष कार्ययोजना बनाएर कार्यान्वयन प्रक्रिया अघि बढाउन आफू तयार रहेको उनले सुनाए ।

सुकुम्बासी समस्या समाधानका साथै आदिवासी, दलित, जनजातिलगायतका मुद्दाको सम्बोधन गर्न पनि गठबन्धन तयार रहेको उनले सुनाए ।

‘संविधानको रक्षा नेकपा एमालेले गर्न नसक्ने’ भनी घुमाउरो भाषामा भन्नुबाहेक एमालेलाई सिधै गाली नगरी भाषण सकेका उनको भाषण कला एमालेका मत तान्ने रणनीतिको रुपमा रहेको बुझिन्छ ।