बेलबारीः प्रतिनिधि सभामा मोरङ ३ का प्रत्यक्ष उम्मेद्वार डाक्टर सुनिल शर्माले मतदातासँग सहयोगको अपिल गर्दै सबै मतदाताको घरघरसम्म पुग्ने इच्छा भए पनि समयको सीमितताको कारण पुग्न नसकेको भनी व्यस्ततालाई बुझिदिन मतदातासँग आग्रह गरेका छन् ।

‘सबैको घर आँगनमा पुग्न सकिनँ । घरदैलोको क्रममा आँउदा कतिपय मतदाताहरुसँग प्रत्यक्ष भेट हुने अवसर पनि जुरेन ।’ उनले बाली थन्क्याउने समयमा निर्वाचन तोकिएकाले भेटघाट असहज भएको उल्लेख गरेका छन् ।

नेता शेखरचन्द्र थापाको असामयिक निधनले पार्टीलाई अपुरणीय क्षति पुगेको र शोक बोकेर मतदाताहरूसमक्ष पुग्नुपरेको भन्दै स्वर्गीय थापाको योगदान र समर्पणको उच्च मूल्याङ्कन गर्दै थापाले थालेका कामहरूलाई निरन्तरता दिने प्रतिबद्धता उनले व्यक्त गरे ।

निर्वाचन आयोगले तोकिएकै मितिमा मतदान सम्पन्न गर्ने गरी तालिका प्रकाशन गरेको बाध्यात्मक परिस्थितिमा उम्मेद्वारको निधनपछि छोटो समयमा अर्का उम्मेद्वार खडा गर्नुपर्ने परिस्थिति आएको र शोकको कठिन घडीमा पनि शोकाकुल परिवार, तमाम कार्यकर्ता र क्षेत्रवासी मतदाताले देखाएको अदम्य धैर्य र शालीनताको सधैँ उच्च सम्मान गर्ने उनले आफ्नो विज्ञप्तिमा उल्लेख गरेका छन् ।

शोकलाई शक्तिमा बदलेर गठबन्धनका उम्मेद्वारलाई जिताउन उनले अनुरोध गर्दै आफूले बोलेका र घोषणा गरेका कार्यक्रमहरु ईमान्दारिताका साथ कार्यान्वयन गर्न प्रतिबद्ध रहेको उल्लेख गरेका छन् । स्वस्थ आलोचनालाई सधैँ स्वीकार्ने उनले उल्लेख गरेका छन् ।

सुकुम्वासी समस्या, आर्थिक अभावमा उपचार गर्न नसक्ने अवस्थाको अन्त्य गर्नुका साथै शिक्षामा आमूल सुधार गर्ने, कृषिलाई उद्योगको रुपमा बिकास गर्ने, भ्रष्टाचारको अन्त्य गर्ने विषय आफ्नो प्राथमिकतामा पर्ने उनले उल्लेख गरेका छन् ।

आफू यही क्षेत्रमा हुर्केको र विगत लामो समयदेखि यही क्षेत्रमा कार्यरत भएको बताउँदै सांसद भएपछि कुनै तलब र सेवा सुविधा नलिने र चुनाव जितेपछि पनि मतदाताकै बीचमा रहने प्रतिबद्धता उनले व्यक्त गरेका छन् ।

निर्वाचन प्रचार प्रसारको क्रममा कार्यकर्ताले देखाएको समर्थन र सहयोगप्रति उनले कृतज्ञता व्यक्त गरेका छन् ।