मोरक्को अहिलेको समयमा हरेक फुटबलप्रेमीको दिमागमा कोरिएको नाम हो । कारणः कतारमा जारी फिफा विश्वकप २०२२ मा यो टोलीले यस्तो प्रदर्शन गरेको थियो कि विश्व नै अवाक् भई हेरिरहेको थियो । सेमीफाइनलभन्दा अघि पुग्न नसकेको मोरक्को शनिबार भएको खेलमा साबिक उपविजेता क्रोएसियासँग पराजित भएको छ ।

२२ औँ स्थानको टिम मोरक्को, चालु विश्वकपको सेमिफाइनलसम्म पुग्यो । क्वाटरफाइनल खेलमा मोरक्कोले क्रिस्टियानो रोनाल्डोको टिम पोर्चुगललाई १–० ले पराजित गरेको थियो ।

मोरक्कोको सफलता यसका खेलाडीहरूको दिनरातको मिहिनेतको परिणाम हो । करिब ३.६७ करोड जनसङ्ख्या भएको यो सानो अफ्रिकी देश सेमिफाइनलमा पुग्छ भने शायदै कुनै फुटबल विज्ञले भविष्यवाणी गरेको थियो होला । यसको पछाडिको कारण यो पनि थियो कि यस अघिका विश्वकपमा मोरक्को सेमीफाइनल मात्र होइन क्वाटरफाइनलसम्म पनि पुग्न सकेको थिएन । सबै भविष्यवाणीलाई गलत ठहर्याउँदै मोरक्को विश्वकप फुटबलको सेमीफाइनलमा पुग्ने पहिलो अफ्रिकी राष्ट्र बन्यो । विगत हेर्ने हो भने, मोरक्कोभन्दा पहिले सन् १९९० मा क्यामरुन, सन् २००२ मा सेनेगल र सन् २०१० मा घाना क्वाटर फाइनलमा पुगेका थिए ।

नयाँ प्रशिक्षकले परिवर्तन गरे भाग्य
मोरक्कोका धेरै मानिसहरू फ्रान्स, स्पेन, नेदरल्याण्ड जस्ता देशहरूमा बसोबास गर्छन् । तर जब देशको लागि खेल्ने कुरा आउँछ, कोही पछि हट्दैनन् । हालको टिमका पनि धेरै स्टारहरू – हाकिम जियेच, सोफियान बाउफल, रोमेन साइस, अशरफ हाकिमी र यासिन बोनो या त विदेशमा जन्मेका हुन् या त हाल विदेशी लिगमा खेल्छन् । यद्यपि यी खेलाडीले मोरक्कोका लागि धेरै ठूला प्रतियोगितामा भाग लिएका थिए तर यसअघि उनीहरूको प्रदर्शन त्यति राम्रो थिएन ।
अहिले जारी विश्वकपमा उनीहरूको प्रदर्शनमा अचानक सुधार आएको थियो । खेलाडी परिवर्तनमा टिमका प्रशिक्षक वालिद रेग्रागुईको पनि महत्वपूर्ण भूमिका रहेको थियो जसले केही महिनामै टिमको भाग्य बदलिदिए । वालिद रेग्रागुई यसै वर्ष अगस्टमा टिमको प्रशिक्षकमा नियुक्त भएका थिए ।

राजा मोहम्मदको पनि महत्वपूर्ण भूमिका
सन् १९९९ देखि मोरक्कोमा शासन गर्दै आएका राजा मोहम्मद छैटौंले पनि मोरक्कन फुटबलको विकासमा महत्वपूर्ण भूमिका खेलेका छन् । राजा मोहम्मदले सो देशमा फुटबल एकेडेमी निर्माण गर्न आर्थिक सहयोग गरेका थिए । त्यसैको फलस्वरूप मोरक्कन प्रोफेशनल लिग (बोटोला)का साथै आफ्नो देश तथा विदेशी लिगमा पनि यस्ता खेलाडीहरू देखा परेका छन् ।

नयाँ प्रतिभाको उदयका कारण, अफ्रिकी च्याम्पियन्स लिगमा मोरक्कन क्लबहरूको प्रदर्शन पनि विगतका वर्षहरूमा राम्रो रहेको छ । कुनै समय इजिप्ट, ट्युनिसिया र नाइजेरियाका क्लबहरूको सो प्रतियोगितामा धेरै दबदबा थियो ।

प्रशंसक र प्रियजनहरूबाट साथ र समर्थन
मोरक्कन खेलाडीहरूको सफलताको पछाडि उनीहरूका फ्यान र परिवारका सदस्यहरूको पनि हात रहेको छ । पोर्चुगलमाथि मोरक्कोको जीतपछि टिमका मिडफिल्डर सोफियान बाउफल आफ्नी आमासँग खुसी मनाएका थिए । यस क्रममा बाउफल र उनकी आमा पनि मैदानमा मज्जाले नाच्दै गरेको देखिएको थियो । मोरक्कोलाई समर्थन गर्न फ्यानहरू पनि ठूलो सङ्ख्यामा कतार पुगेका थिए । फिफा विश्वकप २०२२ मा मोरक्कोले अहिलेसम्म खेलेका सबै खेलहरूमा फ्यानहरूबाट धेरै समर्थन पाएको छ ।

चालु विश्वकपमा चार जीत र एक बराबरी तथा एक हार मेक्सिकोले बेहोर्याे । ती चार जीतमध्ये बेल्जियम, स्पेन र पोर्चुगलजस्ता आफूभन्दा माथिल्लो वरीयताका टोलीहरूविरुद्ध तीन जीत हासिल गरेको थियो । क्यानडाविरुद्ध एक मात्र गोल खाँदा आत्मघाती गोल भएको थियो ।

मोरक्कोको अहिलेसम्मको यात्राः
समूह खेलमा क्रोएसिया र मोरक्को ०–० गोलको बराबरीमा
समूह खेलमा बेल्जियमसँग २–० ले विजयी
समूह खेलमा क्यानडासँग २–१ ले विजयी
प्रि–क्वार्टर फाइनलमा स्पेनसँग ३–० को जीत (शुटआउट)
क्वाटरफाइनलमा पोर्चुगलसँग १–० ले विजयी
सेमीफाइनलमा फ्रान्ससँग २–० ले पराजित ।
तेस्रो स्थानको लागि भएको खेलमा क्रोएसियासँग २–१ ले पराजित ।