हरेक विश्वकप फुटबलमा थुप्रै प्रशिक्षकहरूले आफ्नो जागीर गुमाउने गरेका छन् । कसैले स्वेच्छिक राजीनामा दिन्छन् त कोही बर्खास्तीमा पर्छन् । समूह चरणदेखि नै राम्रो नतिजा दिन नसकेका केही प्रशिक्षकहरूले आफ्नो टिम प्रतियोगिताबाट बाहिरिएसँगै यसपटक पनि आफ्नो जिम्मेवारी त्यागेका छन् ।

यी हुन् आफ्नो टिमको पराजयपछि यस पटक जिम्मेवारीबाट बाहिरिएका फुटबल प्रशिक्षकहरू

ब्राजिलका टिटे
ब्राजिलका प्रशिक्षक एडनर लियोनार्दो बाकी ‘टिटे’ नामले परिचित छन् । उनले विश्वकपसँगै आफ्नो सम्झौता सकिएपछि राजीनामा दिने पूर्वघोषणा गरेका थिए । तर, जारी विश्वकपमा क्वार्टरफाइनल अन्तर्गत क्रोएसियासँग पेनाल्टी सुटआउटमा ४–२ गोलको नतिजमा पराजित भएसँगै ब्राजिल सेमीफाइनलमा पनि नपुगेपछि टिटेले जिम्मेवारी त्यागेको घोषणा गरे । उनले सन् २०१६ मा ब्राजिलको प्रशिक्षण सम्हालेका थिए ।

नेदरल्यान्डस्का लुइस भान गाल
नेदरल्यान्ड्सका मुख्य पशिक्षक लुइस भान गालले अर्जेन्टिनासँगको हारपछि राजीनामा दिए । नेदरल्यान्ड्सको प्रशिक्षकका रुपमा तेस्रो कार्यकाल बिताएका भान गालले क्वार्टरफाइनलमा अर्जेन्टिनासँग पेनाल्टी सुटआउटमा नाटकियरुपमा पराजित भए लगतै जिम्मेवारी त्यागेको घोषणा गरेका हुन् ।

मेक्सिकोका जेरार्डो मार्टिनो
मेक्सिको समूह चरणबाटै बाहिरिएपछि टिमका अर्जेन्टिनी प्रशिक्षक जेरार्डो ‘टाटा’ मार्टिनोले राजीनामा दिए । समूह चरणको पहिलो खेलमा पोल्यान्डसँग गोलरहित बराबरी खेलको मेक्सिकोले दोस्रो खेलमा अर्जेन्टिनासँग २–० को हार बेहोर्यो । अन्तिम खेलमा साउदी अरबलाई २–१ गोलको नतिजामा पराजित गरे पनि मेक्सिकोले शीर्ष दुईमा रहेर अन्तिम १६ मा स्थान बनाउन सकेन ।

रेफ्रीले खेल सकिएको संकेत गरेसँगै आफ्नो सम्झौता पनि त्यहीँ सकिएको भन्दै उनले राजीनामा दिएका थिए । मार्टिनोले सन् २०१९ जनवरीदेखि मेक्सिकोको जिम्मेवारी सम्हालेका थिए ।

बेल्जियमका रोबेर्टो मार्टिनेज
समूह चरणबाट बेल्जियम बाहिरिएसँग एभर्टनका पूर्व प्रशिक्षक समेत रहेका मार्टिनेजले बेल्जियमको मुख्य प्रशिक्षकबाट राजीनामा दिए । विश्व वरियताको दोस्रो नम्बरमा रहेको बेल्जियम समूह चरणबाटै बाहिरिएको थियो ।
मार्टिनेजले सन् २०१६ मा बेल्जियमको प्रशिक्षकका रुपमा जिम्मेवारी सम्हालेका थिए ।

घानाका ओट्टो एडो
घानाका पूर्व खेलाडी एडोले केही सन्तोषजनक नतिजा आए पनि समूहको पुछारमा रहेर विश्वकप यात्रा टुङ्ग्याएपछि जिम्मेवारी त्याग गरे । घानाको अन्तिम खेल सकिएपछि उनले प्रशिक्षकको जिम्मेवारीबाट बाहिरिने निर्णय गरेका थिए । घानाले दक्षिण कोरियालाई हराए पनि पोर्चुगल र उरुग्वेसँग पराजय बेहोर्यो ।

प्रशिक्षकको जिम्मेवारी लिनेबित्तिकै विश्वकपमा विजेता नै भए पनि आफूले राजीनामा दिने उनले बताएका थिए ।

दक्षिण कोरियाका पाउलो बेन्टो
पूर्व पोर्चुगिच खेलाडीसमेत रहेका बेन्टोकोले चार वर्षको कार्यकालपछि कतारमा जारी विश्वकपअन्तर्गत अन्तिम १६ मा ब्राजिलसँग पराजित भएसँगै जिम्मेवारी त्यागे । दक्षिण कोरियाले समूह चरण अन्तर्गतका खेलमा उरुग्वेसँग बराबरी खेलेको थियो । घानासँग पराजित भए पनि पोर्चुगललाई हराउँदै अन्तिम १६ सम्मको यात्रा तय गरेको थियो ।

स्पेनका लुइस एनरिक
स्पेनिस फुटबल संघले मोरक्कोसँग पराजित हुँदै स्पेन अन्तिम १६ बाट बाहिरिएपछि लुईस एनरिकलाई बर्खास्त गरेको छ । उनको ठाउँमा यु–२१ का प्रशिक्षक लुईस डेला फ्युन्तेले राष्ट्रिय टिमको जिम्मेवारी पाएका छन् ।

पोर्चुगलका फर्नान्डो सान्तोस

विश्वकपको क्वाटरफाइनलमा मोरक्कोसँग पराजित भएपछि राष्ट्रिय फुटबल टोलीका मुख्य प्रशिक्षक फर्नान्डो सान्तोसलाई पोर्चुगल फुटबल महासंघले बर्खास्त गरेको छ ।
पछिल्ला दुई खेलमा कप्तान क्रिस्टियानो रोनाल्डोलाई बेन्चमा राखेपछि सान्तोस निकै चर्चामा थिए । स्वीट्जरल्यान्ड विरूद्ध जीत हासिल गरे पनि मोरक्कोविरुद्ध हार बेहोरेपछि उनको चर्को आलोचना भएको थियो ।

६८ वर्षीय सान्तोसले ८ वर्ष पोर्चुगल राष्ट्रिय टोली सम्हालेका थिए । सन् २०१६ मा उनले पोर्चुगललाई युरो च्याम्पियन बनाएका थिए ।

यद्यपि उनको अन्तिम खेलमा क्रिस्टियानो रोनाल्डोलाई बेन्चमा राख्नु नै प्रशिक्षकबाट हट्नुको प्रमुख कारण बन्यो । सो खेलपछि सान्तोसले खेलपछि बोल्दै रोनाल्डोलाई नखेलाउने निर्णय गलत नभएको र राजीनामा पनि नदिने बताएका थिए ।