विराटचोकः नेपाल धितोपत्र बोर्डमा सूचीकृत कम्पनीमध्ये आज ६ वटा कम्पनीको शेयर किने गत आर्थिक वर्षको लाभांश पाइने भएको छ । बुक क्लोज हुने अघिल्लो दिनसम्म शेयर किन्नेले लाभांश पाउने हुनाले भोलि पुस १५ गते र पुस १७ गते बुक क्लोज हुने कम्पनीको लाभांश हात पार्न आजसम्म शेयर किन्नुपर्ने भएको हो ।

आरएसडीसी लघुवित्तले भोलि पुस १५ गते बुक क्लोज गर्दैछ । बाँकी ५ कम्पनीले पुस १७ गते आइतबार बुक क्लोज गर्दैछन् ।

आरएसडीसी लघुवित्तले गत आर्थिक वर्षको नाफाबाट ८ प्रतिशत बोनस सेयर र कर सहित ३ प्रतिशत नगद लाभांश वितरण गर्दैछ । हिजो दोस्रो बजारमा यो कम्पनीको शेयरमूल्य अघिल्लो दिनको भन्दा ५ रुपैयाँ घटेर ५४५ रुपैयाँ कायम भएको छ । । पुस २९ गते एशियन होटल प्रा.लि. बुटवल, रुपन्देहीमा हुने साधारण सभाले लाभांश पारित गर्ने भएको छ ।

सुनसरीको दुहबीमा केन्द्रीय कार्यालय रहेको फरवार्ड माइक्रोफाइनान्सले गत आर्थिक वर्षको नाफाबाट २५ प्रतिशत बोनस सेयर र कर सहित ५ प्रतिशत नगद लाभांश गरी जम्मा ३० प्रतिशत लाभांश वितरण गर्दैछ । पुस ३० गते दिनेश चौधरी स्मृति प्रतिष्ठानको सभाहल, दुहबीमा हुने सभाले सो लाभांश पारित गर्नेछ । बुधबार अघिल्लो दिनको भन्दा ४७ रुपैयाँ ३० पैसा घटेर २२८९ रुपैयाँ ९० पैसामा सो कम्पनीको शेयर किनबेच भएको छ ।

गत आर्थिक वर्षको नाफाबाट १९ प्रतिशत बोनस सेयर र कर प्रयोजनका लागि छुट्याएको १ प्रतिशत नगद लाभांश पारित गर्ने गरी फस्र्ट माइक्रोफाइनान्सले पुस ३० गते वार्षिक साधारण सभा बोलाएको छ । आम्रपाली ब्यांकेट, भाटभटेनी काठमाडौंमा बिहान १० बजे शुरु हुने साधारण सभाका लागि कम्पनीले पुस १७ गते बुक क्लोज मिति तोकेको छ । अघिल्लो दिनको भन्दा १० रुपैयाँ मूल्य घटेर बुधबार कम्पनीको शेयर किनबेच ७२२ रुपैयाँ प्रति कित्तामा भएको छ ।

कालिका पावर कम्पनीले गत आर्थिक वर्षको नाफाबाट १५ प्रतिशत बोनस सेयर र कर प्रयोजनका लागि ०.७८ प्रतिशत नगद लाभांश वितरण गर्दैछ । पुस २९ गते कम्पनीको रजिष्टर्ड कार्यालय भरतपुर १०, चितवनमा बिहान ११ बजे शुरु हुने सभाले लाभांश पारित गर्ने भएको हो । अघिल्लो दिनको भन्दा ५ रुपैयाँ ६० पैसा बढेर ३६६ रुपैयाँमा सो कम्पनीको शेयर बुधबार कारोबार भएको छ ।

युनाइटेड इन्स्योरेन्सले गत आर्थिक वर्षको नाफाबाट ५ प्रतिशत बोनस सेयर र कर प्रयोजनका लागि ०.२६ प्रतिशत नगद लाभांश दिने भएको छ । सो लाभांश पारित गर्न पुस २७ गते अनमोल ब्यांक्वेट, शंखमुल, काठमाडौंमा बिहान ११ बजे साधारण सभा बोलाइएको छ ।  अघिल्लो दिनको भन्दा प्रतिशेयर ९ रुपैयाँ बढेर बुधबार सो कम्पनीको शेयर प्रति कित्ता ३७९ रुपैयाँमा कारोबार भएको छ ।

सेन्ट्रल फाइनान्सले गत आर्थिक वर्षको नाफाबाट ५ प्रतिशत नगद लाभांश वितरण गर्ने प्रस्ताव पारित गर्न पुस २९ गते कम्पनीको केन्द्रीय कार्यालय, कुपण्डोल ललितपुरमा बिहान १० बजे साधारण सभा गर्ने भएको छ । अघिल्लो दिनको भन्दा १० प्रतिशत बढेर अर्थात् प्रति कित्ता २९ रुपैयाँ ३० पैसा बढेर ३२२ रुपैयाँ ३० पैसामा बुधबार यो कम्पनीको शेयर किनबेच भएको छ ।