विराटचोकः गत वर्षको लाभांश वितरणका लागि विभिन्न ६ कम्पनीले भोलि बुक क्लोज (शेयर दाखिला खारेज) बन्द गर्दैछन् । बुक क्लोजको अघिल्लो दिनसम्म लगानीकर्ता हुनेले सो लाभांश पाउने हुनाले ती कम्पनीको शेयर खरीद गर्ने आज अन्तिम दिन हो ।

नेपाल टेलिकम, नबिल बैंक, हिमालयन बैंक, महालक्ष्मी विकास बैंक, बुटवल पावर कम्पनी र सिद्धार्थ इन्स्योरेन्सले भोलि बुक क्लोज गर्दैछन् ।

नेपाल टेलिकमले ४० प्रतिशत नगद लाभांश दिँदैछ । पुस २८ गते राष्ट्रिय सभागृहमा हुने पन्ध्रौँ वार्षिक साधारण सभाले सो विशेष प्रस्ताव पारित गर्ने भएको छ ।

सबैभन्दा धेरै लाभांश दिँदै आएको नबिल बैंकले पुस २९ गते सिल्भर ओक ब्याङ्कवेट तथा इभेन्ट सेन्टर, गैरीधारा, काठमाडौँमा ३८ औँ वार्षिक साधारण सभा बोलाएको छ । सो सभाले हाल कायम चुक्ता पूँजीको १८ दशमलव ५० प्रतिशतका दरले बोनस शेयर र सोको कर प्रयोजनार्थसहित ११ दशमलव ५० प्रतिशत नगद लाभांश गरी ३० प्रतिशत लाभांश वितरण गर्ने प्रस्ताव पारित गर्ने भएको छ ।

हिमालयन बैंकले पुस २८ गते बैंकको तीसौँ वार्षिक साधारण सभा होटल सोल्टीमा आह्वान गरेको छ । सभाले हिमालयन बैंकले सिभिल बैंकलाई १०० बराबर ८० दशमलव २८ शेयर स्वाप रेसियोमा प्राप्ति गर्ने प्रस्तावका साथै ८ प्रतिशतका दरले बोनस शेयर र सोको कर प्रयोजनार्थसहित ११ दशमलव ११ प्रतिशतका दरले नगद लाभांश वितरण गर्ने प्रस्ताव पारित गर्ने भएको छ ।

महालक्ष्मी विकास बैंकले शेयरधनीहरुलाई वितरण गर्ने हाल कायम चुक्ता पूँजी ४ प्रतिशतका दरले बोनस शेयर र सोको कर प्रयोजनार्थ ६ दशमलव ४७ प्रतिशत नगद लाभांश वितरण गर्ने विशेष प्रस्ताव पारित गर्ने भएको छ । पुस २९ गते, लैनचौर ब्याङ्कवेट, लैनचौरमा हुने साधारण सभाले सो प्रस्ताव पारित गर्ने भएको हो ।

बुटवल पावर कम्पनीले पुस ३० गते, कार्की ब्याङ्कवेट बबरमहल, काठमाडौँमा ३० औँ वार्षिक साधारण सभा डाकेको छ । हाल कायम चुक्ता पूँजीको ५ प्रतिशतका दरले बोनस शेयर र सोको कर प्रयोजनार्थसहित ७ दशमलव ५ प्रतिशतका दरले नगद लाभांश वितरण गर्ने प्रस्ताव सो सभाले पारित गर्ने भएको छ ।

सिद्धार्थ इन्स्योरेन्सले ९ दशमलव स्टक लाभांश र ० दशमलव ४७ प्रतिशत नगद लाभांश वितरण गर्ने प्रस्ताव तथा मर्जरको प्रस्ताव पारित गर्न पुस २९ गते नेपाल पर्यटन बोर्डको सभाकक्ष भृकुटी मण्डपमा २१ औं वार्षिक साधारण सभा बोलाएको छ ।

बराबरी शेयर स्वाप रेसियोमा सिद्धार्थ इन्स्योरेन्स र प्रिमियर इन्स्योरेन्स गाभ्ने गाभिने सम्बन्धी विशेष प्रस्ताव पनि सो साधारण सभाले पारित गर्ने भएको छ ।