विराटनगरः नेकपा एमाले संसदीय दलका नेता हिकमत कार्की नेकपा माओवादी केन्द्र, राप्रपा र जसपाको समर्थनमा प्रदेश नम्बर १ को मुख्यमन्त्री भएका छन् । प्रदेश प्रमुख परशुराम खपुङले पूर्व आन्तरिक मामिला तथा कानुनमन्त्री कार्कीलाई मुख्यमन्त्री नियुक्त गरेका हुन् ।

प्रदेश प्रमुख खापुङले संविधानको धारा १६८ को उपधारा (२) बमोजिम दुई वा दुईभन्दा बढी दलहरूको समर्थनमा बहुमत प्राप्त गरेका कार्कीलाई मुख्यमन्त्री नियुक्त गरेका हुन् ।

वि.सं. २०२१ साल असोज ११ गते झापाको गौरादह नगरपालिका वडा नम्बर ३ मा पिता स्व. बमबहादुर कार्की र माता जानुकादेवी कार्कीको कोखबाट तेस्रो सन्तानका रूपमा जन्मिएका हुन् । उनको परिवारमा आमा, दाजु–भाउजू, श्रीमती, दुई छोरी र एक छोरा छन् ।

उनको बाल्यकाल गौरादहमै बितेको र एसएलसीसम्मको अध्ययन स्थानीय जनता माविमा भएको थियो । विद्यालयमा अध्ययन गर्दै गर्दा अनेरास्ववियुमा सङ्गठित भई विद्यार्थी राजनीतिमा प्रवेश गरेका उनले कानुनमा स्नातकोत्तर तह (एलएलएम)को अध्ययन पूरा गरेका छन् ।

अनेरास्ववियुको विभिन्न तहका कमिटीको नेतृत्वदायी भूमिका (क्याम्पस प्राक, जिल्ला कमिटी काठमाडौं, बाग्मती अञ्चल कमिटी) निर्वाह गर्दै उनी २०५५ सालमा केन्द्रीय अध्यक्षको जिम्मेवारीमा समेत रहेका थिए । सभापति नेपाल ल क्याम्पसको स्ववियुको सभापति भएका उनी विद्यार्थीको विशेष जिल्ला कमिटीको सचिव, उपत्यका समन्वय कमिटीको सदस्य, मेची अञ्चल समन्वय कमिटीको सदस्य हुँदै २०७१ सालमा सम्पन्न भएको नेकपा (एमाले) को नवौं राष्ट्रिय महाधिवेशनबाट केन्द्रीय कमिटीमा निर्वाचित भएका थिए ।

२०७१–२०७३ सालसम्म कार्की मेची अञ्चल समन्वय कमिटीको इन्चार्ज भएका उनी प्रादेशिक संरचनामा संगठन रुपान्तरण गर्ने चरणमा प्रदेश संगठन कमिटीको प्रचार विभाग प्रमुख रहेका थिए । २०७४ सालको प्रदेशसभा निर्वाचनमा झापाको निर्वाचन क्षेत्र नम्बर ५ (१) बाट प्रदेशसभामा निर्वाचित भएका उनी प्रदेश सरकारको पहिलो मन्त्रिपरिषद्मा आन्तरिक मामिला तथा कानुन मन्त्रीका रूपमा २०७४ फागुन ३ गतेबाट २०७८ साल भदौ १० गतेसम्म रहेका थिए ।

कार्की अहिले नेकपा (एमाले) को स्थायी कमिटी सदस्य तथा प्रदेश नम्बर १ को सह–इञ्चार्जको भूमिकामा छन् । गत मंसिर ४ गते भएको निर्वाचनमा झापाको निर्वाचन क्षेत्र नम्बर ५ (१) बाट प्रदेशसभामा निर्वाचित भएका उनी मिलनसार, मिजासिलो स्वभाव र स्पष्टवक्ताको रुपमा चिनिन्छन् ।